Առողջապահության նախարարը վստահ է, որ 2026 թվին կառավարող ուժը կրկին կհաղթի

Արմինֆո.ՀՀ առողջապահության նախարար Անահիտ Ավանեսյանը համոզմունք է հայտնել, որ կառավարող ուժը ("Քաղաքացիական պայմանագիր" - ՔՊ) կրկին հաղթանակ կտանի 2026 թվականի ընտրություններում: Այդ մասին նա հայտարարել է լրագրողներին՝ ապրիլի 3-ին կայացած ճեպազրույցի ժամանակ։

Անդրադառնաալով հարցին, թե ինչի վրա է հիմնված նման վստահությունը, առողջապահության նախարարը նշել է, թե, նկատի առնելով Գյումրիում և Փարաքարում տեղի ունեցած ընտրությունների արդյունքում ՔՊ-ի համար ոչ բավարար արդյունքները, կառավարող ուժը հաշվի կառնի բոլոր նրբությունները և մանրամասն վերլուծություն կանի, որպեսզի պատրաստվի առաջիկա ընտրություններին: Ընդ որում, նա նշել է, որ Փարաքարում և Գյումրիում գրանցված արդյունքները խոսում են միայն այն մասին, որ ժողովրդավարությունը Հայաստանում դառնում է անշրջելի իրականություն:

"Բայց չեմ կիսում այն կարծիքը, թե իշխանությունը 2026 թվին կփոխվի, քանի որ ՔՊ-ն իրականացնում է հանրության տված խոստումները և տանում է դեպի քաղաքացիների կյանքի բարելավում", - ասել է նա, հայտարարելով, որ "Քաղաքացիական պայմանագիրը" 2026թ. ընտրություններում հաղթելու հավակնություններ ունի: 

Հիշեցնենք, որ մարտի 30-ին Շիրակի մարզի Գյումրի և Արմավիրի մարզի Փարաքար համայնքների ավագանու արտահերթ ընտրությունների արդյունքների նախնական հաշվարկներով՝ Գյումրիում առաջատարը  "Քաղաքացիական պայմանագիր" կուսակցությունն է, որը հավաքել է ձայների 35,47 տոկոսը, այնուհետև գալիս են Հայաստանի կոմունիստական կուսակցությունը (18,41 տոկոս) և "Մեր քաղաքը" դաշինքը (16,04 տոկոս): Թեև իշխող ուժի ներկայացուցիչը հավաքել է ամենաշատ ձայները, այնուամենայնիվ, նրա քաղաքական ուժը չի հաղթահարել քաղաքապետի միանձնյա ընտրության համար անհրաժեշտ 50+1 ձայն: Այսպիսով, եթե ընդդիմադիր ուժերը կոալիցիա կազմեն, Գյումրին կարող է ընդդիմադիր քաղաքապետ ունենալ։ Փարաքարում, նախնական տվյալներով, հաղթել է "Միասնություն" դաշինքի թեկնածու Վոլոդյա Գրիգորյանը՝ ստանալով ընտրողների ավելի քան 56 տոկոսի աջակցությունը: