Ընդդիմադիր. Հայաստանի իշխանություններն ամեն կերպ նպաստում են պետական բնակարանային ծրագրին մասնակցող արցախցիների թվի կրճատմանը

Արմինֆո. Պարզվում է, որ կառավարությունը ներքին կարգով ձգում է այն արցախցիների` բնակարանային սերտիֆիկատներից օգտվելու իրավունքի իրացումը, ովքեր կարող են պետության նախատեսված գումարը կանխավճար մուծել և դրա հիման վրա վարկ վերցնել: Այդ մասին գրել է ընդդիմադիր "Պատիվ ունեմ" խմբակցության պատգամավոր Տիգրան Աբրահամյանը՝ «Ֆեյսբուքի» իր էջում:

«Պայմանական, եթե 4 հոգանոց ընտանիք է և բնակարան է ցանկանում գնել Երևանում, ապա նրան տրվում է 12 մլն դրամ` սերտիֆիկատի ձևով:

Այս պայմաններում, բնականաբար, ընտանիքը պետք է հավելյալ հիպոթեքային վարկի տակ մտնի, որտեղ Երևանի դեպքում, մինչև 2025-ի հունվարի 1-ը, գործում է տոկոսադրույքի վերադարձի դրույթը:

Սակայն ինչպես ինձ հավաստիացրեցին այս ծրագրի շահառուները, այս ծրագրով կառավարության հետ աշխատող բանկերը, «վերևից» իջեցված հրահանգով, ամեն ինչ անում են, որ մարդիկ չկարողանան այս տարի ձևակերպել վարկը և հետագա տարիներին չօգտվեն տոկոսադրույքի գումարների հետ վերադարձից:

Ես տեղյակ չեմ` կա՞ն շահառուներ, որոնց վարկավորել են, սակայն ինձ դիմել են մարդիկ, որոնց դեպքում, այդ հիմքով խնդիր կա, ենթադրաբար այդ հանգամանքը տարածվում է շատերի վրա կամ բոլորի (փորձում եմ պարզել):

Կարծում եմ, որ սրանով է պայմանավորված, որ այն օնլայն հարթակը, որը գործում է սերտիֆիկատների դիմելու համար, շատ դեպքերում, սահմանված ժամկետում չի պատասխանում շահառուների դիմումներին (ես էլ եմ այդպիսի ահազանգ ստացել):

Այսինքն, գործընթացը ձգում են, որպեսզի Երևանում բնակարան գնողների դեպքում` անհնարին դարձվի տոկոսադրույքի հետ վերադարձի գումարներից օգտվելու հնարավորությունը և, այնպես են պրոցեսը տանելու, որ յուրաքանչյուր տարվա ընթացքում, սահմանափակ թվով ընտանիքներ օգտվեն ծրագրից:

Առանց այդ էլ կառավարության այս ծրագիրը բազմաթիվ խնդիրներ էր ստեղծել Արցախից բռնի տեղահանվածների համար, հիմա էլ լրացուցիչ արհեստական խոչունդոտներ:

Երբ որ սրան էլ գումարում ես հաջորդ տարվանից արցախցիների համար նախատեսված սոցիալական ծրագրի կրճատումները, ապա սարսափելի իրավիճակն ամբողջական է դառնում», - գրել է պատգամավորը:

Նշենք, որ հունվարին ՀՀ Ազգային ժողովի լիագումար նիստում ընդունվել են Հարկային օրենսգրքում կատարված փոփոխությունները, որոնց համաձայն, ծրագրի շահառուները, որոնք հիփոթեքային վարկեր են ներգրավել այն շենքերում, որոնց կառուցման թույլտվությունը տրվել է 2022 թվականի հունվարի 1-ից հետո, եկամտահարկ կստանան միայն մինչեւ 2025 թվականը:

Ընդ որում, ՀՀ ֆինանսների նախարարի տեղակալ Արման Պողոսյանը երկրի օրենսդիր մարմնում ներկայացնելով այդ ծրագրերը, տեղեկացրել էր, որ պետությունը մի շարք դեպքերում կարող է վաղաժամկետ ընդհատել Երևանում բնակարանների գնորդների հետ եկամտային հարկի վերադարձի մասին համաձայնագիրը: Ըստ օրինագծի ՝ առաջնային շուկայում հիփոթեքի դիմաց բնակարանների գնորդներին հասանելիք հարկի վերադարձը պետք է չեղյալ հայտարարվի 2027 թվականի հունվարի 1-ից՝ Երեւանին սահմանակից մարզերում (Արարատ, Արմավիր, Կոտայք, Արագածոտն), իսկ 2029 թվականի հունվարի 1 - ից ՝ մնացած մարզերում ։ Երևանի համար այս արտոնությունն արդեն սկսել է փուլ առ փուլ չեղարկվել. 2022 թվականի հուլիսի 1-ից այն դադարել է գործել Երևանի 1 - ին գոտում, կես տարի անց ՝ երկրորդ, ևս կես տարի անց, այսինքն, 2023 թվականի հուլիսի 1-ից  երրորդ գոտում, իսկ 2025 թվականից կդադարի գործել ամբողջ մայրաքաղաքում ։