Հայ փրկարարները հայտնաբերել են Արագած լեռան վրա ձնահյուսի տակ մնացած իսպանացի լեռնագնացի դին

Արմինֆո. Հայաստանի ՆԳՆ փրկարար ծառայությունը հաղորդել է մարտի 11-ին Արագած լեռան վրա ձնահյուսի տակ մնացած իսպանացի լեռնագնացի հայտնաբերման մասին:

ՆԳՆ ՓԾ հաղորդագրության համաձայն, ժամը 06։00-ի դրությամբ որոնողափրկարարական աշխատանքները մեկնարկել են։ Դեպքի վայր են մեկնել ՆԳՆ ՓԾ մարզային փրկարարական վարչության օպերատիվ խումբը, հրշեջ-փրկարարական ջոկատից մեկ մարտական հաշվարկ և մեկ օպերատիվ խումբ։

Որոնողափրկարարական աշխատանքներին ներգրավվել են 17 փրկարարական ծառայող, փրկարարական ուժերի վարչության հատուկ նշանակության փրկարարական աշխատանքների իրականացման կենտրոնի 13 փրկարարական ծառայող, Արագածի ՀԷԿ-ի մեկ աշխատակից և Ալպինիզմի և լեռնային տուրիզմի հայկական ֆեդերացիայից 4 ալպինիստ։Աշխատանքներին ներգրավվել է նաև «Արմենիան հելիքոփթերս» ընկերության մեկ ուղղաթիռ։

Ժամը 10։15-ին փրկարարները հայտնաբերել են որոնվող քաղաքացու դին։ Ժամը 13։17-ին փրկարարները երկու լեռնագնացի հետ համատեղ մոտ 3 կմ ոտքով դին մոտեցրել են թրթուրավոր ամենագնացին, այնուհետև ամենագնացով մոտ 5 կմ մոտեցրել են շտապօգնության ավտոմեքենային։