Ընդդիմադիր. Բաքվի բանտերում պահվող հայերը տառապում են իրենց հայրենասիրության համար

Արմինֆո. Ադրբեջանի իշխանությունը հայտարարել է, որ Արցախի նախկին ռազմաքաղաքական ղեկավարության գործն ուղարկված է դատարան, ինչը նշանակում է, որ Բաքվում ավարտվել է ստեղծագործական-քարոզչական նախապատրաստությունը, և առաջիկայում բազում տհաճ տեսարաններ են սպասվում: Այդպիսի կարծիք է հայտնել Հայաստանի Ազգային ժողովի «Պատիվ ոււնեմ» ընդդիմադիր խմբակցության պատգամաաավոր Տիգրան Աբրահամյանը:

«Բաքվի բանտերում գտնվող հայերը` որևէ մեկին ոչ հայտնի անուններից մինչև նախագահներ Բակո Սահակյան և Արկադի Ղուկասյան, այս պահին գտնվում են ապօրինի գերեվարման մեջ այն պատճառով, որ շատ էին սիրում իրենց հայրենիքը և իրենց ողջ կյանքը նվիրել են Արցախի պետականության կերտմանը, դրա ամրապնդմանն ու հայության շահերի պաշտպանությանը:

Գեներալներ Լևոն Մնացականյանն ու Դավիթ Մանուկյանը մի ամբողջ կյանք անցել են կյանքի ու մահի ճանապարհով` որպես առաքելություն մտքում և սրտում ունենալով հայրենիքի պաշտպանությունը:

Դավիթ Իշխանյանը կամավորականից, մանկավարժից մինչև պետական գործիչ` իր պարտքն է համարել, անձնական նվիրվածությամբ և հոգատարությամբ ծառայել արցախցուն ու Արցախին:

Դավիթ Բաբայանը բազում պատվիրակություններ ընդունել-ճանապարհով երբեք չի մտածել, որ մի օր Արցախը կլինի օկուպացված, իսկ հայի ազգանուն ունեցող անձինք հպարտությամբ կազդարարեն իր հայրենիքի ադրբեջանական լինելու մասին:

Ռուբեն Վարդանյանն էլ Արցախ տեղափոխվելիս, նույնիսկ իր ամենավատ երազներում, Արցախն այսպիսի կապանքներում չէր պատկերացնում:

Արայիկ Հարությունյանին հարցնելու, ասելու շատ բան կա, բայց ոչ մի հայի ճակատագիր չպետք է որոշվի թուրքերի քմահաճույքներով և նրա հետ կապված ցանկացած տեսարան նորմալ հայի համար չի կարող հաճելի լինել: Ազատությու´ն Բաքվի բանտում գտնվող բոլոր հայերին», - գրել է Աբրահամյանը՝ «Ֆեյսբուքի» իր էջում:

Հավելենք, որ նախօրեին ԱՀ գլխավոր դատախազությունը զեկուցել էր շինծու քրեական գործերով Բաքվում պատանդ պահվող 15 արցախցիների վերաբերյալ, այսպես կոչված, գործերը դատարան հանձնելու մասին։ Ադրբեջանցի դատախազները 2023 թվականի աշնանը Լեռնային Ղարաբաղի Հանրապետության դեմ ագրեսիայի ժամանակ գերեվարված արցախցիների նկատմամբ 1289 քրեական գործ են հարուցել, որոնք հետագայում միավորել են մեկ վարույթում։ Ուշագրավ է, որ ցուցակում չկա բարերար Ռուբեն Վարդանյանի անունը։ Վարդանյանի փաստաբանական թիմի համոզզմամբ՝ ադրբեջանական խամաճիկային արդարադատությունը հող է նախապատրաստում բարերարի ցմահ ազատազրկման համար։