ՌԴ ԱԳՆ. Ռուսաստանն աշխատանք է տանում Հարավային Կովկասի հարցով "3+3" հարթակը լիարժեք կազմակերպության վերածելու ուղղությամբ

Արմինֆո. Ռուսաստանն աշխատանք է տանում Հարավային Կովկասի հարցով "3+3" հարթակը լիարժեք կազմակերպության վերածելու ուղղությամբ։ Այդ մասին "Ռուսաստան - Հայաստան" երկրորդ հասարակական ֆորումի ժամանակ հայտարարել է ՌԴ փոխարտգործնախարար Միխայիլ Գալուզինը։

"Տարածաշրջանի բոլոր երկրների շահերի ներդաշնակեցման գործում կարևոր տեղ ենք հատկացնում  տարածաշրջանային համագործակցության "3+3" հարթակին։ Աշխատում ենք այն Հարավային Կովկասում փոխգործակցության լիարժեք կազմակերպության վերածելու ուղղությամբ", - նշել է փոխնախարարը։

Հիշեցնենք, որ "3+3" տարածաշրջանային հարթակի (Ադրբեջան, Հայաստան, Վրաստան՝ գումարած Ռուսաստան, Իրան, Թուրքիա) նախաձեռնողները դեռևս 2020 թվականի դեկտեմբերին Ադրբեջանի և Թուրքիայի նախագահներ Իլհամ Ալիևն ու Ռեջեփ Թայիփ Էրդողանն էին։ Գաղափարն անդրկովկասյան երեք հանրապետությունների և տարածաշրջանային երեք տերությունների ՝ Ռուսաստանի, Իրանի և Թուրքիայի մասնակցությամբ ինտեգրացիոն հարթակի ստեղծումն էր։ Ձևաչափի հիմնական նպատակը տրանսպորտային հաղորդակցությունների ապաշրջափակումն է, համագործակցության զարգացումը, այդ թվում ՝ տնտեսական, բայց, որ ամենագլխավորն է,  տարածաշրջանում առկա բոլոր խնդիրները պետք է կարգավորվեն տարածաշրջանի ներսում։ Դա թույլ կտար բացառել ուժի այլ կենտրոնների միջամտությունը տարածաշրջանի երկրների ներքին գործերին։