ՀՀ ԶՈՒ սերժանտները աշխատավարձի հաշվարկման ժամանակ կօգտվեն հատուկ գործակիցներից

Արմինֆո.  Հայաստանի Զինված ուժերի պայմանագրային սերժանտների համար աշխատավարձի հաշվարկման ժամանակ կկիրառվեն հատուկ գործակիցներ:  Ազգային ժողովն ապրիլի 18-ի լիագումար նիստում առաջին ընթերցմամբ քննարկում է "Պետական պաշտոններ և պետական ծառայության պաշտոններ զբաղեցնող անձանց վարձատրության մասին" օրենքում կատարված փոփոխությունները:

Ինչպես իր ելույթում նշել է պաշտպանության նախարարի տեղակալ Արման Սարգսյանը, ըստ փաստաթղթի, նախատեսվում է բանակի (գլխավոր շտաբի) սերժանտների համար սահմանել 9/9 խմբի գործակից, կորպուսի սերժանտի համար՝ 9/8 խմբի, ավագ սերժանտի համար՝ 7/4 խմբի գործակից: Օրինագծի ընդունումը, նախարարի տեղակալի հավաստմամբ, նպատակ է հետապնդում Հայաստանի Հանրապետության զինված ուժերում լիարժեք ներդնել մասնագիտական պայմանագրային զինվորական ծառայություն:

Սարգսյանն ընդգծել է, որ ՀՀ զինված ուժերում բարեփոխումների իրականացման գործընթացում առաջնային նշանակություն ունի սերժանտական համակարգի զարգացումը ՝ որպես պրոֆեսիոնալ զինված ուժերի ստեղծման առանցքային պայման: Այդ նպատակով կառավարության քաղաքականությունը ներառում է ԶՈՒ-ում սերժանտական կազմի զարգացմանը նպաստելը։ Փոփոխությունների արդյունքում կսահմանվեն նաև գնդի (բրիգադի) սերժանտի և գումարտակի (դիվիզիայի) սերժանտի պաշտոնների աշխատավարձերի գործակիցները: Արևմտյան երկրների, ինչպես նաև Արևելյան Եվրոպայի բանակների սերժանտական համակարգի ուսումնասիրությունը ցույց է տվել, որ գնդային օղակից բարձր սերժանտական համակարգը ներառում է գլխավոր շտաբի և բանակային ուղղությունների սերժանտների առկայությունը, որոնք ղեկավարում են ցածր մակարդակի սերժանտների գործունեությունը և ապահովում են սերժանտական համակարգի հրամանատարական ուղղահայացը: ՀՀ զինված ուժերում արհեստավարժ սերժանտական կազմի համակարգի լիարժեք ներդրումը և կենսագործունեության պատշաճ ապահովումը ենթադրում է նաև Հայաստանի Հանրապետության զինված ուժերում բանակային (գլխավոր շտաբի), կորպուսային սերժանտի և ավագ սերժանտի պաշտոնների ստեղծում, ինչի համար անհրաժեշտություն է առաջացել սահմանել այդ պաշտոնների պաշտոնային դրույքաչափերի գործակիցներ:

Կառավարության օրենսդրական նախաձեռնության առնչությամբ ԱԺ ընդդիմադիր "Հայաստան" խմբակցության պատգամավոր Գեղամ Մանուկյանը նշել է, որ խմբակցությունը ձեռնպահ է քվեարկելու այնքան ժամանակ, քանի դեռ սերժանտների ինստիտուտի ներդրման հետ կապված հարցերի հստակ պատասխաններ չեն ստացվել: Պատգամավորն ընդգծել է, որ հաջորդ շաբաթ հնարավորություն կլինի այդ հարցով քննարկումներ ունենալ ԶՈՒ գլխավոր շտաբի պետի տեղակալի հետ, որի ընթացքում, ինչպես սպասվում է, պատասխաններ, այնուամենայնիվ, կստացվեն: