Աշխարհը չպետք է աչք փակի Ադրբեջանի հանցագործությունների վրա. Բրանդենբուրգի դարպասների մոտ ակցիա է անցկացվել՝ ի աջակցություն հայ ռազմագերիների

Արմինֆո. Իրավապաշտպան կազմակերպությունները, ակտիվիստները և մտահոգ քաղաքացիներն այսօր հավաքվել են Բրանդենբուրգի դարպասների մոտ ՝ պահանջելու անհապաղ ազատ արձակել Ադրբեջանում ապօրինի պահվող հայ քաղբանտարկյալներին:

Ինչպես հաղորդում է FreeArmenianHostages նախաձեռնությունը, Գերմանիայի հայերի կենտրոնական խորհրդի (Zentralrat der Armenier in Deutschland e.V.), Անհետացման սպառնալիքի տակ գտնվող ժողովուրդների պաշտպանության միության (GfbV), Գերմանիայի Թեոֆանու ակումբի, "Ճանաչումն ընդդեմ ցեղասպանության, հանուն միջազգային փոխըմբռնման" (Working Group Recognition- Against Genocide) աշխատանքային խմբի, Մարդու իրավունքների միջազգային միության (IGFM Internationale Gesellschaft fur Menschenrechte e. V.) և "Ազատ արձակեք հայ պատանդներին" քաղաքացիական շարժման կազմակերպած բողոքի ակցիայի մասնակիցները կոչ են արել եվրոպական առաջնորդներին անհապաղ միջոցներ ձեռնարկել Ադրբեջանում մարդու իրավունքների շարունակական խախտումների դեմ:

Նշանավոր իրավապաշտպաններ, այդ թվում՝ Գերմանիայի հայերի կենտրոնական խորհրդի (ZAD) նախագահ Ջոնաթան Սպանգենբերգը, ելույթ են ունեցել հավաքվածների առջեւ, ընդգծելով հայերի համակարգված հալածանքները և Ադրբեջանի կողմից քաղբանտարկյալներին որպես սակարկության միջոց օգտագործելը բանակցություններում: «Ձերբակալվածները, այդ թվում՝ Ռուբեն Վարդանյանն, ապրում են անմարդկային պայմաններում, հաղորդվում է խոշտանգումների և վատ վերաբերմունքի մասին։ Վարդանյանն այս պահին հացադուլի մեջ է, և նրա կյանքը մեծ վտանգի տակ է։ Մենք չենք կարող լռել»,- հայտարարել է Սպանգենբերգը։

Ցուցարարներն ընդգծել են, որ Ադրբեջանի գործողությունները խախտում են միջազգային իրավունքը, այդ թվում՝ ՄԱԿ-ի ցեղասպանության կանխարգելման մասին կոնվենցիան և Մարդու իրավունքների եվրոպական կոնվենցիան։ 

Ցուցարարները կոչ են արել Եվրամիությանը, Գերմանիային և Ֆրանսիային պատժամիջոցներ սահմանել Ադրբեջանի պաշտոնյաների դեմ. թիրախային պատժամիջոցներ այն անձանց և հաստատությունների նկատմամբ, որոնոք պատասխանատու են հայ բանտարկյալների ապօրինի կալանավորման և կտտանքների համար:

Բացի այդ,  նրանք պահանջել են բանտերի պայմանների միջազգային մշտադիտարկում. Ճնշում գործադրել Ադրբեջանի վրա՝ թույլ տալու ՄԱԿ Խոշտանգումների դեմ կոմիտեին և Կարմիր խաչի միջազգային կոմիտեին գնահատել բանտարկյալների նկատմամբ վերաբերմունքը:

Ավելին՝ պահանջել անհապաղ ազատ արձակել բոլոր հայ կալանավորներին, Ադրբեջանից պահանջել կատարել մարդու իրավունքների պաշտպանության միջազգային պարտավորությունները և ազատ արձակել քաղբանտարկյալներին առանց նախապայմանների:

Նրանք պահանջել են նաեւ հայկական մշակութային ժառանգության պահպանում. հետաքննել և կանխել ԼՂ-ում  հայկական մշակութային և կրոնական վայրերի հետագա ոչնչացումը, ինչպես նաեւ՝ ապահովել միջազգային պաշտպանության մեխանիզմները, որոնք թույլ են տալիս հայերին վերադառնալ իրենց հայրենիք:

Բողոքի ակցիայի բանախոսները դատապարտել են Եվրոպայի անգործությունը, ընդ որում, Սպանգենբերգը հիշեցրել է ցեղասպանությունը կանխելու և խոցելի համայնքներին պաշտպանելու Գերմանիայի պատմական պատասխանատվությունը: Նա քննադատել է կանցլեր Օլաֆ Շոլցի կողմից վճռական քայլերի ձախողումը և կոչ է արել պաշտոնական միջնորդություն ներկայացնել Միջազգային քրեական դատարան՝ ընդդեմ Ադրբեջանի նախագահ Իլհամ Ալիևի։

Ընդգծվում է, որ այս բողոքի ակցիան հետևում է Եվրոպական հանձնաժողովին և Ֆրանսիայի կառավարությանը իրավապաշտպան կազմակերպությունների կողմից շարունակվող դիվանագիտական ​​կոչերին: Չնայած ցեղասպանության վտանգի մասին ՄԱԿ-ի բազմաթիվ նախազգուշացումներին՝ բովանդակալից միջազգային գործողությունները դեռևս բացակայում են:

Իրավապաշտպան կազմակերպությունների կոալիցիան ծրագրում է հետագա ցույցեր ամբողջ Եվրոպայում: Այն պաշտոնական միջնորդություն կներկայացնի Եվրախորհրդարան՝ կոչ անելով անհապաղ պատժամիջոցներ կիրառել Ադրբեջանի դեմ: Բողոքի ակցիայի կազմակերպիչները նաև կոչ են արել եվրոպական երկրների քաղաքացիներին բարձրացնել իրազեկությունը և ճնշում գործադրել իրենց կառավարությունների վրա՝ պայքարելու մարդու իրավունքների այս կոպիտ խախտումների դեմ:

«Աշխարհը չպետք է աչք փակի Ադրբեջանի հանցագործությունների վրա: Բառերի ժամանակն անցել է. մեզ հիմա պետք են գործողություններ»,- ասել է GfbV-ի մարդու իրավունքների բաժնի ղեկավար Սառա Ռեյնկեն