Ադրբեջանագետը նախազգուշացնում է առկա իրողություններում Ադրբեջանի հետ խաղաղություն կառուցելու անհնարինության մասին

Արմինֆո. Մինչև Նիկոլ Փաշինյանի կառավարությունը Հայաստանի ոչ մի ղեկավարություն Ադրբեջանի հետ բանակցություններ չի վարել ի վնաս Հայաստանի պետական շահերի։ Ապրիլի 22-ին այդ մասին հայտարարել է ադրբեջանագետ Տաթևիկ Հայրապետյանը՝ "Ատելության հրահրումն Ադրբեջանում. զեկույցի հիմնական հետեւությունները" պանելային քննարկման ժամանակ։

"Յուրաքանչյուր իշխանություն հաջորդին է փոխանցում իր դիվանագիտական ժառանգությունը։ Եվ առկա իրողություններում կարող է ստացվել այնպես, որ Փաշինյանից Ժառանգություն ստացողները հայտնվեն այնպիսի իրականության մեջ, որից դուրս գալու հնարավորություն չի լինի", - հավելել է ադրբեջանագետը։

Այդ առումով Հայրապետյանն ուշադրություն է հրավիրել Ադրբեջանի նախագահ Իլհամ Ալիևի դիրքորոշման վրա, ով իշխանության գալուց ի վեր հստակ հայտարարել է հակամարտության լուծման ռազմական ճանապարհին իր հավատարմության մասին՝ դա համարելով իր առաքելությունը: Բացի այդ, փորձագետը նշել է, թե կա թյուր կարծիք, որ ադրբեջանցիների ատելության խոսքը հայտնվել է արցախյան հարցի առաջացման պատճառով: Ընդ որում, նա ուշադրություն է հրավիրել ադրբեջանական հասարակության շրջանում Արցախի շուրջ 44-օրյա պատերազմից հետո հայատյաց հռետորաբանության ավելացման վրա։

"2020 թվականի 44-օրյա պատերազմից հետո այդ ատելության խոսքն ավելի հաճախ է հնչում։ Ադրբեջանցիները հայերին բնութագրում են արդեն որպես "բարբարոսներ և շնագայլեր"։ Հատկանշական է, որ նման արտահայտությունները բխում են նախագահ Իլհամ Ալիևի շուրթերից և ակտիվորեն մեջբերվում են ինչպես պետական ԶԼՄ-ներում, այնպես էլ պատմության դասագրքերում", - նշել է փորձագետը։

Հայրապետյանն անդրադարձել է նաև Հայաստանի դեմ ադրբեջանական արշավում նոր նարատիվին՝ "Արևմտյան Ադրբեջան" եզրույթին: Նա ուշադրություն է հրավիրել այն հանգամանքին, որ թեեւ այդ տերմինը շրջանառության մեջ է դրվել 1998 թվականից, սակայն դրա տարածումը զգալիորեն աճել է վարչապետ Նիկոլ Փաշինյանի կողմից Արցախն Ադրբեջանի մաս ճանաչումից հետո: Ադրբեջանագետն ուշադրություն է հրավիրել այն փաստի վրա, որ հենց այդ պահից այդ անվանումը սկսել է հայտնվել դպրոցական բոլոր դասագրքերում, ինչը վկայում է դրա քաղաքական բնույթի և ոչ միայն Արցախը, այլև Հայաստանի ողջ տարածքը զավթելու ձգտման մասին: "Ավելի ուշ Ալիևն արդեն իր հայտարարություններում Հայաստանն անվանում է ֆաշիստական պետություն, ինչն, առնվազն, պետք է ստիպի մեզ մտածել այս պայմաններում Ադրբեջանի հետ խաղաղություն կառուցելու անհնարինության մասին", - հավելել է Հայրապետյանը:

Ադրբեջանագետն այս առումով նաև հիշեցրել է, որ 2020 թվականից հետո Ադրբեջանում սկսել են հետապնդել բոլոր նրանց, ովքեր խոսում են խաղաղության մասին կամ ինչ-որ կապ են ունեցել հայերի հետ: Նա արձանագրել է, որ բոլոր նրանք, ովքեր Ադրբեջանում դեմ են եղել Արցախի հարցի ուժային լուծմանը, այսօր կալանավորված են: