Էկոակտիվիստ Գրետա Թունբերգը ժամանել է Հայաստան

Արմինֆո. Շրջակա միջավայրի պահպանության ոլորտում աշխարհի առաջատար ակտիվիստուհիներից մեկը՝ շվեդուհի Գրետա Թունբերգն արդեն Հայաստանում է։ Այդ մասին ֆեյսբուքյան իր էջում տեղեկացրել է "Armenian Climate Justice" նախաձեռնությունը։

Նշվում է, որ Հայաստանի և Վրաստանի սահմանին Գրետա Թունբերգին իր գործընկերների հետ դիմավորել է "Համայնքային համախմբման և աջակցության կենտրոն" ՀԿ նախագահ Օլեգ Դուլգարյանը:

Ինչպես հաղորդել են հայկական նախաձեռնության անդամները, շվեդ բնապահպանական ակտիվիստը բոյկոտում է ՄԱԿ Կլիմայի փոփոխության համաժողովի (COP29) անցկացումն Ադրբեջանում: "Դրա փոխարեն նա որոշել է համերաշխություն հայտնել Հայաստանին։ Այս որոշումն ընդգծում է նրա շարունակական հանձնառությունը մարդու իրավունքների պաշտպանությանը, քանի որ ավելի վաղ նա հանդես էր գալիս Ադրբեջանում մարդու իրավունքների խախտումների և Արցախում հայերի էթնիկ զտումների դեմ", - ասվում է հաղորդագրության մեջ։

Այդ կապակցությամբ Կլիմայի արդարության հայկական նախաձեռնությունը նախատեսում է զուգահեռ միջոցառումներ անցկացնել COP29-ի ընթացքում, այդ թվում ՝ 2024 թվականի նոյեմբերի 14-ի խորհրդաժողովը և ցույցը Երևանում ՄԱԿ-ի գրասենյակի առջև՝ 2024 թվականի նոյեմբերի 15-ին:

Հիշեցնենք, որ ավելի վաղ Թբիլիսիում Գրետա Թունբերգը միավորվել էր Ադրբեջանի, Հայաստանի և Վրաստանի ակտիվիստների հետ, որպեսզի ուշադրություն հրավիրի Ադրբեջանում COP29-ի անցկացման խնդրի վրա:

ԶԼՄ-ների հաղորդումների համաձայն,  էկոակտիվիստը դատապարտել է ՄԱԿ Կլիմայի փոփոխության շրջանակային կոնվենցիայի (UNFCCC) անցկացման համար Ադրբեջանի մայրաքաղաքն ընտրելու որոշումը ՝ այն անվանելով երեսպաշտ: Այդ համատեքստում նա հիշեցրել է, որ COP29-ի անցկացման վայր դարձած Ադրբեջանն ընդամենը մեկ տարի առաջ էթնիկ զտում է իրականացրել Արցախում։ Մինչ շվեդ ակտիվիստը բոյկոտում է COP29-ը, Հայաստանի կառավարող ուժը հրաժարվել է ընդունել հայտարարություն, որով Ադրբեջանից պահանջում է անհապաղ ազատ արձակել հայ պատանդներին և ապահովել Արցախից 120 հազար հայ փախստականների անվտանգ վերադարձը: Այդ հայտարարությունը նաև կոչ էր անում կատարել Միջազգային դատարանի որոշումը և հարգել Հայաստանի տարածքային ամբողջականությունը:

Ուշագրավ է, որ այն ժամանակ, երբ Բաքվում COP29-ին ընդառաջ աշխարհի տարբեր երկրներում ցույցեր սկսվեցին Ադրբեջանում ապօրինի պահվող հայ ռազմագերիների և պատանդների անհապաղ ազատ արձակման պահանջով, ԱԺ "Քաղաքացիական պայմանագիր" խմբակցությունը երեկ խորհրդարանում տապալեց հայ ռազմագերիների և պատանդների Բաքվի բանտերից ազատ արձակման հրամայականի վերաբերյալ ընդդիմության նախաձեռնած հայտարարության ընդունումը: ԱԺ հայտարարության նախագիծը, որում ընդգծվում էր այդ հարցում Ադրբեջանի վրա ճնշում գործադրելու անհրաժեշտությունը, պաշտպանել է ընդամենը 30 ընդդիմադիր պատգամավոր: Իշխող ուժը որպես արդարացում հայտարարել է, թե այդ հարցն իրենց ուշադրության կենտրոնում է ամենօրյա կտրվածքով, և իրենք հավելյալ գործողությունների անհրաժեշտություն չեն տեսնում այդ հարցով:

Հավելենք, որ մինչ օրս հայտնի չէ ադրբեջանական բանտերում պահվող հայ ռազմագերիների և պատանդների ճշգրիտ թիվը ։ Ադրբեջանական գերության մեջ են նաև Արցախի ռազմաքաղաքական ղեկավարության 8 ներկայացուցիչներ. Արցախի նախկին նախագահներ Արկադի Ղուկասյանը, Բակո Սահակյանը, Արայիկ Հարությունյանը, արտաքին գործերի նախկին նախարար Դավիթ Բաբայանը, ինչպես նաև խորհրդարանի խոսնակ Դավիթ Իշխանյանը, Արցախի պաշտպանության բանակի նախկին հրամանատար, գեներալ Լևոն Մնացականյանը, գեներալ Դավիթ Մանուկյանը և նախկին պետնախարար Ռուբեն Վարդանյանը: