Այսպես կոչված՝ "Զանգեզուրի միջանցքի" հարցը Հայաստանում չի լուծվելու. փորձագետ

Արմինֆո. Այսպես կոչված՝ "Զանգեզուրի միջանցքի" հարցը Հայաստանում չի լուծվելու։ Այս մասին ԱրմԻնֆո-ի թղթակցի հետ զրույցում հայտարարել է Սթենֆորդի համալսարանի պրոֆեսոր Արթուր Խաչիկյանը:

Նրա խոսքով՝ միանգամայն հնարավոր է, որ այդ հարցը լուծվի հօգուտ Թուրքիայի եւ Ադրբեջանի, քանի որ եւ Անկարան, եւ Բաքուն շատ ուժեղ դիվանագիտական դիրքեր ունեն ինչպես Մոսկվայում, այնպես էլ Վաշինգտոնում, ինչը Երեւանը. գործնականում, չունի: "Հայաստանը չունի ոչ դիվանագիտական կապեր, ոչ կշիռ՝ ոչ Ռուսաստանում, ոչ ԱՄՆ-ում։ Այդ պատճառով միանգամայն հնարավոր է, որ այդ հարցը լուծվի ոչ մեր օգտին", - նշել է փորձագետը։

Պատասխանելով Հայաստանի Սյունիքի մարզին սպառնացող վտանգների մասին հարցին, որն իր մեջ կրում է իրադարձությունների նման զարգացումը, փորձագետը հավելել է, որ մարզը, որով պետք է անցնի միջանցքը, վաղուց արդեն վտանգված է: "Դա կարող է հանգեցնել այն բանին, որ մենք ստիպված լինենք դուրս գալ մարզից, իսկ նրա տարածքը կարող է հանձնվել Ադրբեջանի և Թուրքիայի ոչ պաշտոնական կառավարմանը։ Չի բացառվում նաև այնտեղ այլ ուժերի տեղակայումը՝ համատեղ կառավարման ներքո, այդ թվում՝ Իրանի մասնակցությամբ։ Դե-յուրե դա կլինի Հայաստանի տարածք, բայց դե-ֆակտո՝ այլոց կառավարման ներքո։ Մի բան ակնհայտ է. դա որոշվելու է առանց մեր մասնակցության և ոչ մեր օգտին, քանի որ մենք, ըստ էության, սնանկացած, չկայացած պետություն ենք", - ասել է Խաչիկյանը։

Փորձագետն ընդգծել է, որ կայացած պետություն համարվելու համար անհրաժեշտ է ունենալ համապատասխան կրթական համակարգ, որակյալ կադրեր, վերնախավ, պետական գործիչներ, ռեսուրսներ, տնտեսություն, տեխնոլոգիաներ: "Մենք այդ ամենը չունենք", - ամփոփել է Սթենֆորդի համալսարանի պրոֆեսորը:

Հիշեցնենք, որ փետրվարի 12-ին լրագրողների հետ ճեպազրույցում ՀՀ Ազգային ժողովի նախագահ Ալեն Սիմոնյանը վերահաստատել էր, որ "Զանգեզուրի միջանցքն" անընդունելի է Հայաստանի համար և կարմիր գիծ է մնում երկրի իշխանությունների համար:

Մինչ այդ, ՀՀ վարչապետ Նիկոլ Փաշինյանը մամուլի ասուլիսի ժամանակ հայտարարել էր, որ Երևանը Բաքվից բանավոր պատասխան է ստացել նոյեմբերին հաղորդակցությունների ապաշրջափակման վերաբերյալ արված գրավոր առաջարկին: Նա նշել էր, որ կոռեկտ չի համարում բացահայտել Բաքվի պատասխանը և "չի ցանկանում հրապարակել նրբությունները՝  այնքան ժամանակ, քանի դեռ տեսնում է Ադրբեջանի կողմից իր առաջարկներն ընդունելու հավանականություն": Փաշինյանը նաև հայտարարել էր, որ Հայաստանը պատրաստ է Ադրբեջանին տրամադրել երկաթուղային հաղորդակցություններ դեպի Նախչըվան բեռնափոխադրումների համար: "Մենք Ադրբեջանին կոնկրետ առաջարկ ենք արել, լուծում, որը հաշվի է առնում և Հայաստանի դիրքորոշումը, և Ադրբեջանի դիրքորոշումը։ Մենք առաջարկել ենք, որպեսզի Ադրբեջանից երկաթուղային բեռնափոխադրումներ լինեն դեպի Նախիջևան և հակառակ ուղղությամբ ՝ Հայաստանի տարածքով, Մեղրիով, քանի որ Ադրբեջանի հետ երկաթուղու մյուս հատվածների վերականգնումը, նկատի ունեմ Տավուշում, մեծ ներդրումներ է պահանջում։ Բայց՝ նույն սկզբունքով.  Երասխից դեպի Մեղրի՝ Նախիջևանով", - պարզաբանել էր Հայաստանի վարչապետը։

Ավելի վաղ Ադրբեջանի նախագահ Իլհամ Ալիևը հայտարարել էր, որ Հայաստանը չպետք է խոչընդոտի Նախիջևանի Ինքնավար Հանրապետության և Ադրբեջանի միջև ցամաքային ուղիղ հաղորդակցության ստեղծմանը: "Ինչու՞ մենք պետք է այլ ճանապարհներով գնանք Ադրբեջանի անբաժանելի մաս կազմող Նախիջևան։ Մենք պետք է ուղիղ կապ ունենանք, և այդ կապը կասկածի տակ չի դնում Հայաստանի ինքնիշխանությունը", - ընդգծել էր Ադրբեջանի նախագահը։