"Հայաստան" խմբակցությունն ընդդիմադիր ուժերից ակնկալում է համախմբում, որպեսզի թույլ չտան Փաշինյանին իշխանությունը զավթել Գյումրիում

Արմինֆո. ԱԺ "Հայաստան" խմբակցությունն ակնկալում է, որ Գյումրիի ավագանու անցողիկ շեմը հաղթահարած ընդդիմադիր ուժերը կկարողանան համախմբվել քաղաքապետի ընդդիմադիր թեկնածուի շուրջ՝ դրանով իսկ տապալելով Հայաստանի՝ մեծությամբ երկրորդ քաղաքում իշխանությունը զավթելու ՀՀ վարչապետ Նիկոլ Փաշինյանի  ցանկացած փորձ:

Գյումրի քաղաքում և Փարաքար համայնքում ՏԻՄ ընտրությունների վերաբերյալ ԱԺ «Հայաստան» խմբակցության հայտարարությունում ասվում է. «Հայաստան» խմբակցությունն արձանագրում է, որ 2025 թվականի մարտի 30-ին Գյումրի քաղաքում և Փարաքար խոշորացված համայնքում մեր հայրենակիցները կատարեցին իրենց ընտրությունը, թույլ չտվեցին «Քաղաքացիական պայմանագիր» կուսակցությանը վերցնել իշխանությունը։

Այս երկու համայնքներում  էլ ընտրություններն արտահերթ էին, որովհետև Նիկոլ Փաշինյանը, ինչպես այլ ՏԻՄ-երում, անտեսելով քաղաքացիների նախորդ ընտրությունը, բռնազավթել էր իշխանությունը։

Այս անգամ էլ վարչակազմն անսահման օգտագործեց վարչական ռեսուրսը, ռեպրեսիվ մարմինների միջոցով բռնաճնշումների դիմեց ընդդիմադիր թեկնածուների դեմ, փորձեց վախի մթնոլորտում ուղղորդել ընտրողներին, բարձրաստիճան գրեթե բոլոր ՔՊ-ական պաշտոնյաներին գործուղեց այդ համայնքներ։

Ձախողումից հետո էլ երեսպաշտորեն հայտարարում են, թե իրենք ազատ, արդար ընտրությունների երաշխավոր են, քաղաքացու ընտրությունն իրենց համար օրենք է։

ՏԻՄ ընտրություններում քաղաքական ռեսուրսի այսպիսի չարաշահում երբեք չի եղել։

«Հայաստան» խմբակցությունը շնորհավորում է Փարաքար համայնքում առավելագույն ձայներ հավաքած «Միասնություն» դաշինքին։ Հուսանք՝ Գյումրիում անցողիկ շեմը հաղթահարած ընդդիմադիր ուժերը քաղաքապետ կընտրեն՝ ձախողելով Գյումրիում իշխանությունը զավթելու Փաշինյանի ցանկացած փորձ»։

Հիշեցնենք, որ մարտի 30-ին տեղի ունեցան Շիրակի մարզի Գյումրի և Արմավիրի մարզի Փարաքար համայնքների ավագանու արտահերթ ընտրություններ: Ըստ նախնական հաշվարկների՝ Գյումրիում առաջատարը "Քաղաքացիական պայմանագիր" կուսակցությունն է, որը հավաքել է ձայների 35,47 տոկոսը, Հայաստանի կոմունիստական կուսակցությունը՝ 18,41 տոկոս,  "Մեր քաղաքը" դաշինքը՝ 16,04 տոկոս: Թեև իշխող ուժի ներկայացուցիչը հավաքել է ամենաշատ ձայները, այնուամենայնիվ, նրա քաղաքական ուժը չի հաղթահարել քաղաքապետի միանձնյա ընտրության համար անհրաժեշտ 50+1 ձայնի շեմը: Այսպիսով, եթե ընդդիմադիր ուժերը կոալիցիա կազմեն, Գյումրին կարող է ընդդիմադիր քաղաքապետ ունենալ։ Փարաքարում, նախնական տվյալներով, հաղթել է "Միասնություն" դաշինքի թեկնածու Վոլոդյա Գրիգորյանը՝ ստանալով ընտրողների ավելի քան 56 տոկոսի աջակցությունը: