ԶՊՄԿ տարածքում հրազենի կիրառմամբ որևէ միջադեպ տեղի չի ունեցել. պարզաբանում

Արմինֆո.  Զանգեզուրի պղնձամոլիբդենային կոմբինատ ՓԲ ընկերության տարածքում հրազենի կիրառմամբ որևէ միջադեպ տեղի չի ունեցել։ Այդ մասին ասվում է ընկերության պարզաբանման մեջ՝ ԶՊՄԿ-ի աշխատակիցների միջև ծեծկռտուքի եւ կրակոցների վերաբերյալ հաղորդումների առնչությամբ:

«Ոստիկանության հայտնած տեղեկատվությունը՝ ԶՊՄԿ տարածքից դուրս տեղի ունեցած միջադեպի վերաբերյալ, Ընկերությունը մեկնաբանել չի կարող», - հավելել են ԶՊՄԿ-ում։

Ավելի վաղ Հայաստանի ներքին գործերի նախարարությունից ԱրմԻնֆո-ին հաղորդել էին, որ Քաջարանի պոչամբարի շրջանում ծեծկռտուք է տեղի ունեցել ԶՊՄԿ-ի աշխատակիցների միջև: ՆԳՆ-ում հավելել են, որ դեպքի վայր է մեկնել ոստիկանություն, իրավիճակի հետագա զարգացումները կասեցվել են: "Այս պահի դրությամբ ձերբակալվել է 8 մարդ", - ընդգծել են ՆԳՆ-ում:

Սոցիալական ցանցերի հայկական հատվածում տեղեկություններ են շրջանառվում, որ ծեծկռտուք է տեղի ունեցել ընկերության գործադուլավոր աշխատակիցների և գործադուլին դեմ արտահայտվողների միջև։

Հիշեցնենք, որ անցած շաբաթվա վերջից ԶՊՄԿ-ի աշխատակիցների մի մասը գործադուլ է հայտարարել և պահանջում են աշխատավարձերի 50 տոկոս բարձրացում: "ԶՊՄԿ" ՓԲԸ - ում այդ պահանջները գնահատել են անիրատեսական, իսկ գործադուլավորների գործողությունները՝ Աշխատանքային օրենսգրքի շրջանակներից դուրս:

Նշենք, որ արդեն երրորդ տարին անընդմեջ Հայաստանի 1000 խոշոր հարկատուների ցանկը գլխավորում է "Զանգեզուրի պղնձամոլիբդենային կոմբինատը": Ձեռնարկությունը 2024 թվականի համար պետական գանձարան է ուղղել շուրջ 102 մլրդ դրամ (տարեկան 44% աճով), որից 2,2 մլրդ դրամը ՝ մաքսատուրքեր, 30,2 մլրդ դրամը ՝ ուղղակի հարկեր (այդ թվում ՝ շահութահարկ, եկամտահարկ), 2,7 մլրդ դրամը ՝ անուղղակի հարկեր (այդ թվում ՝ ԱԱՀ, ակցիզային հարկ)։

Հիշեցնենք, որ նախորդ տարվա դեկտեմբերին ՀՀ վարչապետ Նիկոլ Փաշինյանը Facebook-ի իր էջից տեղեկացրել էր, որ ԶՊՄԿ-ն որպես կառավարության շահաբաժին պետական բյուջե է փոխանցել 33 միլիարդ 249 միլիոն դրամ: "Ուշադրություն դարձրեք, սա գումարած վճարված հարկերը որպես շահույթի մասնաբաժին, որովհետև 2021 թվականից կառավարությունը ԶՊՄԿ - ի բաժնետեր է, ինչպես խոստացել էի", - նշում էր վարչապետը:

"Զանգեզուրի պղնձամոլիբդենային կոմբինատ" ՓԲԸ-ն (Zangezur Copper Molybdenum Combine CJSC) (ԶՊՄԿ) Հայաստանի խոշորագույն հանքարդյունաբերական ընկերությունն է: Կոմբինատը շահագործում է Քաջարանի պղնձամոլիբդենային հանքավայրը։ Կոմբինատի հանքաքարով ապահովվածությունը կազմում է շուրջ 150 տարի։