Փաշինյանն ԱԳՆ-ին հանձնարարել է գույքագրել Արցախի շուրջ բանակցությունների վերաբերյալ փաստաթղթերը

Արմինֆո. Վարչապետ Նիկոլ Փաշինյանն արտգործնախարարին հանձնարարել է գույքարել Արտգործնախարարությունում առկա բանակցային թղթերը, և փաթեթի հնարավոր հրապարակումը Հայաստանի պետական անվտանգության շահերի դիտանկյունից քննարկելուց և գնահատելուց հետո որոշում կկայացվի այն հրապարակել/չհրապարակելու մասին: Այդ մասին հաղորդել են ՀՀ վարչապետի աշխատակազմից՝ «Ազատության» հարցմանն ի պատասխան։

«Ազատությունը» անցած տարեվերջին Նիկոլ Փաշինյանին հարցրել էր, թե արդյոք պատրաստ է հրապարակել մինչև իր պաշտոնավորումը և նաև իր պաշտոնավարման ընթացքում ղարաբաղյան խնդրի կարգավորմանը վերաբերող պաշտոնական փաստաղթղթերը, որպեսզի հանրությունը առանց քաղաքական շահարկումների, կոնկրետ փաստերի հետ ծանոթանալով ինքը հետևություններ անի։

Այդպիսի կոչով հանդես էին եկել հանրային տարբեր գործիչներ։ Նախորդ տարեվերջին Նիկոլ Փաշինյանին նման կոչով դիմել էր նաև առաջին նախագահ Լևոն Տեր-Պետրոսյանը՝ բանավիճելու փոխարեն նրան առաջարկելով հրապարակել ղարաբաղյան բանակցություններին վերաբերող բոլոր փաստաթղթերը։

«Եթե, Նիկո՛լ, ցանկանում ես, որ հանրությունն իմանա ողջ ճշմարտությունը ղարաբաղյան խնդրի կարգավորման դիվանագիտական գործընթացի մասին, ապա առաջարկում եմ. քանի որ Արցախի կործանումից հետո այդ գործընթացի խորհրդապահությունը կորցրել է իր իմաստը, հրապարակել Մինսկի խմբի համանախագահների կողմից պաշտոնապես ներկայացված խաղաղության բոլոր (այդ թվում՝ 2019թ. հունիսի) պլանները և հայկական դիվանագիտության պաշտոնական պատասխանները դրանց։ Այ դա արդեն կլինի իսկական բանավեճ, հիմնված փաստերի վրա։ Իսկ եթե դա չանես, ևս մեկ անգամ կապացուցես, որ փախչում ես ճշմարտությունից և զբաղված ես պատմական պատասխանատվությունից փոքրոգիաբար խուսափելու գործով», - նշել էր առաջին նախագահը։

«Ազատության» հարցման պատասխանում վարչապետ Փաշինյանը միաժամանակ հորդորում է հենց նախկին նախագահներին հրապարակել այդ փաստաթղթերը. «Ակնհայտ է, որ երեք նախագահները իրենց ձեռքի տակ ունեն բանակցային բոլոր փաստաթղթերը, և եթե դրանցում կա իրենց ընթացիկ պնդումները հիմնավորող որևէ փաստ, անհասկանալի է, թե ինչու չեն հրապարակում։ Վարչապետ Փաշինյանը տարբեր ժամանակներում ունեցած իր հրապարակային ելույթներոմ բանավոր կերպով հրապարակել է բանակցային գործընթացի առանցքային դրվագները»։

Իսկ ամեն ինչ սկսվել էր այն բանից, որ 2024 թվականի դեկտեմբերի 23-ին Նիկոլ Փաշինյանը հայտարարեց, թե 1994 թվականից ի վեր, այսինքն, հրադադարից հետո, բանակցային գործընթացը եղել է Լեռնային Ղարաբաղն Ադրբեջանի կազմ վերադարձնելու շուրջ: «Այլ բովանդակության մասին նարատիվները Հայաստանի հանրապետությունում ներդրվել են բացառապես ներքաղաքական խնդիրների լուծման նպատակով: Այս համատեքստում ես մեծ սխալ եմ թույլ տվել՝ 2018 թվականին, երբ ծանոթանում էի բանակցությունների բովանդակությանը, ինքս ինձ չեմ խոստովանել վերը նշվածը (ձեզ հայտնի մոդելի իմ հայրենասիրությունը թույլ չի տվել դա անել) և, հետևաբար, այդ ամենը ժողովրդին չեմ բացատրել», - գրել էր Փաշինյանը սոցցանցում։

Հայաստանի վարչապետի այդ հայտարարություններին կոշտ էին արձագանքել ՀՀ  նախկին նախագահների գրասենյակներից, որոնց օրոք ընթանում էր բանակցային գործընթացը։ Ի պատասխան քննադատությունների՝ Փաշինյանը նախկին նախագահներին հրավիրել էր այդ հարցի շուրջ հրապարակային բանավեճի: Հրավերը երկու անգամ անտեսվել է ՀՀ նախկին ղեկավարների կողմից: