Ընդդիմադիր. Հայաստանում սպառազինությանն առնչվող խնդիրներն սկսվել են Նիկոլ Փաշինյանի իշխանության գալուց հետո

Արմինֆո. Սպառազինությանն առնչվող խնդիրը, որին բախվել է Հայաստանը, առաջացել է հենց Նիկոլ Փաշինյանի իշխանության գալուց հետո։ Այդ մասին դեկտեմբերի 26-ին Երեւանում կայացած մամուլի ասուլիսում հայտարարել է ընդդիմադիր "Պատիվ ունեմ" խմբակցության ղեկավար Հայկ Մամիջանյանը՝ ամփոփելով տարին։

Այդ առնչությամբ նա հիշեցրել է, որ մինչև Փաշինյանի գալը Հայաստանը հնարավորություն ուներ սպառազինություն ստանալ անգամ զեղչերով ։ Բացի այդ, ըստ նրա, աշխարհում այդ պահին կար ընդամենը երկու երկիր, որոնք ունեին "Իսկանդեր" հրթիռներ, որոնցից մեկը Հայաստանն էր: "Եթե անդրադառնանք փաստերին, ակնհայտ է դառնում, որ հենց Հայաստանի վարչապետի գալոււց հետո սկսվեցին երկիրը սպառազինությամբ ապահովելուն առնչվող խնդիրները", - արձանագրել է ընդդիմադիր խմբակցության ղեկավարը:

Ընդդիմադիրը հիշեցրել է, որ Փաշինյանն իշխանության գալուց հետո հայտարարել է բանակցությունների մեկնարկն իր զրոյական կետից, ուստի նրա համար կարևոր չէր, ինչ էին ասում կամ անում նրա նախորդները բանակցային գործընթացի շրջանակներում, առավել ևս՝ սպառազինությունների գնումների շուրջ պայմանավորվածությունների շրջանակում:

"Փաշինյանն իր գործողություններով Ադրբեջանին հնարավորություն տվեց ագրեսիա նախաձեռնել Արցախի և Հայաստանի նկատմամբ, և, չմոռանանք, թե կոնկրետ ինչպես կազմակերպվեց այդ պատերազմը։ Ես արդեն հայտարարել եմ Ազգային ժողովում, որ մենք հաստատել ենք սպառազինության գնման պլանը, ըստ որի, պետք է ձեռք բերեինք 2500 ԱԹՍ, որոնց մոտ կեսը պետք է մատակարարվեր մինչև 2020 թվականը", - հիշեցրել է Մամիջանյանը։

Սակայն, ըստ նրա, Փաշինյանը խզել է այդ պայմանավորվածությունը և փոխարենը ձեռք է բերել մի քանի միլիոն դոլար արժողությամբ կործանիչներ, որոնք պատերազմի ժամանակ այդպես էլ օդ չեն բարձրացել՝ մարտագլխիկների բացակայության պատճառով: "Հանուն այդ կործանիչների հետ սելֆիի նա 5000 կյանք է զոհաբերել", - ամփոփել է ընդդիմադիրը:

Հիշեցնենք, որ 2019 թվականին Մոսկվան և Երևանը չորս բազմաֆունկցիոնալ Սու-30ՍՄ կործանիչների գնման պայմանագիր էին կնքել, որոնք Հայաստանի զինված ուժերը ստացել էին արդեն 2020 թվականի առաջին կիսամյակում: Ընդ որում, կործանիչները գնվել են ներռուսաստանյան, այլ ոչ թե արտահանման գներով ։ Հավելենք, որ 2021 թվականի մարտին վարչապետ Նիկոլ Փաշինյանը հայտարարել էր, որ Սու-30ՍՄ կործանիչները ձեռք են բերվել 2020 թվականի մայիսին, և կառավարությունը, պարզապես, չի հասցրել դրանց համար հրթիռներ գնել։