Բրիտանացի պատգամավորները կառավարությունից պահանջում են ճնշում գործադրել Ադրբեջանի նկատմամբ՝ հայ բանտարկյալներին ազատ արձակելու համար

Արմինֆո. Բրիտանական խորհրդարանի անդամ Ջեսիկա Մորդենը մի խումբ քաղաքական գործիչների հետ դիմել է Մեծ Բրիտանիայի կառավարության նախարարներին՝ հայ բանտարկյալների հարցով:

Ինչպես հաղորդում է Free Armenian Hostages նախաձեռնությունը, նամակի հեղինակները, ի թիվս այլ առաջարկների, խնդրում են, որպեսզի հայ պատանդներին այցելեն Բաքվում Մեծ Բրիտանիայի դեսպանատան պաշտոնատար անձինք:

"Որպես Հայաստանի գծով APPG (All-Party Parliament Group for Armenia - Միջկուսակցական խորհրդարանական խումբ - խմբ.) նախագահ՝ իմ գործընկեր փոխնախագահների հետ միասին, այսօր նամակ ենք հղել Մեծ Բրիտանիայի կառավարության նախարարներին հայ գերիների հարցով", - գրել Է նա X ցանցում՝ կցելով նամակի պատճենը։

2025թ.ապրիլի 1-ին թվագրված փաստաթղթում, մասնավորապես, ասվում է. "Մենք ՝ Մեծ Բրիտանիայի խորհրդարանում Հայաստանի հարցով միջկուսակցական խորհրդարանական խմբի պաշտոնյաներս, խստորեն դատապարտում ենք Բաքվում 23 հայ բանտարկյալների շարունակական կալանավորումն ու դատավարությունները և կոչ ենք անում Մեծ Բրիտանիայի կառավարության նախարարներին ճնշում գործադրել Ադրբեջանի վրա ՝ նրանց ազատ արձակմանը հասնելու համար։ Մեծ մտահոգություն կա, այդ թվում՝ բանտարկյալների հարազատներից և Մեծ Բրիտանիայում սփյուռքից եկող լուրերի առնչությամբ՝ կապված բանտարկյալների անկախ իրավական աջակցության բացակայության, ֆիզիկական և հոգեբանական խոշտանգումների, ինչպես նաև միջազգային կազմակերպություններին և լրատվամիջոցների ներկայացուցիչներին դատավարություններին հետևելու արգելքի հետ։

Մենք նաև ահազանգ ենք հնչեցնում Բաքվում BBC News Azerbaijani և «Ամերիկայի Ձայնի» դադարեցումների մասին, ինչպես հաղորդվում է՝ Ադրբեջանի արտաքին գործերի նախարարության հրամանով, Ադրբեջանի իշխանությունների կողմից Կարմիր Խաչի միջազգային կոմիտեի գործունեության դադարեցման, ինչպես նաև ՄԱԿ-ի բազմաթիվ գործակալություններին երկրից արտաքսելու մասին հաղորդվող սպառնալիքների վերաբերյալ։

Բանտարկյալների ընտանիքների անդամները մեզ հայտնում են, որ նրանք գտնվում են գրեթե ամբողջական մեկուսացման մեջ և հազվադեպ են կապ հաստատում հարազատների հետ։ Մենք հատկապես մտահոգված ենք բանտարկյալներից մեկի՝ Ռուբեն Վարդանյանի առողջական վիճակով, որը մինչև վերջերս գրեթե մեկ ամիս հացադուլի մեջ էր։

Մենք խնդրում ենք նախարարներին քննարկել Բաքվում բրիտանական դեսպանության ներկայացուցիցների՝ 23 հայ բանտարկյալներին այցելելու հնարավորությունը։ Մենք նաև խնդրում ենք նախարարներին՝ հաստատակամորեն խնդրել Ադրբեջանին՝ թույլատրել Կարմիր Խաչի միջազգային կոմիտեի ներկայացուցիչներին վերադառնալ Ադրբեջան և այցելելու բանտարկյալներին՝ ստուգելու նրանց ինքնազգացողությունը, վերականգնել Բաքվում BBC News Azerbaijani  աշխատանքները, ինչպես նաև ապահովել դատավարությունների մանրազննին վերահսկողությունը և անհապաղ կերպով ազատ արձակել բոլոր հայ բանտարկյալներին՝ իբրև երկու երկրների միջև կայուն խաղաղության տանող ուղու գրավական":