Վարդանյանի փաստաբանը Թրամփի վարչակազմին կոչ է արել ճնշում գործադրել Ալիևի նկատմամբ՝ հայ գերիների ազատ արձակման հարցում

Արմինֆո. Գերիների հարցը պետք է նախապայման դառնա, որպեսզի Հայաստանի և Ադրբեջանի միջև խաղաղության պայմանագիրը ստանա ԱՄՆ վարչակազմի վերջնական աջակցությունը։ Այդ մասին հայտարարել Է Վարդանյանի ընտանիքի փաստաբան, Վաշինգտոնից մարդու իրավունքների պաշտպանության հարցերով միջազգային փաստաբան Ջարեդ Գանսերը՝ CAN-ին (Catholic News Agency)։

"Մեզ ասվել է, որ նրանց ազատությունը պետք է նախապայման լինի, որպեսզի նախագահ Թրամփը վերջնական աջակցություն ցուցաբերի խաղաղության պայմանագրին։ Սա իսկապես կարևոր է, քանի որ մեր ամենամեծ մտավախությունը մնում է այն, որ խաղաղության գործընթացի շարունակումը ՝ առանց հայ քրիստոնյա գերիների հարցը լուծելու, կարող է հանգեցնել նրանց զոհաբերման", - նշել է նա, հիշեցնելով Թրամփի նախընտրական խոստումը՝ օգնել հայ գերիների վերադարձին։

Փաստաբանը նշել է, որ խաղաղությունն անհնար կլինի, քանի դեռ "բոլոր խնդիրները չեն բացահայտվել, համաձայնեցվել և ամբողջությամբ լուծվել խաղաղության պայմանագրի շրջանակներում": Նրա խոսքով ՝ "գերիների ազատ արձակումն առաջնահերթություն է ամերիկյան իշխանությունների համար", և Թրամփը դրա համար շատ բան կարող է անել:

"Խաղաղության պայմանագիրը, որը չլուծված է թողնում Լեռնային Ղարաբաղի ժողովրդի ապագան և հայ քրիստոնյա գերիների ազատ արձակումը, ապագա բռնկումների, տարաձայնությունների և, նույնիսկ, հնարավոր պատերազմի աղբյուր է", - վստահ է Գենսերը:

Փաստաբանը նաև ուշադրություն է հրավիրել այն հանգամանքի վրա, որ իր պաշտպանյալին, ով Հայ Առաքելական եկեղեցու հետևորդ է, թույլ չեն տվել իր մոտ Աստվածաշունչ ունենալ: Նրա ասելով՝ դա միայն ամրապնդում է այն փաստը, որ նրան եւ Լեռնային Ղարաբաղի մյուս առաջնորդներին հետապնդում են ոչ միայն "անկախ հանրապետությանը" նրանց մասնակցության, այլեւ քրիստոնյա լինելու պատճառով:

Այս ֆոնին Գենսերը հիշեցրել է Լեռնային Ղարաբաղում էթնիկ զտումներից հետո հայկական տաճարների և հուշարձանների ոչնչացման մասին: Նա չի ցանկացել նշել, թե ինչ կոնկրետ մեթոդներ պետք է կիրառել Ադրբեջանի նախագահ Իլհամ Ալիևի նկատմամբ ճնշում գործադրելու համար, թեև կոչ է արել Թրամփի վարչակազմին "ցնցել" Ադրբեջանի նախագահին:

"Բռնապետները քաղբանտարկյալներին ազատ են արձակում միայն այն ժամանակ, երբ նրանք ստիպված են դա անել։ Նրանք երբեք դա չեն անում մեծահոգությունից կամ մարդասիրական մղումներից դրդված։ Դա տեղի է ունենում միայն այն ժամանակ, երբ բռնապետը տեսնում է, որ քաղաքական բանտարկյալին կամ քաղբանտարկյալներին կալանքի տակ պահելն ավելի թանկ է նստում, քան՝ ազատ արձակելը", - ընդգծել Է իրավաբանը ։