Հայ արևելագետը նշել է ՀԱՊԿ-ից Հայաստանի դուրս գալու երկու սցենար

Արմինֆո. Հայաստանը կարող է հեռացվել ՀԱՊԿ-ից՝  ռազմական դաշինքի հանդեպ իր ֆինանսական պարտավորությունները չկատարելու պատճառով։ Երևանում լրագրողների հետ զրույցում նման կարծիք է հայտնել արևելագետ Սերգեյ Մելքոնյանը։

Փորձագետը փաստել է, որ այսօր ակնհայտ է Հայաստանի դիրքորոշումը ՀԱՊԿ-ում գտնվելու վերաբերյալ: "Կարող է գալ մի պահ, երբ Հայաստանն ընդհանրապես իրեն չնույնացնի այդ կազմակերպության հետ ։ Դե, իսկ մինչ այդ, նա դե ֆակտո սառեցրել է իր անդամակցությունը ՀԱՊԿ - ին, թեև դե յուրե դեռ այդ կազմակերպությունում է։ Սակայն իր ֆինանսական պարտավորությունների չկատարումը կարող է հանգեցնել մի իրավիճակի, երբ նրան ոչ իր կամքով ստիպեն հեռանալ այդ կազմակերպությունից", - կարծում է Մելքոնյանը։

Նրա խոսքով՝ կա նաև այդ կազմակերպությունից Հայաստանի դուրս գալու երկրորդ հավանական սցենարը։ Մելքոնյանն ուշադրություն է հրավիրել Ադրբեջանի ռազմատենչ հռետորաբանության ուժեղացման վրա։ "Եթե տեղի ունենա Ադրբեջանի հարձակում, ընդ որում, կարեւոր չէ, թե ինչ մասշտաբի, եւ ՀԱՊԿ-ը դրան որեւէ կերպ չարձագանքի, դա հնարավորությունների պատուհան կստեղծի այդ ռազմական դաշինքից Հայաստանի դե յուրե դուրս գալու համար։ Եվ այդ ժամանակ ֆինանսական պարտավորությունները կլինեն միայն այդ հարցի տեխնիկական կողմը", - նշել է փորձագետը։

Հարցին, թե ինչ հեռանկարներ է բացում Հայաստանի համար երկրի խորհրդարանի կողմից եվրոպական ձգտումների մասին օրենքի ընդունումը, Մելքոնյանը նշել է, որ՝ ոչ մի: "Այդ փաստաթուղթը որևէ կապ չունի ԵՄ-ին անդամակցելու կամ անդամակցության թեկնածուի կարգավիճակ ստանալու գործընթացի հետ։ Այդ օրենքը, իմ կարծիքով, ավելի ներքաղաքական բնույթ ունի՝ առաջիկա խորհրդարանական ընտրություններին ընդառաջ", - ասել է նա։

Մելքոնյանն ուշադրություն է հրավիրել այն հանգամանքի վրա, որ եվրոպական ոչ մի պետություն չի արձագանքել հայկական օրենսդիր մարմնի կողմից այդ փաստաթղթի ընդունմանը: Արևելագետը վստահ է, որ դա, նույնիսկ, խնդիրներ է ստեղծում Հայաստան-ԵՄ հարաբերություններում, քանի որ իմիտացիոն բնույթ ունի: "Առնվազն, հաջորդ տասը տարիներին Հայաստանը չի կարող դառնալ ԵՄ անդամ, թեկուզ, միայն տեխնիկական պատճառներով՝ որքան էլ գեղեցիկ խոսքեր ասեն։ Ավելին, ՀԱՊԿ-ից դուրս գալն ու ԵՄ-ին անդամակցությունը փոխկապակցված հարցեր չեն։ Բայց ՀԱՊԿ-ից Հայաստանի դուրս գալը կարող է նոր խնդիրներ ստեղծել երկրի համար", - կարծում է փորձագետը։ Միաժամանակ, նա վստահ է, որ Հայաստանի իշխանությունների օրակարգում Եվրամիությանն անդամակցում չկա։