Լևոն Տեր-Պետրոսյանը Փաշինյանին առաջարկել է հրապարակել արցախյան խաղաղ գործընթացին վերաբերող բոլոր փաստաթղթերը

Արմինֆո.Հայաստանի առաջին նախագահ Լեւոն Տեր-Պետրոսյանը պատասխանել է Լեռնային Ղարաբաղի հակամարտության գործընթացի շուրջ բանավեճի մասնակցելու վարչապետ Նիկոլ Փաշինյանի հրավերին:

ՀՀ առաջին նախագահը «Ֆեյսբուքի» իր էջում հրապարակել է հետևյալ տեքստը. «Ինչի՞ շուրջ բանավիճեմ քեզ հետ, երբ բանավեճի առարկան՝ հազարամյակների հայկական Արցախը, քո արկածախնդրության պատճառով այլեւս գոյություն չունի, եւ քեզ այլ բան չի մնում այս դառն իրողությունից մեր ժողովրդի ուշադրությունը շեղելու հուսահատ ճիգերից բացի։

Աղմկիր որքան ուզում ես, այս իրողությունն արդեն պատմական փաստ է, որն այլեւս ջնջել չի լինի։

Իսկ եթե, Նիկոլ, ցանկանում ես, որ հանրությունն իմանա ողջ ճշմարտությունը ղարաբաղյան խնդրի կարգավորման դիվանագիտական գործընթացի մասին, ապա առաջարկում եմ. քանի որ Արցախի կործանումից հետո այդ գործընթացի խորհրդապահությունը կորցրել է իր իմաստը, հրապարակել Մինսկի խմբի համանախագահների կողմից պաշտոնապես ներկայացված խաղաղության բոլոր (այդ թվում՝ 2019թ. հունիսի) պլանները եւ հայկական դիվանագիտության պաշտոնական պատասխանները դրանց։

Այ դա արդեն կլինի իսկական բանավեճ, հիմնված փաստերի վրա։ Իսկ եթե դա չանես, եւս մեկ անգամ կապացուցես, որ փախչում ես ճշմարտությունից եւ զբաղված ես պատմական պատասխանատվությունից փոքրոգիաբար խուսափելու գործով»։

Ավելի վաղ Նիկոլ Փաշինյանը հայտարարել էր, որ սկսած 1994 թվականից, այսինքն, հրադադարից հետո, բանակցային գործընթացն ընթացել է բացառապես Լեռնային Ղարաբաղն Ադրբեջանի կազմ վերադարձնելու շուրջ: Վարչապետի այդ հայտարարությանը կոշտ էին արձագանքել ՀՀ  նախկին նախագահների գրասենյակներից, որոնց օրոք ընթանում էր բանակցային գործընթացը։ Ի պատասխան քննադատությունների՝ Փաշինյանը նախկին նախագահներին հրավիրել էր այդ հարցի շուրջ հրապարակային բանավեճի: Հայաստանի երեք նախկին նախագահների գրասենյակներում հրաժարվել են հանրային բանավեճից՝ Փաշինյանին խորհուրդ տալով նայել համաշխարհային սարդոստայնին, որտեղ վաղուց բաց տիրույթում առկա է Լեռնային Ղարաբաղի հակամարտության շուրջ բանակցությունների ընթացքի և բովանդակության մասին ողջ տեղեկատվությունը:

Փաշինյանն էլ, չկարողանալով հանգստանալ, կոչ է արել Հայաստանի նախկին նախագահներին, այնուամենայնիվ, օգտվել բանավեճի իր առաջարկից, կամ էլ թոշակի անցնել և դադարել մեկնաբանել իր թեզերը։ Հավելենք, որ անկախ փորձագետներն արդեն ծաղրի առարկա են դարձրել վարչապետի այդ պնդումները՝ ավելի շուտ հռետորական հարց հնչեցնելով. "Այդ դեպքում ինչի՞ համար էր Արցախը Հայաստանին միացնելու Ղարաբաղյան շարժումը և պատերազմը, եթե 1990-ականների սկզբի հաղթական պատերազմից անմիջապես հետո հայկական իշխանությունները սկսել են բանակցել ԼՂՀ-ն ադրբեջանական կողմին հանձնելու շուրջ": Նրանց ասելով՝ ստացվում է, որ 30 տարի Ալիևների զույգը հրաժարվել է վերցնել Արցախը։