Օկամպո. Հանուն Հայաստանի փրկության անհրաժեշտ է Արցախի իրադարձությունները որակել ցեղասպանություն

Արմինֆո.Հանուն  Հայաստանի փրկության կարևոր է ընդունել, որ Արցախի իրադարձությունները ցեղասպանություն են։ Այս մասին հայտարարել է Հաագայի Միջազգային քրեական դատարանի նախկին դատախազ Լուիս Մորենո Օկամպոն՝ "Ընդդեմ ցեղասպանության հանցագործության" 5-րդ գլոբալ ֆորումի ժամանակ իր ելույթում։

Նա նշել է, որ Հայաստանը բախվում է ցեղասպանության նոր ռիսկի։ Նրա խոսքով՝ Ադրբեջանը ստեղծում է այնպիսի պայմաններ, որոնք ուղղված են իրենցից տարբերվող խմբերի ոչնչացմանը: "Ադրբեջանի խորհրդարանի ներկայացուցիչները հայտարարել են, թե չկա ոչ մի Հայաստան, դա, այսպես կոչված, արևմտյան Ադրբեջան է։ Նման պնդում է հնչեցվում արդեն խորհրդարանի մակարդակով։ Այս համատեքստում Հայաստանի կողմից Հռոմի կանոնադրության վավերացումը մեծ նշանակություն ունի։ Ալիևը հասկանում է, որ ինքը կարող է դառնալ հաջորդը", - ընդգծել է Օկամպոն՝ հիշեցնելով միջազգային քրեական դատարանի կողմից Բենիամին Նեթանյահուի ձերբակալման օրդերների մասին։

Այս համատեքստում Օկամպոն ընդգծել է, որ կարևոր է օգտագործել "ցեղասպանություն" և "ցեղասպանության վտանգ" եզրույթները՝ ապագայում նման հանցագործությունները կանխելու համար: Նախկին դատախազը նաև նշել է, որ կվիճեր իրավաբանների հետ, ովքեր պնդում են, թե Արցախի իրադարձությունները ցեղասպանություն չեն: "Ցեղասպանություն է, նույնիսկ, այնպիսի պայմանների ստեղծումը, որոնց դեպքում մարդիկ սովի են մատնվում", - նշել է Օկամպոն:

Ընդ որում, նա պարզաբանել է, որ միջազգային իրավունքի շրջանակներում գոյություն ունի երկու պարտավորություն՝ պատիժ և կանխարգելում։ "Ինչ վերաբերում է պատժին, ապա Միջազգային քրեական դատարանի մասնակցությունն այս գործընթացին կարևոր է։ Անհրաժեշտ է միայն կատարել կատարված հանցագործությունների վերլուծություն։ Հայաստանի կողմից վավերացված Հռոմի կանոնադրությունը կարող է օգնել երկրին դիմել Միջազգային քրեական դատարան և ճնշում գործադրել Ադրբեջանի նկատմամբ", - նշել է նա։

Օկամպոն նաև նշել է այդ ոլորտում առկա այլ խնդիրներ: Նա հիշեցրել է, որ Իսրայելը, որն ինքն է տուժել Հոլոքոստից, այժմ Ադրբեջանին զենք է վաճառում, որն օգտագործվում է Հայաստանի դեմ: Այդ առնչությամբ նա ընդգծել է, որ այդ հարցերի շուրջ պետք է աշխատել և ուշադրություն դարձնել դրանց։ "Մենք գիտենք ցեղասպանության վտանգի մասին և պետք է հասկանանք, թե ինչ կարող ենք անել։ Այստեղ կա նոր դինամիկա, որին պետք է հետեւել", - ամփոփել է Օկամպոն։

Հիշեցնենք, որ դեկտեմբերի 12-13-ին Երևանում ընթանում է «Ընդդեմ ցեղասպանության հանցագործության» 5-րդ Գլոբալ ֆորումը՝ «Ցեղասպանության և այլ ոճրագործությունների նկատմամբ վաղ ազդարարման և վաղ արձագանքման միջազգային մեխանիզմների արդյունավետության ամրապնդումը» խորագրով: