Ընդդիմադիր. Արցախը կայացած պետություն էր, քանի դեռ Նիկոլ Փաշինյանը չէր փոխել բանակցային գործընթացի տրամաբանությունը

Արմինֆո. Քանի դեռ ՀՀ վարչապետ Նիկոլ Փաշինյանը 2018 թվին չէր փոխել բանակցային գործընթացի տրամաբանությունը, Արցախը կայացած պետություն էր: Այդ մասին մարտի 28-ին լրագրողների հետ զրույցում հայտարարել է ԱԺ "Հայաստան" խմբակցության պատգամավոր Արթուր Խաչատրյանը, մեկնաբանելով Փաշինյանի այն հայտարարությունները, թե Հայաստանն այլեւս չպետք է ղեկավարվի Արցախյան շարժման գաղափարաբանությամբ"։

Այդ առնչությամբ Խաչատրյանը հիշեցրել է, որ 1991թ. դեկտեմբերի 2-ից հետո Արցախյան շարժումը նոր նշանակություն ստացավ և վերաճեց պետականության, իսկ Լեռնային Ղարաբաղի Հանրապետությունը, սահմանադրության փոփոխություններից հետո, վերանվանվեց Արցախի Հանրապետություն (ԼՂՀ - ն Արցախի Հանրապետություն վերանվանվեց 2017թ. համաժողովրդական հանրաքվեի արդյունքում-խմբ.): Այդ առնչությամբ ընդդիմադիրն ուշադրություն է հրավիրել այն հանգամանքի վրա, որ Արցախը պահպանել է իր պետականությունն այնքան ժամանակ, քանի դեռ իշխանության եկած Նիկոլ Փաշինյանը չորոշեց փոխել Արցախի բանակցային գործընթացի տրամաբանությունը և մերժեց հակամարտության կարգավորման վերաբերյալ ԵԱՀԿ Մինսկի խմբի համանախագահների վերջին առաջարկը:

Այնուհետև Խաչատրյանը հիշեցրել է, որ 2022 թվականից Հայաստանի վարչապետը փաստացի ճանաչել է Արցախի նկատմամբ Ադրբեջանի գերակայությունը։ Ընդ որում, դաշնակցականը վստահ է, որ մարտի 26-ին երկրի խորհրդարանում Հայաստանի վարչապետի անհավասարակշիռ պահվածքը խոսում է այն մասին, որ Ադրբեջանը Հայաստանին նոր պահանջներ է ներկայացրել: Նրա ասելով, ամենայն հավանականությամբ, խոսքն արդեն միայն Արցախի մասին չէ, քանի որ Հայաստանի գործող իշխանությունների զիջումները չեն դադարում:

"Ես չեմ բացառում, որ Ադրբեջանը նոր պահանջներ է ներկայացրել, օրինակ, Արցախյան պատերազմի մասնակիցների հանձնման մասով, և, հնարավոր է, նույնիսկ, ժամկետներ է նշել այդ պահանջների կատարման համար", - պարզաբանել է Խաչատրյանը։

Վերջում պատգամավորը համոզմունք է հայտնել, որ Ադրբեջանի նոր պահանջները կարող են վերաբերել նաև Հայաստանի սահմանադրության փոփոխությանը՝ մինչև 2026 թվականի ընտրությունները: