Պաշտոնական. Երևանի ՊՀԹ տնօրենն ազատվել է աշխատանքից

Արմինֆո. Երևանի Պատանի հանդիսատեսի թատրոնի (ՊՀԹ) տնօրեն Էմին Թորոսյանն ազատվել է աշխատանքից: Այդ մասին նա հաղորդել է ՊՀԹ ֆեյսբուքյան էջում։

«Վերջին շրջանում առցանց, տպագիր, սոցիալական տեղեկատվական տարբեր միջոցներով Երևանի Պատանի հանդիսատեսի թատրոնի և իմ պաշտոնավարության հարցի հետ կապված շատ անդրադարձեր եղան:

Պարտավորված եմ զգում տեղեկացնել բոլոր սրտացավ մարդկանց.

Երևանի քաղաքապետարանից ստացած Որոշումն առ այն, որ այսօրվանից՝ 2025 թվականի մայիսի 13-ից, հիմք ընդունելով մշակույթի վարչության պետ Գոշ Սարգսյանի հիմնազուրկ զեկուցագիրն ուղղված Երևանի քաղաքապետին, աշխատանքային պայմանագրի միակողմանի խզմամբ, դադարեցվում է գործունեությունս Պատանի հանդիսատեսի թատրոնի տնօրենի պաշտոնում:

Մեկնաբանություններն ավելորդ եմ համարում:

Այս պահին առավե՛լ կարևորում եմ հետևյալը.

Թատերական մասնագիտական ու թատերասեր հանրության, գործընկերներիս, իրենց արդարացի բողոքի ձայնը բարձրացրած բոլոր մարդկանց շնորհակալությունս եմ հայտնում՝ աջակցության, զորակցության, գնահատականների, հոգով ամուր մնալու, եռանդը չկորցնելու և անկեղծ մաղթանքների համար:

Հավատը հույս է ներշնչում, որ կամայականության, հաճկատարության և դիլետանտիզմի փոխարեն, մեր վաղվա օրը, այնուամենայնիվ, արդարության, անկողմնակալության, պրոֆեսիոնալիզմի, մարդկային առողջ հարաբերությունների, նվիրվածության և նույնքան առողջ տրամաբանության գերակայությամբ է առաջնորդվելու:

Առանձնակի շնորհակալությունս հարազատ թատրոնին, ՊՀԹ-ի նվիրյալ աշխատակազմին, գեղարվեստաստեղծագործական խմբի անդամներին, արտիստներին, բոլոր ծառայությունների աշխատակիցներին՝ համատեղ յոթնամյա ադյունավետ գործունեության համար:

Մենք առաջնորդվեցինք համախոհությամբ և հանուն մեր Պատանի հանդիսատեսի անխզելի բարեկամության նպատակասլացությամբ։

Հույս ունեմ, որ դուք էլ այդ տարիներն արդյունավետ եք համարում, քանի որ դրանց ընթացքում միասին ստեղծեցինք ու բեմ բարձրացրեցինք նոր, ժամանակակից լուծումներով աչքի ընկնող մնայուն ներկայացումներ:

Համաշխարհային դրամատուրգիայի, համամարդկային խնդիրների հետ, առաջի՛ն հերթին կարևորեցինք ազգային անկորնչելի արժեքների փառաբանումն ու վերհանումը՝ թատրոնին հասու գեղարվեստական ու գեղագիտական միջոցներով: Շնորհակալ եմ, հարգելի, սիրելի մարդիկ: Լա՛վ եղեք», - ասվում է ՊՀԹ արդեն նախկին տնօրենի ուղերձում։

Նշենք, որ Էմին Թորոսյանը Երևանի Պատանի հանդիսատեսի թատրոնի ղեկավարի պաշտոնում նշանակվել էր 2019 թվականի մայիսին: Օրեր առաջ մամուլում տեղեկություններ էին շրջանառվում Թորոսյանի հնարավոր պաշտոնանկության մասին։ Քաղաքապետարանից տեղեկացրել են, որ ՊՀԹ-ի գործունեության մեջ որոշակի խնդիրներ են առաջացել, ինչի առնչությամբ ուսումնասիրություն է կատարվել, քաղաքապետարանը պարզաբանում է պահանջել թատրոնի ղեկավարությունից։ Սակայն վերջին հարցազրույցներից մեկում Թորոսյանը  պատմել էր, որ քաղաքապետարանն առաջարկել է խզել աշխատանքային պայմանագիրը կազմակերպությանը հասցված նյութական վնասի պատճառով, մասնավորապես, խոսքը առաջին եռամսյակի արդյունքներով 1200 հրավիրատոմսերի կամ անվճար տոմսերի տրամադրման հետ կապված ինչ-որ թերացման մասին էր։ Բայց Թորոսյանն՝ ինքը, կարծիք էր հայտնել, որ տոմսերի հետ կապված որևէ խնդիր չի կարող լինել, հետևաբար, նման որոշման պատճառն այլ է: