Ռոբերտ Քոչարյանը մտահոգություն է հայտնել դեպի Հայաստան օտարերկրյա ներդրումների ներհոսքի բացակայության կապակցությամբ

Արմինֆո.  Այսօր Ադրբեջանի կողմից Սյունիքի և Սևանա լճի մի մասի գրավման վտանգ կա։ Այդ մասին հայտարարել է Հայաստանի երկրորդ նախագահ Ռոբերտ Քոչարյանը՝ "Հայկական համալսարանի" ունկնդիրների եւ դասախոսների հետ հանդիպման ժամանակ:

"Մենք ապրում ենք բավականին բարդ տարածաշրջանում, և ես, պարզապես, համոզված եմ, որ այս տարածաշրջանում կամ դու պետք է գործոն լինես, կամ, ինչպես անգլիացիներն են ասում, եթե սեղանի մոտ չեք, ապա ճաշացանկում եք: Այժմ մենք կամ կհայտնվենք ճաշացանկում, կամ կդառնանք գործոն: Արդյունավետ լինելու համար մեզ մարտունակ բանակ է պետք։ Մարտունակ բանակ ունենալու համար մեզ նաև ռազմաքաղաքական դաշնակիցներ են պետք. մենք ոչ Չինաստան ենք, ոչ էլ Ռուսաստան: Այս խնդիրները պետք է շատ արագ լուծվեն։ Եթե մենք դա չվերականգնենք, ապա կհայտնվենք այս տարածաշրջանի ճաշացանկում", - նշել է Քոչարյանը։

ՀՀ երկրորդ նախագահի խոսքով՝ ցանկացած անկայուն իրավիճակ այս տարածաշրջանում մեծ ռիսկեր է ստեղծելու Հայաստանի համար, շատ մեծ ռիսկեր, և Սյունիքը վերցնելու գայթակղությունը շատ մեծ է լինելու Ադրբեջանի համար: "Իսկ նման վտանգ գոյություն ունի։ Ինչպես Սյունիքի, այնպես էլ Սևանի մի մասի նկատմամբ։ Արդյո՞ք մենք դա ուզում ենք: 2021 թվականի ընտրությունների ժամանակ ինձ հաճախ էին հարցնում. "Քանի՞ տարի կպահանջվի բանակը վերականգնելու համար։ Ես պատասխանում էի՝ 3-5 տարի, որից 4-ն արդեն անցել է։ Ինչ-որ բա՞ն է կատարվում: Ես դա չեմ տեսնում: Երբ ինձ ասում են, որ Հնդկաստանից հրետանի կամ ինչ-որ հրթիռ են գնում, ինձ մոտ հարց է առաջանում. ինչպե՞ս են զինամթերքով մատակարարվելու։ Նրանք գնում են մի բան, որը չեն կարող առաքել: Ինչպե՞ս: Ինչ-որ բան այստեղից, ինչ-որ բան այնտեղից, ինչ-որ այլ տեղից: Եթե հիշում եք, հրապարակային մեղադրանքներ կային, որ պատերազմում 80-ականների զենք են կիրառել։ Նայեք Ուկրաինայի պատերազմին: 60-ականների, 70-ականների և 80-ականների զենքերն, անկասկած, ամենահուսալին են: Այս պատերազմում մենք պարտվել ենք բայրաքթարներից։ Ուկրաինայում բոլոր "Բայրաքթարները" խոցվել և ոչնչացվել են երկու շաբաթվա ընթացքում՝ նույն ռուսական ՀՕՊ միջոցներով", - նշել է քաղաքական գործիչը։

Քոչարյանը կարծում է, որ հայկական կողմը պետք է "Բայրաքթարների"  հարցը լուծեր և ավարտին հասցներ առաջին երկու շաբաթվա ընթացքում, բայց, փոխարենը, ելակի ռեֆորմ էր իրականացնում: "ՀՕՊ համակարգը չի աշխատել։ Ինչու՞ չեն փակել ամբողջ օդը: Քանի որ նրանք փոխել են ՀՕՊ գնումների պլանը, գնել են Սու-եր, որոնք ընդհանրապես չեն օգտագործել, բայց դրանց ֆոնին լավ սելֆիներ են արել։ Հիմա պե՞տք է խոսենք այդ մասին, թե ոչ ։ Այժմ նրանք գնում են 185 մմ հրետանային հրանոթներ, որոնց արկն արժե 4000-5000 դոլար ։ Ինչ-որ պահի գինը բարձրացավ մինչև 7000-8000: Ամենաէժանն արժեր 3000։ Ինչպե՞ս եք պատկերացնում,  որքա՞ն պետք է բերեք, և ինչպե՞ս եք այն հետագայում բերելու: Դա բերելու հնարավորություն չկա։ Մարդիկ երբեմն այնպիսի արարքներ են անում, որոնք երբեմն ստիպում են ձեզ մտածել ՝ ինչ են մտածում և արդյոք մտածելու ունակություն ունեն։ Այդ դեպքում ինչպե՞ս եք պատրաստվում լուծել այդ հարցերը՝ մեկ Հնդկաստանի, մեկ Ֆրանսիայի հետ։ Անկեղծ ասած՝ ես չեմ հասկանում, թե ինչպես է իրականացվելու այդ զենքի սպասարկումը", - շարունակել է նա։

Խոսելով մարտունակ բանակի, ռազմաքաղաքական դաշնակցի մասին, որի հետ պետք է հարաբերություններ հաստատել, և տնտեսական զարգացման մակարդակի մասին, Քոչարյանը նշել է, որ իրեն մտահոգում է, որ վերջին տարիներին Հայաստան գրեթե օտարերկրյա ներդրումներ չեն ստացվել:

"Ո՞րն է պատճառը։ Շատ գործարաններ են բացել, բայց դրանցից ոչ մեկը չի աշխատել։ Պարզվել է, որ դրանք գոյություն չունեն։ Նրանք, պարզապես, ուզում էին ինչ-որ բան բացել PR-ի համար՝ լուսանկարվելու համար, բայց ոչինչ չի ստացվել: Հիմա մենք դառնում ենք զուտ սպասարկող երկիր, միայն ծառայությունների ոլորտով։ Այդ ծառայությունների ոլորտը նույնպես սահման ունի, մենք ծով չունենք։ Արդյունաբերական կարողությունների զարգացման ուղղությամբ քայլեր չեն ձեռնարկվել։ Սա պետք է փոխվի: Չեմ կարող նույնիսկ ասել, որ առաջին քայլը, որ պետք է անել, անվտանգության հարցն է ։ Եթե անվտանգության խնդիրները չլուծվեն, մնացած բոլոր խնդիրները կդառնան ռիսկային", - եզրափակել է Քոչարյանը։