Ամերիկացի քրիստոնյա առաջնորդների կոալիցիան Թրամփին կոչ է արել նպաստել Ադրբեջանում պահվող հայ գերիների ազատ արձակմանը

Արմինֆո. Ամերիկացի քրիստոնյա առաջնորդների կոալիցիան նամակ է հղել ԱՄՆ նախագահ Դոնալդ Թրամփին ՝ կոչ անելով վճռական գործողություններ ձեռնարկել Ադրբեջանի իշխանությունների կողմից պահվող 23 հայ պատանդների և մեկ ադրբեջանցի քրիստոնյա քաղբանտարկյալի ազատ արձակման ուղղությամբ: Այդ մասին հաղորդում է christiannewswire-ը։

Հիշեցվում է, որ ձերբակալվածների թվում է նաև Արցախի նախկին պետնախարար, բարերար Ռուբեն Վարդանյանը, ով շարունակում է մնալ ծայրահեղ ծանր վիճակում, քանի որ արդեն 23 օր շարունակվող հացադուլի հետևանքով նրա առողջական վիճակը սրընթաց վատանում է ադրբեջանական բանտում:

Իրենց ուղերձում քրիստոնյա առաջնորդները հղում են անում խոշտանգումների եւ շարունակվող բռնությունների մասին հավաստի հաղորդագրություններին, ընդգծելով իրենց համոզմունքը, որ նախագահ Թրամփի ղեկավարությունը յուրահատուկ վիճակում է այդ ճգնաժամը լուծելու համար, եւ  արագ գործողություններ են անհրաժեշտ քրիստոնյաների կյանքը փրկելու համար:

"Մենք կարծում ենք, որ դուք միակն է, ով կարող է փրկել այդ քրիստոնյա պատանդներին: Գրեթե երկու տարի առաջ Ադրբեջանը էթնիկ զտմամբ ավելի քան 120 հազար քրիստոնյա հայերի տեղահանեց իրենց նախնիների տներից, մինչդեռ, Բայդենի վարչակազմը հրաժարվեց միջոցներ ձեռնարկել: Այն ժամանակից ի վեր 23 քրիստոնյա հայ պատանդներ և մեկ ադրբեջանցի քրիստոնյա ենթարկվել են խոշտանգումների: Կարմիր խաչի միջազգային կոմիտեին, որը միակ կազմակերպությունն է, որին թույլատրվում է ստուգել նրանց բարեկեցությունը, վերջին օրերին հրամայվել է լքել երկիրը", - ասվում է նամակում: