Քաղաքագետ. Փաշինյանը չի կարող փակել Արցախյան շարժումը

Արմինֆո.  Հայաստանի վարչապետ Նիկոլ Փաշինյանը չի կարողանա փակել Արցախյան շարժումը, կարծում է քաղաքագետ Կարեն Իգիթյանը:

Նրա խոսքով՝ դա պայմանավորված է այն հանգամանքով, որ լուրջ խնդիրներից մեկը անվանումների օգննննությամբ ստեղծված մոլորություններն են։

"Անվանումները կարող են արտացոլել էությունը, կարող են աղավաղել կամ իմաստազրկել։ Օրինակ, ի՞նչ է "44-օրյա պատերազմը"։ Որտե՞ղ է այն եղել, ինչի՞ մասին էր այն: Անվանումից պարզ չէ:

Որոշակի մոլորության մեջ է գցում նաև "Արցախյան շարժում" եզրույթը։ Շարժումը, հակամարտությունն ու պատերազմը եղել են ոչ միայն Արցախում, և ոչ միայն Արցախի համար։ Հակամարտությունն Արցախում չի սկսվել և Արցախով չի ավարտվելու։ 1905 թվականին դեռևս իրենց ժամանակակից էթնոնիմը չստացած "թաթար" ազգայնականների (այժմ ճիշտ է անվանել ՝ ադրբեջանցի) ավազակախմբերը հարձակվեցին հայերի վրա ողջ Կովկասում՝ Կարսի մարզից մինչև Բաքվի նահանգ, Թիֆլիսից մինչև Էրիվանի նահանգ։ Ամենուր փորձում էին ջարդեր իրականացնել։ 1915-1922 թվականներին ցեղասպանության  ենթարկվեց հայ բնակչությունը թե Արևմտյան Հայաստանում, թե Կիլիկիայում և թե, նույնիսկ, Իրանի տարածքում", - նշել է փորձագետը՝ Facebook-ի իր էջում։

Նա հավելել է, որ 1918-1920 թվականներին Թուրքիայի և Ադրբեջանի ագրեսիան, արդեն Արևելյան Հայաստանի խաղաղ հայ բնակչության կոտորածներն Արցախի պատճառով չեն եղել և տեղի են ունեցել ոչ միայն Արցախում, այլև ողջ Կովկասում և, նույնիսկ, դրանից դուրս:

"Եվ Ադրբեջանի պահանջները 1918-1920-ական թվականներին ոչ միայն ու ոչ այնքան Արցախի մասին էին։ Փոքր մեջբերում.  "Ադրբեջանցիները պահանջում էին ոչ միայն ողջ Ղարաբաղը, Զանգեզուրը և Շարուր-Նախիջևանը, այլև՝ Էրիվանի և Էջմիածնի գավառների մեծ մասը՝ Երևան քաղաքի հետ միասին", - հավելել է Իգիթյանը:

"Հայաստանի մայրաքաղաքը կարող է լինել Էջմիածինը",-գայլի ախորժակով հայտարարում էր Յուսուֆբեկովը, և նրան արձագանքում էին Խան-Խոյսկին ու Ռասուլզադեն ։ Եվ սրանք դեռ չափավոր գործիչներ էին" ։ Այնպես որ, քանի դեռ հայերին ու Հայաստանը փորձում են ոչնչացնել, քանի դեռ չկա արդարություն, Հայկական շարժումը կլինի։ Իսկ Արցախինը դրա մի մասն է։ Ինչպես Արարատը ՝ խորհրդանիշը", - գրել է Իգիթյանը։

Ավելի վաղ Փաշինյանը լրագրողների հետ զրույցում հայտարարել էր, որ ղարաբաղյան/Արցախյան շարժումը Հայաստանում շարունակություն չի ունենալու:

Հիշեցնենք, որ Ղարաբաղյան շարժումը հասարակական շարժում է' ի պաշտպանություն Լեռնային Ղարաբաղի Ինքնավար Մարզի հայ բնակչության' մարզն Ադրբեջանական ԽՍՀ կազմից Հայկական ԽՍՀ կազմ հանձնելու պահանջի: Այն սկիզբ է առել անցյալ դարի 80-ականների վերջին և սկիզբ դրել Ադրբեջանական ԽՍՀ-ից Արցախի անջատմանը և անկախության հռչակմանը ։