Գրոնո. ԵՄ-ն մտադիր չէ նոր բաժանարար գծեր ստեղծել Հարավային Կովկասում և մասնակցել "զրոյական գումարով խաղերի"

Արմինֆո.Ադրբեջանի և Հայաստանի միջև հարաբերությունների կարգավորման երկկողմ ուղին առանցքային էր անցած տարվա ընթացքում էական առաջընթացի հասնելու համար, առաջին հերթին ՝ խաղաղության պայմանագրի, սահմանազատման և սահմանագծման ու այլ հարցերում: Այս մասին Report-ի հետ հարցազրույցում հայտարարել է Հարավային Կովկասի եւ Վրաստանի ճգնաժամի հարցերով ԵՄ նոր հատուկ ներկայացուցիչ Մագդալենա Գրոնոն։

"Մենք բոլորս հիշում ենք Ադրբեջանի և Հայաստանի 2023 թվականի դեկտեմբերի 7-ի խորհրդանշական համատեղ հայտարարությունը, որի արդյունքում կողմերը պայմանավորվել են COP29-ի կազմակերպման և բանտարկյալների փոխադարձ ազատ արձակման մասին։

Այն ժամանակ Հայաստանն ու Ադրբեջանը նշել էին, որ կշարունակեն իրենց քննարկումները վստահության ամրապնդման լրացուցիչ միջոցների շուրջ և կոչ էին արել միջազգային հանրությանն աջակցել իրենց ջանքերին:

Հենց դա է իմ առաքելության համատեքստը. կողմերի հետ ուսումնասիրել, թե ինչպես ԵՄ-ը կարող է առավել արդյունավետ աջակցել Ադրբեջանի և Հայաստանի միջև հարաբերությունների կարգավորմանը և տարածաշրջանային ավելի լայն համագործակցությանը", - պարզաբանել է Գրոնոն։

Նրա խոսքով՝ Բրյուսելը սահմանել է մի քանի ոլորտ, հասկանալով, որ ԵՄ-ը պատրաստ է ավելին անել։ "Բաքվում և Երևանում մենք պայմանավորվել ենք, որ ԵՄ-ը կշարունակի աջակցել Ադրբեջանի և Հայաստանի միջև երկկողմ բանակցություններին՝ կենտրոնանալով կապի և հումանիտար հարցերի որոշակի ասպեկտների վրա, հատկապես, ականազերծման և անհետ կորածների խնդրի լուծման, ինչպես նաև տարածաշրջանային համագործակցության նախաձեռնությունների աջակցության վրա", - պարզաբանել է նա:

Անդրադառնալով տարածաշրջանում ԵՄ-ի գործունեության անհավասարակշռության մասին քննադատություններին՝ Գրոնոն նշել է, որ Եվրամիությունում միշտ ուշադիր լսում են ցանկացած քննադատություն կամ կարծիք և փորձում հասկանալ, թե որն է դրանց էությունը:

"Ձգտում ենք պարզել հնարավոր թյուրիմացությունները եւ ցրել ցանկացած հնարավոր ապատեղեկատվություն: Ես վճռականորեն մտադիր եմ գործել՝ խուսափելու համար ցանկացած հնարավոր մոլորությունից, վարել թափանցիկ, ազնիվ եւ մշտական երկխոսություն կողմերի հետ: Ինչպես գիտեք, իմ գրասենյակը ամեն օր շփվում է երկու երկրների տարբեր ներկայացուցիչների հետ: Մենք շփումներ ունենք կառավարություններում, քաղաքացիական հասարակության ներկայացուցիչների, տեղական փորձագետների և տեղերում աշխատող միջազգային կառույցների միջև։ Դա թույլ է տալիս ավելի ճշգրիտ պատկերացում կազմել իրավիճակի և տարբեր միտումների մասին", - պարզաբանել է եվրապաշտոնյան։

Նա հաղորդել է, որ իր այցի ընթացքում նաեւ մանրամասն քննարկել է Բաքվում, թե ինչպես վերակառուցել եւ վերսկսել ԵՄ-ի եւ Ադրբեջանի միջեւ քաղաքական երկխոսությունը՝ ամենաբարձր եւ մյուս բոլոր մակարդակներում: "Հետաքրքիր առաջարկներ լսեցի և փոխանցեցի Բրյուսել։ Մենք մտադիր ենք նոր եռանդով առաջ շարժվել մեր երկկողմ օրակարգում, ավելի լավ հասկանալով, թե որտեղ ենք գտնվում և ինչի ենք ուզում հասնել։ ԵՄ-Ադրբեջան հարաբերություններն, անշուշտ, չեն սահմանափակվում էներգետիկայի և անվտանգության հարցերով։

Նույն ոգով ԵՄ-Հայաստան հարաբերությունները ծավալուն են եւ, իհարկե, չեն սահմանափակվում մեր օժանդակությամբ ընթացիկ բարեփոխումներին, ժողովրդավարությանը եւ մարդու իրավունքներին: Մեր երկկողմ օրակարգերը շատ ավելի լայն են", - հավելել է Գրոնոն։

Պաշտոնյան նաև հավաստիացրել է, որ ԵՄ-ը մտադիր չէ նոր բաժանարար գծեր ստեղծել, մասնակցել "զրոյական գումարով խաղերի" կամ առաջ մղել "թաքնված օրակարգ" տարածաշրջանում:

"Ընդհակառակը, մենք այստեղ ենք Բաքվի և Երևանի խնդրանքով և մեր գործընկեր երկրներին՝ Հայաստանին և Ադրբեջանին օգնելու հստակ ցանկությամբ՝ առաջ շարժվել դեպի կայուն, անվտանգ և բարգավաճ ապագա ։ Այդ օգնությունը որոշվում է փոխգործակցության ծավալով և խորությամբ, որոնք պահանջում են Բաքուն և Երևանը։ ԵՄ-ը հաստատակամորեն հավատարիմ է այդ ռազմավարական տարածաշրջանին եւ գործընկերությանը ինչպես Ադրբեջանի, այնպես էլ Հայաստանի հետ ՝ որպես իրավահավասար գործընկերների", - ասել է ԵՄ հատուկ ներկայացուցիչը։