Միրզոյանը մասնակցել է "Տարածաշրջանային համագործակցության մարտահրավերներն ու հնարավորությունները Հարավային Կովկասում" պանելային քննարկմանը

Արմինֆո. ՀՀ ԱԳ նախարար Արարատ Միրզոյանն Անթալիայի դիվանագիտական ֆորումի շրջանակում մասնակցել է "Տարածաշրջանային համագործակցության մարտահրավերներն ու հնարավորությունները Հարավային Կովկասում" թեմայով պանելային քննարկմանը՝ Ադրբեջանի և Վրաստանի արտաքին գործերի նախարարներ Ջեյհուն Բայրամովի և Մակի Բոչորիշվիլիի հետ ։

Միրզոյանն իր ելույթի և հարցուպատասխանի ընթացքում վերահաստատել է Հայաստանի հանձնառությունը խաղաղության օրակարգին, Ադրբեջանի հետ խաղաղության համաձայնագրի ստորագրումից հետո ԵԱՀԿ Մինսկի խումբը լուծարելու պատրաստակամությունը, հերթական անգամ ընդգծել է, որ ՀՀ սահմանադրության մեջ փոփոխություններ կատարելու հարցը բացառապես Հայաստանի ներքին հարցն է: Նա ևս մեկ անգամ ընդգծել է, որ Հայաստանի սահմանադրությունը պահանջներ չի պարունակում այլ պետությունների նկատմամբ, ինչ չի կարելի ասել Ադրբեջանի գլխավոր օրենքի մասին:

 Հայաստանի արտգործնախարարը նաև վերահաստատել է տարածաշրջանում տնտեսական և տրանսպորտային հաղորդակցություններն ապաշրջափակելու երկրի պատրաստակամությունը: Ընդ որում, նա ընդգծել է, որ Հայաստանը միայնակ չի կարող խաղաղություն կառուցել, որ ադրբեջանական կողմը նույնպես պետք է քաղաքական կամք դրսևորի այդ հարցում:

Իր հերթին՝ Բայրամովը, ավանդույթի համաձայն, հնչեցրել է Երևանի նկատմամբ պահանջների չափաբաժին՝ ԵԱՀԿ ՄԽ-ի լուծարման անհրաժեշտությունից մինչև Հայաստանի սահմանադրության փոփոխություն:

Իսկ Վրաստանի ԱԳ նախարարը ևս մեկ անգամ ընդգծել է Թբիլիսիի պատրաստակամությունը՝ աջակցելու Երևանին և Բաքվին տևական խաղաղության հասնելու համար: Բոչորիշվիլին եւս մեկ անգամ նշել է Հարավային Կովկասում տեւական խաղաղության հասնելու Թբիլիսիի ձգտումը, ինչը, նրա գնահատմամբ, օգուտ կբերի տարածաշրջանի բոլոր երկրներին: