Երուսաղեմի հայոց պատրիարքարանն Իսրայելի իշխանություններին մեղադրել է Հին քաղաքում հայկական ներկայությունը կրճատելու փորձի համար

Արմինֆո. Երուսաղեմի Հայոց պատրիարքարանը հրատապ հայտարարությամբ է հանդես եկել Երուսաղեմի քաղաքապետարանի կողմից իր պատմական ունեցվածքի բռնագրավման գործընթացի կապակցությամբ:

Պատրիարքարանի ֆեյսբուքյան հայտարարության մեջ նշվում է, որ պատրիարքարանը, փորձելով դադարեցնել անշարժ գույքի առգրավման գործընթացը, որը պատրիարքարանը պատկանել է դարեր շարունակ, վարչական միջնորդություն է ներկայացրել՝ դադարեցնելու գործընթացը, որն առնչվում է մունիցիպալ հարկի գծով վիճելի պարտքին: Նշվում է, որ գործով լսումները նշանակված են այս տարվա փետրվարի 24-ին:

"Եթե, Աստված մի արասցե, պատրիարքարանի միջնորդությունը մերժվի, Երուսաղեմի քաղաքապետարանը կբռնագրավի պատրիարքարանին պատկանող անշարժ գույքը եւ աճուրդի կհանի այն, որպեսզի բռնագանձի, իբր, վիճելի պարտքը, որը երբեք չի ապացուցվել դատական կարգով եւ մինչ օրս չի բռնագանձվել՝ սովորական պրակտիկայի համաձայն", - ասված է Երուսաղեմի հայոց պատրիարքարանի հայտարարության մեջ:

Նշվում է, որ միջնորդությունն ուղղված է պարտքերի հավաքագրման պաշտոնատար անձի գործողությունների դեմ, որը "որոշել է", որ պատրիարքարանը պարտք է  աստղաբաշխական գումար՝ հաշվի չառնելով հայցի վաղեմության ժամկետը եւ չտրամադրելով ենթադրյալ պարտքի հիմքի հստակ սահմանում:

"Բացի այդ, ենթադրյալ պարտքի զգալի մասը վերաբերում է այն գույքին, որը, փաստացի, վարձակալության է հանձնվել հենց Երուսաղեմի քաղաքապետարանին: Նույն քաղաքային ծառայողը հրաժարվում է վերանայել իր իսկ կողմից որոշված պարտքի վավերականությունը, վկայակոչելով պաշտոնական դատավարական հիմքերը, որ առարկությունների ներկայացման ժամկետը լրացել է", - ասվում է հայտարարության մեջ։

Հայտարարության մեջ նշվում է, որ եթե դատարանը մերժի միջնորդությունը, քաղաքապետարանին ոչ միայն կթույլատրվի անհապաղ վերականգնել գույքի բռնագրավումը որոշակի անշարժ գույքի դիմաց չվճարման պատճառով, այլև կստեղծվի վտանգավոր իրավական նախադեպ, որը կարող է օրինականացնել սեփականության իրավունքի բռնագրավումը և Իսրայելում քրիստոնեական կրոնական հաստատություններին և համայնքներին պատկանող ակտիվների հարկադիր լուծարումը:

"Դա շատ ավելի մեծ վնաս կհասցնի անշարժ գույքի սեփականատերերին, քան ենթադրյալ վիճարկվող պարտքերի գումարը: Որքան մեզ հայտնի է, Հայոց պատրիարքությունը միակ քրիստոնյա համայնքն է, որն ընտրվել է, և, հնարավոր է, ընտրվել է մուննիցիպալ հարկի գծով ենթադրյալ պարտքի նկատմամբ նման աննախադեպ և անշրջելի միջոցներ ձեռնարկելու համար:

Երուսաղեմի քաղաքապետարանի պահվածքն այս հարցում հատկապես անտեղի է, քանի որ նա նախաձեռնել է այս ագրեսիվ գործընթացը, չնայած այն հանգամանքին, որ քաղաքապետարանն ինքը պատրիարքարանին պարտք է միլիոնավոր շեկելի ժամկետանց վարձավճարներ: Այնուամենայնիվ, պատրիարքարանը ձեռնպահ է մնացել հարկադիր գանձման համար իրավական միջոցներ ձեռնարկելուց և փոխարենը երկարատև բանակցությունների մեջ է մտել քաղաքապետարանի հետ ՝ փորձելով լուծել պարտքը խաղաղ ճանապարհով",- ասվում է հայտարարության մեջ:

Երուսաղեմի հայոց պատրիարքարանն Իսրայելի իշխանություններին մեղադրել է կրոնական կազմակերպությունից անարդար, նպատակային և կեղտոտ հարկեր գանձելու համար, ինչը միտված է Սուրբ հողում եկեղեցու ներկայության կրճատմանը:

Պատրիարքարանը կոչ է արել Իսրայելի վարչապետ Բենյամին Նեթանյահուին, ներքին գործերի նախարար Մոշե Արբելին և կոմիտեի ղեկավար Ցախի Հանեգբիին անհապաղ սառեցնել քաղաքապետարանի կողմից ձեռնարկված բոլոր գործողությունները և վերսկսել բանակցությունները 2018 թվականի կառավարական հանձնաժողովի շրջանակներում ՝ ստեղծված իրավիճակը լուծելու համար:

Նկատենք, որ վերջին տարիներին Իսրայելի իշխանություններն ու վերաբնակները իրենց հարձակումների թիրախ են դարձրել Երուսաղեմի հայոց պատրիարքարանը։ Տարբեր պատրվակներով փորձ է արվում ուժով զավթել եկեղեցու գույքը Հին քաղաքոււմ։