Բարերարի որդի. Ռուբեն Վարդանյանի ձերբակալությունը շատ հստակ ուղերձ էր ողջ հայ ժողովրդին՝ ոչ մի հայ ապահով չէ

Արմինֆո. Պետք է ավելի շատ խոսել քաղբանտարկյալների մասին, մեծացնել ճնշումն Ադրբեջանի նկատմամբ։ Այդ մասին The Armenian Report պարբերականին հայտարարել է Բաքվում ապօրինի պահվող բարերար Ռուբեն Վարդանյանի ավագ որդին՝ Դավիթ Վարդանյանը։ "Այդ գործողություններն անհրաժեշտ են, չէ որ մենք բոլորս գիտենք, որ այն, ինչ տեղի է ունենում, լիովին հակասում է միջազգային բոլոր նորմերին ու չափանիշներին։ Եվ մենք պետք է Ադրբեջանին ցույց տանք, որ նման վարքագծի հետ չի կարելի համակերպվել, հատկապես, եթե երկիրը ցանկանում է որոշակի դիրք զբաղեցնել միջազգային ասպարեզում", - ասել է կրտսեր Վարդանյանը։

Բարերարի որդին հիշեցրել է, որ իր հայրը մեկ տարի ապրել է Արցախում, երեք ամիս զբաղեցրել է պետական նախարարի պաշտոնը, բայց, հիմնականում, նրա ուշադրությունը կենտրոնացած է եղել հումանիտար հարցերի և կրթական ծրագրերի վրա:

"Այնտեղ գտնվելու վերջին ութ ամիսներին նա սովորական տեղացի բնակիչ էր, որը զբաղվում էր բազմաթիվ մարդասիրական բարեգործական նախագծերով ՝ ի հեճուկս այնտեղ ստեղծված բարդ իրավիճակին։ Ես անհանգստանում եմ հորս համար, բայց ես անհանգստանում եմ նաև մնացած բոլոր հայերի համար, որոնց պահում են Բաքվում։ Հորս նման մարդու ձերբակալությունը շատ հստակ ուղերձ էր ողջ հայ ժողովրդին՝ ոչ մի հայ ապահով չէ, դա կարող է պատահել յուրաքանչյուրի հետ", - ասել է նա։

Ուշագրավ է, որ այն ժամանակ, երբ Բաքվում COP29-ին ընդառաջ աշխարհի տարբեր երկրներում ցույցեր սկսվեցին Ադրբեջանում ապօրինի պահվող հայ ռազմագերիների և պատանդների անհապաղ ազատ արձակման պահանջով, ԱԺ "Քաղաքացիական պայմանագիր" խմբակցությունը երեկ խորհրդարանում տապալեց հայ ռազմագերիների և պատանդների Բաքվի բանտերից ազատ արձակման հրամայականի վերաբերյալ ընդդիմության նախաձեռնած հայտարարության ընդունումը: ԱԺ հայտարարության նախագիծը, որում ընդգծվում էր այդ հարցում Ադրբեջանի վրա ճնշում գործադրելու անհրաժեշտությունը, պաշտպանել է ընդամենը 30 ընդդիմադիր պատգամավոր: Իշխող ուժը որպես արդարացում հայտարարել է, թե այդ հարցն իրենց ուշադրության կենտրոնում է ամենօրյա կտրվածքով, և իրենք հավելյալ գործողությունների անհրաժեշտություն չեն տեսնում այդ հարցով:

Հավելենք, որ մինչ օրս հայտնի չէ ադրբեջանական բանտերում պահվող հայ ռազմագերիների և պատանդների ճշգրիտ թիվը ։ Ադրբեջանական գերության մեջ են նաև Արցախի ռազմաքաղաքական ղեկավարության 8 ներկայացուցիչներ. Արցախի նախկին նախագահներ Արկադի Ղուկասյանը, Բակո Սահակյանը, Արայիկ Հարությունյանը, արտաքին գործերի նախկին նախարար Դավիթ Բաբայանը, ինչպես նաև խորհրդարանի խոսնակ Դավիթ Իշխանյանը, Արցախի պաշտպանության բանակի նախկին հրամանատար, գեներալ Լևոն Մնացականյանը, գեներալ Դավիթ Մանուկյանը և նախկին պետնախարար Ռուբեն Վարդանյանը: