Շվեդ պատգամավորն անհեթեթ է համարել Հայաստանի կողմից պատերազմ սանձազերծելու մտադրության մասին Ադրբեջանի պնդումները

Արմինֆո. Շվեդիայի խորհրդարանի պատգամավոր Էրիկ Հելսբորնը անհեթեթ է անվանել ադրբեջանական կողմի պնդումները՝ Հայաստանի կողմից պատերազմ սանձազերծելու մտադրության մասին:

"Ադրբեջանական Caliber լրատվական կայքում կարդացի, որ Հայաստանը ծրագրում է հարձակվել Ադրբեջանի վրա։ Թեեւ այն ռեժիմի պաշտոնական ալիքը չէ, բայց պետք է հիշել, որ երկիրը բռնապետություն է, և  այն չունի ազատ, անկախ մամուլ: "Լրագրողներ առանց սահմանների" կազմակերպությունը "շատ լուրջ է համաարում իրավիճակը" ադրբեջանցի լրագրողների համար, իսկ Մամուլի ազատության ինդեքսում երկիրը զբաղեցնում է 164-րդ տեղը: Ուստի այդ հաղորդագրությունը կարելի է համարել ռեժիմի կողմից արտոնված։ Մեղադրանքն, իհարկե, միանգամայն անհեթեթ է", - գրել է Հելսբորնը Twitter-ի (X) իր էջում։

Պատգամավորի խոսքով, մինչ Բաքվի բռնապետությունը մշտապես օգտագործում է ռազմատենչ հռետորաբանություն, Երևանում ժողովրդավարական ճանապարհով ընտրված կառավարությունը փորձում է խաղաղ ճանապարհ գտնել առաջ շարժվելու համար:

"Իհարկե, Հայաստանն ամրապնդում և արդիականացնում է իր զինված ուժերը, բայց դա Ադրբեջանի ագրեսիայի արձագանքն է, և դա նշան չէ, որ նրանք հակամարտություն են փնտրում։ Ավելին, չնայած բանակի այս հզորացմանը, Հայաստանը շարունակում է զբաղեցնել միայն 91-րդ տեղը GlobalFirepower վարկանիշում, որը գնահատում է աշխարհի երկրների ռազմական հզորությունը: Մինչդեռ, Ադրբեջանն այդ ցուցակում զբաղեցնում է 60-րդ տեղը։ Այն, որ Հայաստանը կփորձի ներխուժել ռազմական առումով շատ ավելի ուժեղ Ադրբեջան, անիմաստ է", - հավելել է օրենսդիրը։

Այնուհետև պատգամավորն ուշադրություն է հրավիրել այն հանգամանքին, որ ադրբեջանական լրատվամիջոցը հարձակվում է նաև Հայաստանում ԵՄ առաքելության վրա, նրան մեղադրում են ադրբեջանական զորքերն և սահմանային դիրքերը լրտեսելու, այնուհետև Հայաստանին տեղեկատվություն փոխանցելու համար: "Սրանք մաքուր դավադրության տեսություններ են։ ԵՄ-ը ցանկանում էր առաքելություններ ունենալ սահմանի երկու կողմերում՝ էսկալացիան և ավելի մեծ բռնությունը կանխելու համար ։ Բայց մինչ ԵՄ-ին ողջունում էին Հայաստանում, Ադրբեջանը միշտ ասում էր "ոչ" ։ Ադրբեջանի վերաբերմունքը ԵՄ առաքելության նկատմամբ, թերևս, առավել ցայտուն կերպով պատկերել է ԵՄ - ում երկրի դեսպան Վագիֆ Սադիգովը, ով հրապարակել է X-ով զրահապատ դիպուկահար հրացանի լուսանկարը, ինչպես նաև կոչ է արել առաքելությանը հեռու մնալ Ադրբեջանի հետ սահմանից", - նշել է Հելսբորնը։

Նրա համոզմամբ՝ Հայաստանը ցանկանում է, որպեսզի աշխարհը տեսնի, թե ինչ է կատարվում տարածաշրջանում, Ադրբեջանը՝ ոչ։ Պատգամավորը վստահ է, որ դա շատ բան է ասում այն մասին, թե ով է սպառնում խաղաղությանը, և դա բնավ Հայաստանը չէ:

Միևնույն ժամանակ, նա վստահ է, որ այն պնդումները, թե, իբր, Հայաստանը պատրաստվում է պատերազմի, պետք է դիտարկել որպես նախազգուշացում Ադրբեջանին ագրեսիայի նախապատրաստելու մասին: «Վտանգն այն է, որ Ադրբեջանը ծրագրում է Հայաստանի կողմից բռնության մասին կեղծ հայտարարություններն օգտագործել սեփական բռնությունն արդարացնելու համար: Հոդվածի վերջում արտահայտությունը տագնապալի վերաբերմունք է նախանշում. "ողջ շինարարական տեխնիկան, որը ներկայումս գտնվում է Երևանում, կուղարկվի Եռաբլուր": Նրանց համար, ովքեր ծանոթ չեն Եռաբլուրին, Սա Հայաստանի զինվորական գերեզմանոցն է, որտեղ հանգչում են Ադրբեջանի դեմ նախորդ պատերազմներում ընկածները: Դժվար է մեկնաբանել այս հաղորդագրությունը որպես այլ բան, քան այն, որ նրանք պատրաստ են սպանել հազարավոր մարդկանց: Ադրբեջանը պետք է իմանա, որ Եվրոպայում ոչ ոք չի հավատում իրենց կեղծ պատմվածքին։ Եվ նոր զինված հակամարտություն սկսելը շատ վատ գաղափար կլիներ", - ամփոփել է Հելսբորնը։