Երևանի կոնյակի գործարանը ֆերմերներին խոստանում է մթերել ողջ բերքը

 Հաշվի առնելով խաղողի այս տարվա բարձր բերքատվությունը, որոշվել է մթերել խաղողի ողջ` 35 հազար տոննա բերքը, չնայած այն բանին, որ Երևանի կոնյակի գործարանր կարող էր սահմանափակվել 30 հազար տոննայով: Այս մասին սեպտեմբերի 7-ին մթերումների սեզոնի բացման կապակցությամբ հայտարարել է ԵԿԳ գործադիր տնօրեն Իգոր Առաքելյանը:

ԵԿԳ Արմավիրի մասնաճյուղում այսօր մեկնարկեցին խաղողի մթերումները, Այգավանի մասնաճյուղոմ մթերումները կմեկնարկեն սեպտեմբերի 8-ին, Բերդ քաղաքի մասնաճյուղում` սեպտեմբերի 14-ին: 1 կգ խաղողի գինը, Արմավիրի և Այգավանի մասնաճյուղերի համար սահմանվել է 150 դրամ, Տավուշի մասնաճյուղի համար` 140 դրամ: Մթերված խաղողի դիմաց գումարները ֆերմերներին կվճարվեն խաղողի հանձնումից հետո, 3-4 օրվա ընթացքում: ԵԿԳ հետ համագործակցող յուրաքանչյուր խաղողագործի տեղեկացվել է նրա կողմից հանձնվող խաղողի օրվա և քանակի մասին: Խաղողի մթերումներին ընկերությունը հատկացրել է ավելի քան 5 մլրդ.դրամ: Ինչպես նշել է ՀՀ գյուղատնտեսության նախարար Սերգո Կարապետյանը, այս տարի խաղողի բերքը կգերազանցի նախորդ տարվա ցուցանիշը 10-15%-ով:

ԵԿԳ գործադիր տնօրենի խոսքով, այս տարի ընկերությունը շարունակել է պարարտանյութերի տրամադրման անտոկոս վարկավորման ծրագիրը` 250 մլն.դրամ ծավալով: Նշված ծրագրի շրջանակներում ԵԿԳ հետ համագործակցող խաղողագործները կարող են ստանալ անհրաժեշտ բոլոր պարարտանյութերը, պարտքը մթերումների ընթացքում մարելու իրավունքով: Ինչպես նշել է Առաքելյանը, Տավուշի մարզում ԵԿԳ-ն սկսել է իրականացնել նաև ֆերմերների աջակցման ծրագիր, տրամադրելով նրանց ֆերտիլայզերներ (պարարտանյութեր - ֆոսֆոր, կալիում, ազոտ. Խմբ.), ավելի քան 15 մլն.դրամ ծավալով: Ծրագրի շրջանակներում 5 տարիների ընթացքում ակնկալվում է բերքատվության 40% աճ:

Ինչ վերաբերվում է հայկական կոնյակի իրացման արտաքին շուկաներին, ապա, ԵԿԳ գործադիր տնօրենի խոսքով, այս տարի ակնհայտ փոփոխություններ չեն լինի: «Ռուսաստանն ավանդաբար հանդիսանում է մեր հիմնական շուկան, որի մասնաբաժինը կազմում է ԵԿԳ կոնյակի ընդհանուր իրացման 75%-ը: Կային որոշակի դժվարություններ, բայց մեզ հաջոցվեց պահպանել առաջատարի դիրքերը ռուսաստանյան շուկայում` ապրանքի գները պահպանելու շնորհիվ: Արդյունքում, մենք արդարացրինք նաև մեր ֆերմերների ակնկալիքները, նրանց միայնակ չթողնելով իրենց պրոբլեմների հետ»,-հայտարարել է Առաքելյանը:

ԵԿԳ Արմավիրի մասնաճյուղում գյուղնախարարին ներկայացվեց թորման արտադրամասի նոր բաժանմունքը, որն արդեն հագեցված է 3  խումբ շարանտական տիպի թորման սարքերով, որոնց քանակը ապագայում նախատեսվում է հասցնել 8-ի: Ապարատներն արտադրված են հարյուրամյա փորձ ունեցող ֆրանսիական Շալվինյակ Գրուպ (Chalvignac Group) ընկերության  կողմից: Նոր արտադրամասի կառուցապատման և սարքավորումներով զինման աշխատանքների ընդհանուր ներդրումը կազմել է 1 635 մլն. ՀՀ դրամ: Թորման աշխատանքներն այստեղ կմեկնարկեն նոյեմբերի 1-ին: Ինչպես նշել են ԵԿԳ-ում, այս պահի դրությամբ նոր սարքավորումները  միտված են ոչ թե փոխարինել, այլ համալրել մասնաճյուղում առկա թորման հզորությունները:

Հիշեցնենք, որ Երևանի կոնյակի գործարանը՝ ԱՐԱՐԱՏ կոնյակների բացառիկ արտադրողը, 1887 թվականին հիմնադրված հայկական կոնյակագործության ավանդույթների հետնորդն է: ԵԿԳ-ն հանդիսանում է Հայաստանի Հանրապետության խոշոր հարկատուներից մեկը և խաղող մթերող ամենամեծ ընկերությունը: 1999 թվականին Երևանի կոնյակի գործարանը անդամակցել է ալկոհոլի համաշխարհային շուկայի համաառաջնորդ Պեռնո Ռիկար (Pernod Ricard) միջազգային խմբին, որը միավորում է այնպիսի ապրանքային նշաններ, ինչպիսիք են՝ Չիվասը (Chivas` շոտլանդական վիսկի), Աբսոլյուտը (Absolut` շվեդական օղի), Մարտելը (Martell` ֆրանսիական կոնյակ), Ջեյմսոնը (Jameson` իռլանդական վիսկի):