ANCA. ԱՄՆ Կոնգրեսի Հայաստանի հարցերով զբաղվող խումբը ամերիկացի պաշտոնյաներին կոչ է արել նպաստել Բաքվում պահվող հայ կալանավորների ազատ արձակմանը

Արմինֆո. ԱՄՆ Կոնգրեսի Հայաստանի հարցերով զբաղվող խումբը, որը բաղկացած է 25 օրենսդիրներից, երկկուսակցական հզոր նամակ է հղել պետական քարտուղար Մարկո Ռուբիոյին և ազգային անվտանգության հարցերով խորհրդական Մայքլ Ուոլցին, որում պահանջվում է աջակցել Ադրբեջանում ապօրինի պահվող հայ կալանավորների ազատ արձակմանը: Բացի այդ, կոնգրեսականները կոչ են անում ամրապնդել ԱՄՆ քաղաքականությունը Հարավային Կովկասում ամերիկյան ներկայության ընդլայնման և Հայաստանի ինքնիշխանության ու անվտանգության պաշտպանության համատեքստում:

Ինչպես հաղորդում է Ամերիկայի Հայ դատի հանձնախումբը (ANCA), նամակը, որի համահեղինակներն են Ներկայացուցիչների պալատի հայկական խմբի ղեկավարներ Ֆրենկ Փալոնը, Դեւիդ Վալդաուն, Բրեդ Շերմանը եւ Գաս Բիլիրակիսը, ուղարկվել է Հայաստանի եւ Ադրբեջանի միջեւ խաղաղության համաձայնագրի նախագծի շուրջ բանակցությունների ավարտի մասին վերջին հայտարարությունների եւ Հայաստանի սահմանադրության փոփոխության ու ԵԱՀԿ Մինսկի խմբի լուծարման վերաբերյալ ադրբեջանական կողմի պահանջների ֆոնին:

Նշվում է, որ նամակում ԱՄՆ ղեկավարությանը կոչ է արվում վճռական մասնակցություն ցուցաբերել ադրբեջանական ագրեսիայի դադարեցման և Հարավային Կովկասում արդար և կայուն խաղաղության հասնելու ճանապարհին խոչընդոտների հաղթահարման գործում:

"Ամերիկայի Հայ դատի հանձնախումբը ողջունում է Կոնգրեսում շարունակվող երկկուսակցական ջանքերը ՝ հակազդելու ուժի սպառնալիքի ներքո Հայաստանին միակողմանի զիջումներ պարտադրելու Ադրբեջանի  քաղաքականությանը, ինչն ակնհայտորեն հանգեցնում է կեղծ խաղաղության:

Կոնգրեսում մեր դաշնակիցների և կոալիցիոն գործընկերների հետ կողք կողքի մենք պնդում ենք, որ կայուն և արդար խաղաղության հասնելուն ուղղված ցանկացած երկխոսություն պետք է երաշխավորի հայերի վերադարձն Արցախ: Բացի այդ, Ադրբեջանը պետք է դուրս բերի իր զորքերը Հայաստանի տարածքից։ Ավելին, պետք է պահպանվի Հայաստանի սահմանների նկատմամբ միջազգային վերահսկողությունը, ապահովվի հայ ռազմագերիների ազատ արձակումը, իսկ Արցախի հայկական քրիստոնեական ժառանգությունը պետք է պաշտպանված լինի։ Ընդ որում, պետք է կասեցվեն Հայաստանի սահմանադրության մեջ փոփոխություններ պարտադրելու Ադրբեջանի փորձերը, իսկ Սյունիքը պետք է պաշտպանված լինի՝ որպես Հայաստանի ինքնիշխան մաս", - այդ առնչությամբ հայտարարել է Ամերիկայի Հայ դատի հանձնախմբի գործադիր տնօրեն Արամ Համբարյանը ։