ԶԼՄ. Ադրբեջանի պետանվտանգության ծառայությունն առևանգել է ծագումով թալիշ Ռուսաստանի քաղաքացու

Արմինֆո.  Ադրբեջանի պետական անվտանգության ծառայությունն առևանգել է թալիշական ծագում ունեցող Ռուսաստանի քաղաքացի Զահիրադդին Իբրահիմովին, հաղորդում է OC Media-ն:

Նշվում է, որ թալիշ պատմաբանն անհետացել է մարտի 26-ին Եկատերինբուրգում: Կարճ ժամանակ անց նրա հարազատները Ադրբեջանի  Լենքորանի շրջանում նամակ են ստացել Պետական անվտանգության ծառայությունից, որում թվարկվել են Իբրահիմովի դեմ մի քանի մեղադրանքներ, այդ թվում ՝ դավաճանություն:

ԶԼՄ-ը հիշեցրել է, որ Իբրահիմովը Ռուսաստանում ապրում է ավելի քան քսան տարի, նա քաղաքացիություն է ստացել 2002 թվականին: Նրա ընկերը՝ թալիշ բլոգեր Ալի Աղաևը, ով ապրում է Շվեդիայում, պատմել է, որ իրենք ծանոթ են 1989 թվականից։

Թալիշներն Ադրբեջանի ամենամեծ ազգային փոքրամասնությունն են, որոնց թիվը գնահատվում է 500 000-ից մինչև մեկ միլիոն մարդ: Թալիշները վաղուց պայքարում են իրենց էթնիկ ինքնավարության և քաղաքացիական իրավունքների ապահովման համար, ներառյալ՝ թալիշերեն կրթություն ստանալու հնարավորությունը:

"Զահիրադինը (Իբրահիմով) ընդդիմադիր Ժողովրդական ճակատ կուսակցության անդամ էր, իսկ ես "Մուսավաթի" (նույնպես ընդդիմադիր կուսակցության) անդամ էի։ Նա պատմաբան էր և գրում էր թալիշների պատմության, մեր մշակույթի մասին", - ասել է Աղաևը։

Վերջին անգամ Իբրահիմովը փորձել է Ադրբեջան այցելել 2014 թվականին, սակայն օդանավակայան նրան թույլ չեն տվել:

Ըստ ռուսական տվյալների՝ Իբրահիմովը եղել է 2012 թվականին ստեղծված Թալիշական մշակույթի կենտրոնի հիմնադիրներից մեկը: Նա նաև Սվերդլովսկի մարզի թալիշ ազգային-մշակութային ինքնավարություն կազմակերպության հիմնադիրն էր, որը ստեղծվել է 2021 թվականին ։