«Մենք կանք». Բաքվում Արցախի ռազմաքաղաքական ղեկավարների նկատմամբ իրականացվող շինծու դատական պրոցեսը հոգեբանական ահաբեկչություն է Հայաստանի Հանրապետության նկատմամբ

Արմինֆո. Արցախի նախկին ռազմաքաղաքական ղեկավարության նկատմամբ կեղծ մեղադրանքներն ու շինծու դատավարությունը մնալու են որպես ճնշման միջոց այնքան ժամանակ, քանի դեռ Հայաստանի իշխանությունները շարունակում են անտարբեր մնալ Ադրբեջանի անօրինությունների նկատմամբ: Այդ մասին ասվում է "Մենք ենք" քաղաքացիական նախաձեռնության հայտարարության մեջ՝  Արցախի նախկին ռազմաքաղաքական ղեկավարության և այլ պատանդների նկատմամբ ապօրինի դատաքննության առնչությամբհետ: ԱրմԻնֆո-ին տրամադրված հայտարարությունում ասվում է.

«Բաքվի դատական նիստերի դահլիճից հեռարձակվող կադրերն, ասես, վերաթարմացրին հասարակության հիշողությունը և գերիների, պահվող անձանց, Արցախի ռազմաքաղաքական ղեկավարության պատանդառության թեմայի շուրջ բուռն դիսկուրս ծավալելու առիթ տվեցին։ Մինչդեռ տարիուկես հայ գերիները հալածվում են ադրբեջանական «արդարադատության» կողմից։ Ակնհայտ է, որ տասնյակ հոդվածներ, որոնք «կարվել» են նրանց վրա, իրականում պատիժ են՝ արցախահայության ինքնորոշման իրավունքն իրացնելու համար։ Եվ ընդհանրապես, ամբողջ գործընթացը սեփական հանցանքները պարտակելու և ցեղասպան գործողությունները քողարկելու Ադրբեջանի անփառունակ փորձերն են։ Կեղծ մեղադրանքներն ու շինծու գործընթացը շարունակվելու են ցուցադրվել ու ճնշման միջոց հանդիսանալ այնքան ժամանակ, քանի դեռ ՀՀ իշխանությունները մնում են անհաղորդ Ադրբեջանի ապօրինությունների հանդեպ։

Միջազգային պրակտիկայում առայսօր էլ հայտնի օրինակներով՝ կողմերի միջև ցանկացած երկխոսություն սկսվում է գերիների ազատման խնդրով և շարունակություն ունենում հարցը լուծվելուց հետո։ Մեր պարագայում փաստը, կարծես, չի էլ արժևորվում։ Եվ զարմանալի չէ, երբ մասնավոր նախաձեռնություններին միջազգային կառույցները տարակուսանքով են արձագանքում՝ ակնարկելով Հայաստանի պետական մարմինների իներտությունը։

«Մենք կանք» քաղաղացիական նախաձեռնությունը դատապարտում է Ադրբեջանի կողմից իրականացվող շինծու դատական պրոցեսը գերիների, պահվող անձանց ու Արցախի ռազմաքաղաքական ղեկավարների նկատմամբ, որն իրականում հոգեբանական ահաբեկչություն է ՀՀ նկատմամբ՝ ուղղված նաև լրացուցիչ ճնշումներ գործադրելուն, հայ ժողովրդին նսեմացնելուն։

Մենք մեր զորակցությունն ենք հայտնում գերիների ազատ արձակմանն ուղղված պայքարի բոլոր արտահայտումներին և պահանջում՝

—ՀՀ իշխանություններից՝ անել հնարավորն ու անհնարինը գերեվարված մեր հայրենակիցների համար և օր առաջ նրանց փրկել Բաքվի դժոխային զնդաններից։

—ԵԱՀԿ առավելապես՝ ՄԽ անդամ երկրներից՝ հարգել տարիների ձեր իսկ աշատանքը բանակցային ողջ գործընթացում, որը միտված էր արցախյան հիմնախնդիրը կարգավորելուն, ինչպես նաև, մարդու անհատական ու հավաքական իրավունքների համատեքստում, ձայն բարձրացնել Ադրբեջանի ցցուն անօրինականությունների վերաբերյալ»։

Հիշեցնենք, որ հունվարի 17-ին դատավոր Զեյնալ Աղաևի նախագահությամբ Բաքվի ռազմական դատարանը քննել է Լեռնային Ղարաբաղի նախկին ղեկավարների վերաբերյալ "մեղադրական եզրակացությունը": Մեղադրյալների թվում են Լեռնային Ղարաբաղի երեք նախկին նախագահներ  Արկադի Ղուկասյանը, Բակո Սահակյանը և Արայիկ Հարությունյանը: Դատարանի առջև են կանգնել նաև նախկին արտգործնախարար Դավիթ Բաբայանը, ԱԺ նախագահ Դավիթ Իշխանյանը, պաշտպանության բանակի նախկին հրամանատար, գեներալ Լևոն Մնացականյանը, գեներալ Դավիթ Մանուկյանը և նախկին պետնախարար Ռուբեն Վարդանյանը:

Հունվարի 16-ին Վարդանյանը հանդես էր եկել հայտարարությամբ, որում պահանջել էր իրեն և իր փաստաբանին հնարավորություն տալ լիարժեք նախապատրաստվել պաշտպանությանը, վերացնել թույլ տրված բոլոր խախտումներն ու կեղծիքները, հրապարակային դարձնել իր և մյուս բոլոր մեղադրյալների նկատմամբ իրականացվող գործընթացը: "Ես պահանջում եմ հնարավորինս բաց գործընթաց ՝ միջազգային լրագրողների և հումանիտար կազմակերպությունների ներկայացուցիչների մասնակցությամբ ։ Համոզված եմ, որ միայն իրական դատավարությունը կօգնի քայլ առաջ կատարել մեր ժողովուրդների միջև նոր հարաբերություններ կառուցելու բարդ ճանապարհին", - ընդգծել էր նա։

Վերջում նա պահանջել էր իր գործը միավորել մյուս մեղադրյալների գործերի հետ։ "Իմ գործի 422 հատորից ավելի քան 400 հատորը ընդհանուր գործի դրվագներ են։ Իմ գործն առանձին վարույթում առանձնացնելը արհեստական և անհիմն որոշում է", - հավելել էր Վարդանյանը։