ԱԺԲ խորհուրդը ողջունում է Հայաստանում ԵՄ քաղաքացիական առաքելության երկարաձգման մասին Եվրամիության երկրների դեսպանների որոշումը

Արմինֆո. Ազգային-ժողովրդավարական բևեռի խորհուրդը ողջունում է Եվրամիության երկրների դեսպանների՝ Հայաստանում ԵՄ քաղաքացիական առաքելության մասին որոշումը, որով եվրոպացի դիտորդները կմնան Հայաստանի սահմանամերձ շրջաններում առնվազն ևս երկու տարի՝ մինչև 2027 թվականի փետրվարի 19-ը։

«Բևեռի խորհուրդը բարձր է գնահատում ԵՄ դիտորդական առաքելության գործունեությունը, որի ներդրումը Հայաստանի սահմանների անվտանգության պահպանության հարցում անգնահատելի է եղել վերջին երեք տարիներին։

Հուսով ենք, որ ԵՄ դիտորդների մանդատը կընդլայնվի և թվաքանակը կաճի՝ էլ ավելի արդյունավետ դարձնելով առաքելությունը», - ասվում է Ազգային-ժողովրդավարական բևեռի խորհրդի հայտարարությունում։

Ինչպես աավելի վաղ հաղորդել էր ԱրմԻնֆո-ն, Եվրամիության երկրների դեսպանները հունվարի 29-ին Բրյուսելում հավանություն են տվել Հայաստանում ԵՄ քաղաքացիական առաքելության մասին որոշմանը, որով եվրոպացի դիտորդները կմնան Հայաստանի սահմանամերձ շրջաններում ևս երկու տարի ՝ մինչև 2027 թվականի փետրվարի 19-ը։

Դիտորդների կազմն ու թվաքանակը, ըստ որոշման նախագծի, կմնա անփոփոխ՝ 165 միջազգային ու 44 հայաստանցի աշխատող:

Առաքելության դիտարկման գոտին, ըստ պաշտոնական հաղորդագրության, տարածվում է հայ - ադրբեջանական սահմանի ողջ երկայնքով, ներառյալ Նախիջևանի հատվածը։

Հիշեցնենք, որ 2023 թվականի հունվարի 23-ին ԵՄ խորհուրդը համաձայնել էր ձևավորել Եվրամիության նոր քաղաքացիական առաքելությունը Հայաստանում (EUMA)՝ անվտանգության և պաշտպանության ընդհանուր քաղաքականության  շրջանակում։

Հայաստանում ԵՄ քաղաքացիական առաքելության կազմում ընդգրկվել է մինչև 100 մասնագետ: Առաքելության աշխատանքի առաջին չորս ամիսների համար հատկացվել է ավելի քան 8 մլն եվրո։ EUMA-ի նախնական մանդատը նախատեսված էր երկու տարվա համար, նրա օպերատիվ շտաբը նշանակվել է Եղեգնաձորում:

Առաքելությունը սկսել է գործել 2023 թվականի փետրվարի 20-ին։ Նրա կազմում ընդգրկված են 8 ֆրանսիացի ժանդարմ և 15 ոստիկան Գերմանիայից։ Բացի այդ, 2023 թվականի դեկտեմբերի 11-ին ԵՄ ԱԳՆԽ նիստի արդյունքներով Եվրամիության արտաքին գործերի և անվտանգության քաղաքականության հարցերով գերագույն ներկայացուցիչ Ժոզեպ Բորելը հայտարարել էր առաքելության թվաքանակը 209 մարդու հասցնելու մտադրության մասին։