Ցուցուլյան. Համաշխարհային բանկի աջակցության ծրագրերը զարգացնում են Հայաստանի Փրկարար ծառայության կարողությունները

Արմինֆո. ՆԳՆ Փրկարար ծառայության տնօրեն-ՆԳ նախարարի տեղակալ Կամո Ցուցուլյանն ընդունել է Համաշխարհային բանկի Հայաստանի գծով ավագ տնտեսագետ Լեա Հաքիմի գլխավորած պատվիրակությանը, որի կազմում էին ավագ տնտեսագետ Արմինե Մանուկյանը, տնտեսագետ Լիքիչ Մոթային, քաղաքաշինության գծով մասնագետ Նորա Միրզոյանը։ Առցանց տարբերակով միացել է նաև աղետների ռիսկի կառավարման ավագ մասնագետ Թավաձվա Դուբեն։
Հանդիպմանը մասնակցել է ՓԾ տնօրենի տեղակալ Տիգրան Պետրոսյանը։

ՆԳՆ Փրկարար ծառայության հաղորդագրության համաձայն, Կամո Ցուցուլյանն իր խոսքում նշել է, որ Բանկի կողմից իրականացված ծրագրերով աջակցությունը մեծապես նպաստել է Փրկարար ծառայության կարողությունների զարգացմանը։ Նա ընդգծել է, որ այս հանդիպումից ակնկալում է համագործակցության ամրապնդման և ընդլայնման հնարավորություններ։ 

Լեա Հաքիմը շնորհակալություն հայտնելով ընդունելության համար՝ նշել է, որ այցի նպատակն է «Զարգացման քաղաքական գործառնություն» ծրագրի շրջանակում քննարկել աղետների ռիսկի կառավարման հետ կապված բարեփոխումները։ Նա կարևորել է մասնավորապես այն բարեփոխումները, որոնք հնարավորություն կտան առավել արդյունավետ դիմակայել կլիմայական փոփոխությունների առաջացրած մարտահրավերներին՝ միաժամանակ ամրապնդելով երկրի կարողությունները ծայրահեղ կլիմայական երևույթներին դիմակայելու համար։

ՆԳՆ փրկարար ծառայության տնօրենը ներկայացրել է բարեփոխումների ընթացքի վերաբերյալ իր դիտարկումները և, որպես առաջնահերթություն, ներկայացրել այն խնդիրները, որոնք կապված են ջոկատների շենքային պայմանների բարելավման, նորարարական տեխնոլոգիաներով ու մեթոդներով վերազինման, ինչպես նաև աղետների ռիսկերի կառավարման և նվազեցման միջոցառումների կիրարկման հետ։ 

Նա մասնավորապես շեշտել է, որ այդ բարեփոխումները խիստ կարևոր են ծառայությունների արդյունավետությունը բարձրացնելու և բնական աղետների կանխարգելման ոլորտում երկրի պատրաստականությունն ապահովելու համար։

Քննարկման ընթացքում մասնակիցներն անդրադարձել են նաև միասնական կառավարման կենտրոնի ստեղծման՝ արագ արձագանքման և ազդարարման համակարգերի կատարելագործման, ինչպես նաև աղետների ռիսկերի կառավարման համակարգի զարգացման հարցերին։ Նշվել է, որ նման համակարգերի բարելավումն օժանդակելու է ռիսկերի կառավարման ամբողջականությանը և արդյունավետությանը՝ նպաստելով Հայաստանի կայուն զարգացմանն ու դիմակայունության բարձրացմանը:

Ներկայումս Համաշխարհային բանկը Հայաստանում ֆինանսավորում է 500 մլն դոլար ընդհանուր գումարի 10 նախագիծ: Հայաստանում աշխատելու պահից (1992թ.) ի  վեր ՀԲ-ը պետությանը մոտ 2.7 մլրդ դոլար է տրամադրել Զարգացման միջազգային ասոցիացիայից (IDA), որի դոնոր Հայաստանը դարձել է 2023թ., ինչպես նաև Վերակառուցման և զարգացման միջազգային բանկից (IBRD) և թրաստային հիմնադրամներից: Համաշխարհային բանկը մտադիր է հետագայում ևս աջակցել Հայաստանին՝ աղքատության վերացմանն ու մոլորակի վրա ընդհանուր բարեկեցության ու կենսամակարդակի բարձրացմանն ուղղված զարգացման ճանապարհին: