Միջազգային իրավապաշտպան. բռնապետները երբեք քաղբանտարկյալներին սեփական ցանկությամբ ազատ չեն արձակում

Արմինֆո. Բռնապետները երբեք քաղբանտարկյալներին սեփական ցանկությամբ ազատ չեն արձակում, դրա համար անհրաժեշտ է ճնշում գործադրել։ Ինչպես հաղորդում է "Free Armenian Prisoners" շարժումը, այդ մասին հայտարարել է միջազգային իրավապաշտպան Ջարեդ Գենսերը ՝ անդրադառնալով Բաքվում ընթացող ՄԱԿ կլիմայական գագաթնաժողովին (COP29):

Ինչպես պարզաբանել է շարժումը, այդ համատեքստում the Armenian Report-ը հրապարակել է տեսանյութ, որում հայտնի իրավապաշտպանները, ակտիվիստները եւ ակադեմիական միջավայրի ներկայացուցիչներն իրենց կարծիքն են հայտնում գագաթաժողովն ընդունող Ադրբեջանի մասին ՝ մատնանշելով այդ երկրի կողմից թույլ տրված խախտումները: Շարժումը ներկայացրել է որոշ մասնակիցների դիմումներից հատվածներ, որոնցում նրանք պահանջում են ճնշում գործադրել Արցախում էթնիկ զտումներ իրականացրած և քաղբանտարկյալներ պահող պետության նկատմամբ:

Մասնավորապես, իր ուղերձում Ջարեդ Գենսերը կոչ է արել ուշադրություն դարձնել մարդու իրավունքների լուրջ խախտումներին, որոնք իրականացվել են Ադրբեջանի կողմից ինչպես Արցախի ժողովրդի նկատմամբ՝ էթնիկ զտումների տեսքով, այնպես էլ հայ և ադրբեջանցի քաղբանտարկյալների նկատմամբ։

"Ոչ մի կասկած չկա, որ Իլհամ Ալիևը բռնապետ է։ ՄԱԿ-ի որոշումը՝ թույլ տալ Բաքվին և Ալիևին անցկացնել COP29 գագաթնաժողով, իսկապես, ցավալի է: Մենք պետք է որոշենք բոլոր հասանելի քաղաքական տարբերակները՝ Ալիևի նկատմամբ ճնշում գործադրելու համար։ Բռնապետերը երբեք քաղբանտարկյալներին ազատ չեն  արձակում սեփական կամքով. նրանք դա անում են միայն ճնշման տակ, երբ գիտակցում են բացասական հետևանքների հնարավորությունը՝ եթե դա չանեն: Ուստի մեր պարտականությունն է, անկախ մեր դերից, անել հնարավորը, որպեսզի ճնշում գործադրենք Ալիևի նկատմամբ և ստիպենք նրան փոխել ուղղությունը", - հայտարարել է իրավապաշտպանը։

Իր հերթին՝ Միացյալ Թագավորության Լորդերի պալատի անդամ բարոնուհի Քերոլայն Քոքսը ուշադրություն է հրավիրել այն փաստի վրա, որ Բաքվի բանտերում ապօրինի պահվող հայերը ոչ մի հանցագործություն չեն կատարել:

"Մենք գիտենք, որ Ադրբեջանն ապօրինաբար բավականին մեծ թվով հայերի է պահում։ Այս մարդիկ ոչ մի հանցագործություն չեն կատարել, և նրանց մեջ կան բազմաթիվ հայտնի առաջնորդներ Լեռնային Ղարաբաղից, որոնք ներկայումս գտնվում են Ադրբեջանում՝ ճաղերի հետևում: Սա մտահոգության շատ լուրջ պատճառ է։ Ես հույս ունեմ, որ միջազգային հանրությունը կկարողանա ավելի զգալի ճնշում գործադրել Ադրբեջանի նկատմամբ՝ ազատ արձակելու համար նրանց, ում նա անօրինական կերպով պահում է գերության մեջ և ակնհայտորեն մեծ տառապանքներ է պատճառում", - նշել է բարոնուհի Քոքսը։

 Հայտարարությամբ է հանդես եկել նաև Ադրբեջանից արտաքսված լրագրող Մահամադ Միրզալին, ով հայտարարել է, որ եվրոպացի գործիչները պետք է ամաչեն գազ ստանալու համար այդ երկրի հետ համագործակցելուց: "Ամոթ է տեսնել, թե ինչպես է Եվրոպական հանձնաժողովի նախագահ Ուրսուլա Ֆոն դեր Լյայենը սեղմում Ալիևի ձեռքը, մինչդեռ, Եվրոպայից մարդու իրավունքները հարգելու բազմաթիվ կոչեր են հնչում։ Եվրոպական շատ առաջնորդներ, ինչպես Շառլ Միշելը, շնորհավորում են Ալիևին: Ինչի՞ կապակցությամբ են նրան շնորհավորում։ Այն բանի համա՞ր, որ նա պահում է 300-ից ավելի ադրբեջանցի և բազմաթիվ հայ քաղբանտարկյալների։ Միշելը դատապարտում է Ուկրաինայում Ռուսաստանի գործողությունները, բայց լռում է Ադրբեջանի կողմից բռնության մասին", - դժգոհել է լրագրողը։

Նախաձեռնությունում նաեւ նշել են, որ տեսահոլովակում ուղերձներով հանդես են եկել այնպիսի գործիչներ, ինչպիսիք են Միջազգային քրեական դատարանի նախկին դատախազ Լուիս Մորենո Օկամպոն, ադրբեջանցի լրագրող եւ վտարանդի բլոգեր Մահամադ Միրզալին, հրատարակիչ եւ գրող Դելե Օլոհեդեն եւ շատ ուրիշներ:

Հիշեցնենք, որ ՄԱԿ-ի կլիմայական գագաթնաժողովը (COP29) տեղի է ունենում Բաքվում 2024 թվականի նոյեմբերի 11-22-ը ։ Այս կապակցությամբ Հայաստանի ավելի քան երեք տասնյակ հասարակական կազմակերպություններ հանդես են եկել հայտարարությամբ, որում կոչ են արել քաղաքացիական հասարակության ներկայացուցիչներին չմասնակցել Ադրբեջանում ՄԱԿ-ի Կլիմայի փոփոխության մասին շրջանակային կոնվենցիայի ("COP29") մասնակիցների Համաժողովի 29-րդ նստաշրջանին:

Հավելենք, որ մինչ օրս հայտնի չէ ադրբեջանական բանտերում պահվող հայ ռազմագերիների և պատանդների ստույգ թիվը: Նրանց թվում են Արցախի ռազմաքաղաքական ղեկավարության ութ ներկայացուցիչներ. նախկին նախագահներ Արկադի Ղուկասյանը, Բակո Սահակյանը և Արայիկ Հարությունյանը, արտաքին գործերի նախկին նախարար Դավիթ Բաբայանը, ԱԺ նախագահ Դավիթ Իշխանյանը, Արցախի պաշտպանության բանակի նախկին հրամանատար, գեներալ Լևոն Մնացականյանը, գեներալ Դավիթ Մանուկյանը և նախկին պետնախարար Ռուբեն Վարդանյանը: