Արմինֆո. Մինչ Հայաստանում քննարկվում է Ադրբեջանի դեմ միջազգային դատարաններ դիմելուց հրաժարվելու հնարավորությունը, Բաքուն նախօրեին հերթական հայցն է ուղարկել բնապահպանական հարցերի վերաբերյալ: Այդ մասին փետրվարի 13-ին Ազգային ժողովում ճեպազրույցի ժամանակ հայտարարել է "Հայաստան" խմբակցության պատգամավոր Գեղամ Մանուկյանը։
Նրա խոսքով՝ Ադրբեջանի կողմից Հայաստանի դեմ հերթական հայցի ներկայացումը տեղի է ունենում Բաքվի դեմ հայցերը հետ կանչելու հնարավորության մասին ՀՀ վարչապետ Նիկոլ Փաշինյանի հայտարարության ֆոնին:
Պատգամավորը հիշեցրել է նախօրեին ԱԺ-ում կառավարական ժամին Փաշինյանի արտահայտած խոսքերը, որ Հայաստանի և Ադրբեջանի միջև բանակցային գործընթացի փաստաթղթերի տակ դրված է ՀՀ նախագահի ստորագրությունը, որի հետ ինքն՝ անձամբ, որևէ առնչություն չունի: Այդ կապակցությամբ Մանուկյանը նշել է, որ 2019 թվականին Հայաստանի արտաքին գործերի նախարարը Զոհրաբ Մնացականյանն էր։ "Եվ եթե Փաշինյանը որևէ առնչություն չուներ ԵԱՀԿ Մինսկի խմբի այն փաստաթղթի հետ, որի տակ դրված էին Հայաստանի և Ադրբեջանի նախագահների ստորագրությունները, ապա ինչի՞ շուրջ էր այն ժամանակ Վաշինգտոնում տևական ժամանակ բանակցում ՀՀ արտգործնախարարը։ ԵԱՀԿ ՄԽ-ի հետ մի քանի փուլով տեղի են ունեցել հանդիպումներ և բանակցություններ, և հարց է առաջանում՝ ինչի՞ մասին էր խոսք գնում", - ընդգծել է ընդդիմադիրը։
Նա հավելել է, որ խորհրդարանական գործընկեր Արթուր Խաչատրյանն առաջիկայում հանրության դատին կներկայացնի Լեռնային Ղարաբաղի շուրջ բանակցային գործընթացի վերաբերյալ փաստաթղթերի փաթեթ, որը ներառում է 1300 էջ: