ANCA. Ի հեճուկս Բաքվում COP29-ի ժամանակ Ալիևի կառավարության բռնաճնշումների և ահաբեկումների՝ ԱՄՆ օրենսդիրները պաշտպանել են Արցախի հայերի վերադարձի իրավունքը

Արմինֆո. Ի հեճուկս Բաքվում կլիմայի խորհրդաժողովի (COP29) ժամանակ Ալիևի կառավարության բռնաճնշումների և ահաբեկումների ՝ ԱՄՆ օրենսդիրները պաշտպանել են Արցախի հայերի վերադարձի իրավունքը և հանդես են եկել Ադրբեջանի կողմից հայ պատանդների անհապաղ ազատ արձակման օգտին: Այս մասին հաղորդում է Ամերիկայի Հայ դատի հանձնախումբը (ANCA)։

ANCA-ում նշել են, որ սենատորներ Էդ Մարկին եւ Շելդոն Ուայթհաուսը եւ ԱՄՆ Կոնգրեսի հայկական խմբակցության համանախագահ Ֆրենկ Փալոնեն Բաքվում պաշտպանել են այդ իրավունքը, angam, այն պայմաններում, երբ խաղասեղանին էր նրանց անձնական անվտանգությունը:

ANCA-ի գործադիր տնօրեն Արամ Համբարյանը, շնորհակալություն հայտնելով ամերիկացի օրենսդիրներին այդ դիրքորոշման համար, նշել է, որ Բաքվի կողմից COP29-ը "զավթելու" փորձը, որպեսզի մաքրվի իր հանցագործություններից, հանգեցրել է հակառակ արդյունքի. հաջողվել է միայն համաշխարհայինն հանրության ուշադրությունը հրավիրել կոռուպցիայի եւ շրջակա միջավայրի աղտոտման, Ալիեւի ռեժիմի ագրեսիայի եւ բռնաճնշումների վրա:

Նշվում է, որ Բաքվում և Վաշինգտոնում տեղի ունեցած մամուլի ասուլիսների ժամանակ սենատորներ Ուայթհաուսը, Մարկին և Ներկայացուցիչների պալատի անդամ Փալոնեն հանդես են եկել Արցախի 120 հազարոց բնիկ հայ բնակչության ցեղասպանությունը "կանաչապատելու" Ադրբեջանի կառավարության և իշխանամետ լրատվամիջոցների փորձերի դեմ և 23 հայ պատանդների և հարյուրավոր ադրբեջանցի քաղբանտարկյալների շարունակվող ապօրինի բանտարկության դեմ:

Նոյեմբերի 16-ին Բաքվում կայացած COP29 մամուլի ասուլիսի ժամանակ, երբ ադրբեջանական հեռուստատեսության լրագրողը հարցրել է, թե ինչու ԱՄՆ-ը պատժամիջոցներ չի սահմանել Հայաստանի դեմ, սենատոր Ուայթհաուսը պատասխանել է. "Մենք սենատոր Մարկիի հետ աջակցում ենք Հայաստանին՝ երկուսս էլ: Մենք շատ ցավում ենք, որ տեղի է ունեցել այդքան հայերի վերաբնակեցում։ Մեղմ ասած՝ ես բնավ վստահ չեմ, որ դրանում մեղավոր են հայերը։ Եվ ես չեմ ուզում սևեռվել համաժողովը հյուրընկալող երկրում մարդու իրավունքների հարցի վրա, բայց եթե խոսքը դրա մասին լիներ, ես շատ չէի գովաբանի":

Իր հերթին՝ Մարկին ուղիղ պատասխան է տվել։ "Մենք կարծում ենք, որ քաղբանտարկյալները պետք է ազատ արձակվեն։ Մենք կարծում ենք, որ պետք է լինի հայերի ՝ Լեռնային Ղարաբաղ վերադառնալու իրավունքը։ Եվ մենք կարծում ենք, որ Ադրբեջանի և Հայաստանի միջև պետք է լինի խաղաղության պայմանագիր"։

Նշվում է նաև, որ Մարկին հաղորդել է Ադրբեջանի իշխանությունների կողմից ստեղծված վախի և բռնաճնշումների մթնոլորտի մասին COP29-ի պատերից դուրս:

Ինչպես հաղորդում է ANCA-ն, Բաքվից վերադառնալուն պես սենատոր Մարկին և Ներկայացուցիչների պալատի անդամ Փալոնեն երկուշաբթի Կապիտոլիումի բլուրում կայացած մամուլի ասուլիսում մանրամասն պատմել են Ադրբեջանում մարդու իրավունքների խախտումների և COP29 կլիմայական գագաթնաժողովի ժամանակ իրենց անձնական անվտանգության համար մտահոգությունների մասին:

Մարկին նշել է, որ Միացյալ Նահանգների համար կարևոր է լուծել Ադրբեջանում մարդու իրավունքների շարունակական խախտումների և չլուծված տարածքային հակամարտությունների հետևանքով առաջացած լուրջ խնդիրները: "Մենք պետք է ուշադրություն հրավիրենք Ադրբեջանում մարդու իրավունքների անընդունելի իրավիճակի վրա և նպաստենք դրական փոփոխություններին ։ Մենք չենք կարող լռել ։ Մենք չենք կարող անտեսել այն թշնամական մթնոլորտը, որում այժմ տեղի է ունենում համաժողովը", - հավելել Է սենատորը։

Իր հերթին՝ Փալոնեն պատմել է COP29-ում իր դեմ հակաալիևյան "ցուցարարների կամ ավազակների" կրկնվող և "սինխրոն" հարձակման փորձերի մասին՝ Արցախի ինքնորոշմանն ու Հայաստանի անվտանգությանը ցուցաբերած բացահայտ աջակցության համար։

"Եթե չլիներ այն փաստը, որ ինձ պաշտպանում էին ԱՄՆ դեսպանատան [թիկնապահները], ես պառկած կլինեի հիվանդանոցում։ Եվ դա լուրջ էր: Ես, պարզապես, ուզում եմ անկեղծ լինել: Դա շատ լուրջ էր", - խոստովանել է Փալոնեն։

Ներկայացուցիչ Փալոնեն պատմել է մինչեւ COP29-ը իր հույսերի մասին, որ Ադրբեջանի կառավարությունը կօգտվի քաղբանտարկյալներին ազատ արձակելու հնարավորությունից: "Փոխարենը"՝ համաժողովից մի քանի օր առաջ նախագահ Ալիևը սկսեց հարձակվել ֆրանսիացիների վրա, սկսեց հարձակվել հոլանդացիների վրա՝ այն աստիճանի, որ նրանք, նույնիսկ, չէին եկել համաժողովին, և սկսեց ավելի շատ, եթե դա հնարավոր է, զսպել մարդու իրավունքները և բանտարկել ավելի շատ բանտարկյալների ", - բացատրել է կոնգրեսականը ՝ Ադրբեջանի գործողություններն անվանելով "անհավանական":