Գևորգ Պապոյան. Մենք ուզում ենք Գյումրիում նշանակել այնպիսի մարդու, ում ուզում են տեսնել գյումրեցիները

Արմինֆո.  Ցավոք, հաճախ ենք նկատում, որ մեր օրենսդրությունն ի վիճակի չէ պատասխանել բոլոր հարցերին ու իրավիճակներին, և Գյումրիում ստեղծված իրավիճակում ստիպված ենք քաղաքի ղեկավարի ժամանակավոր պաշտոնակատար նշանակել: Այդ մասին նոյեմբերի 27-ին լրագրողների հետ զրույցում հայտարարել է ՀՀ էկոնոմիկայի նախարար Գեւորգ Պապոյանը։

Այս առումով նա ընդգծել է, որ օրենսդրական փոփոխությունների անհրաժեշտություն կա՝ այդ գործընթացն իրականացնելու համար։ "Քանի որ նման հնարավորություն չկա, եթե փոփոխություններ չլինեն, եւ կստացվի, որ քաղաքը կմնա առանց կառավարման", - ասել է տնտեսական գերատեսչության ղեկավարը:

Ընդ որում, Պապոյանն ընդգծել է, որ իշխանությունները ցանկանում են ժամանակավոր պաշտոնակատար նշանակել այնպիսի մարդու, ում ցանկանում են տեսնել գյումրեցիներն իրենց քաղաքի ղեկավար: Առանց մանրամասներ բացահայտելու՝ նա նշել է, որ գյումրեցիներն իրավունք կունենան իրենց կարծիքն արտահայտելու: Լրագրողների առարկությանը, թե համապատասխան մեխանիզմ չկա, նախարարն ընդգծել է, որ առաջիկայում մեխանիզմների մասին հայտնի կդառնա:

Գերատեսչության ղեկավարը նշել է, որ վարչապետը կնշանակի մի մարդու, ով, բնականաբար, համերաշխ կլինի կառավարող կուսակցության հետ, բայց, միևնույն ժամանակ, նրա ասելով, այդ մարդը պետք է անցնի ընտրական փուլ և նախընտրելի լինի գյումրեցիների համար:

Ավելի վաղ Գյումրիում հաղթած ուժը, ինչպես նշել է Պապոյանը, անպատասխանատվություն է դրսեւորել քաղաքի և նրա բնակիչների նկատմամբ: "Այդ պատճառով գյումրեցիները պետք է նորից գնան ընտրատեղամաս և ընտրեն իրենց նոր ղեկավարին։ Ողջ գործընթացը մենք պետք է վերադարձնենք Գյումրի, գյումրեցիները կորոշեն", - ասել է նա։

Հիշեցնենք, որ հոկտեմբերի 28-ին Գյումրիի քաղաքապետ Վարդգես Սամսոնյանը հրաժարական էր տվել՝ այն բանից հետո, երբ քրեական գործ էր հարուցվել դաշինքի հիմնադիր, նախկին քաղաքապետ Սամվել Բալասանյանի դեմ, ում մեղադրում են հայտնի "Սև բերդի" շրջակայքի հողատարածքներն ապօրինի օտարելու համար: Միաժամանակ, հրաժարական են տվել նաև "Բալասանյան" դաշինքից ավագանու անդամները։ Գյումրու քաղաքապետի ՔՊ թեկնածուն պատգամավոր Կարեն Սարուխանյանն է, ով նախկինում զբաղեցնում էր Շիրակի մարզպետի պաշտոնը: Նոյեմբերի 8-ին Գյումրու նոր քաղաքապետի ընտրության ավագանու նիստը տապալվել է քվորում չլինելու պատճառով:

Օրերս Գյումրու ավագանու "Քաղաքացիական պայմանագիր" խմբակցության ղեկավար Քնարիկ Հարությունյանը հավաստիացրել է, որ ՔՊ-ն Գյումրիում իշխանությունը զավթելու նպատակ չի հետապնդում, և Գյումրիում որոշումները կայացնում են գյումրեցիները: Նա հիշեցրել է, որ 2021 թվականի Գյումրու ՏԻՄ ընտրություններում "Քաղաքացիական պայմանագիր" կուսակցությունը ընտրությունների արդյունքներով զբաղեցրել է 2-րդ տեղը: Սակայն "Բալասանյան" դաշինքի հետ հետագա համագործակցությունը չի ստացվել, և ՔՊ-ն խզել է կոալիցիոն համագործակցության հուշագիրը։

Մինչդեռ, ըստ ԶԼՄ-ների, "Քաղաքացիական պայմանագիրը" մտադիր է Գյումրիում իշխանությունը զավթել քաղաքապետի ընտրություններում առաջադրված "ժողովրդավարություն, օրենք, կարգապահություն" եւ "Հանրապետություն" կուսակցությունների ղեկավարներ Վարդան Ղուկասյանի եւ Արամ Սարգսյանի օգնությամբ, այդպիսով կրկնելով "երեւանյան սցենարը" եւ իր ձեռքը վերցնելով քաղաքի կառավարումը՝ այլ կուսակցությունների հետ միասին: