Երևանում տեղի կունենա Լևոն Չաուշյանի հիշատակին նվիրված բացառիկ համերգ

Արմինֆո. Ավելի քան երկու տարի է անցել «Հայկական երաժշտական համաժողովի» հիմնադիր-նախագահ, Հայաստանի արվեստի վաստակավոր գործիչ, ականավոր կոմպոզիտոր Լևոն Չաուշյանի մահից: 2022 թվականի նոյեմբերին ՝ Երևանի Արամ Խաչատրյանի անվան համերգասրահում կոմպոզիտորի հիշատակին կայացել է նրա դստեր ՝ դաշնակահարուհի Անահիտ Չաուշյանի (Միցյալ Թագավորություն) համերգը, ով կատարել է հայ կոմպոզիտորների ստեղծագործություններ, որոնց թվում են նաև, Լևոն Չաուշյանից բացի, Կոմիտասը, Ռուբեն Սարգսյանը, Գեղունի Չիթչյանը, Գայանե Չեբոտորյանը, Վաչե Շարաֆյանը:

Լևոն Չաուշյանի ընտանիքի և Հայաստանի ֆիլհարմոնիկ նվագախմբի նախաձեռնությամբ այս տարի տեղի կունենա հերթական համերգը՝ նվիրված կոմպոզիտորի հիշատակին: Սակայն այն հերթական անվանել դժվար է, քանի որ համերգի ծրագիրը եզակի է։ Նոյեմբերի 17-ին Արամ Խաչատրյանի անվան համերգասրահում Անահիտ Չաուշյանի կատարմամբ և ֆիլհարմոնիկ նվագախմբի նվագակցությամբ՝ Էդուարդ Թոփչյանի ղեկավարությամբ, կհնչի Լևոն Չաուշյանի ամենավաղ ստեղծագործությունը ՝ Դաշնամուրի կոնցերտը, որը կոմպոզիտորը գրել է 17 տարեկանում։ Չաուշյանն այդ ստեղծագործությունը կատարել է դպրոցում տեղի ունեցած պետական քննության ժամանակ, որից հետո այն, գուծնականում, չի կատարվել։ Բացի այդ, ջութակահարուհի Անուշ Նիկողոսյանը երևանյան հանդիսատեսին կնվիրի Լևոն Չաուշյանի Ջութակի կոնցերտը, որը գրվել է 1972 թվականին և նվիրված է Ռուբեն Ահարոնյանին (ջութակահար, ՀՀ ժողովրդական արտիստ, ՌԴ արվեստի վաստակավոր գործիչ, պրոֆեսոր - խմբ.): Ջութակի այս կոնցերտը համարվում է կոմպոզիտորի վերջին ստեղծագործություններից մեկը, քանի որ 2016 թվականին կատարվել է նրա երկրորդ խմբագրությունը։ "Շատերի համար, ովքեր ծանոթ չեն Չաուշյանի ժառանգությանը, այս համերգը կդառնա հայտնություն, քանի որ նրա երաժշտությունը կոչված է վերակենդանացնելու մարդուն նրա հետ ամեն շփման ժամանակ, բացահայտելու ինչ-որ նոր, հետաքրքիր բան, որն էլ հենց արվեստի ցանկացած ստեղծագործության առաքելությունն է", - նշել են երաժշտական երեկոյի կազմակերպիչների ներկայացուցիչները:

Հատկանշական է, որ Չաուշյանների երաժշտական տոհմում Անահիտը ներկայացնում է չորրորդ սերունդը ։ Երաժշտական ուղու ընտրությունը կանխորոշված էր գրեթե <լռելյայն>: Վերջին հարցազրույցներից մեկում դաշնակահարուհին պատմել է, որ ընտրությունը կատարվել է իր համար դեռ այն բանից շատ առաջ, երբ ինքը դա գիտակցել է։ Հայտնվելով Իրինա Գրիգորյանի մոտ՝ Անահիտը գտել է իրեն, գիտակցելով, որ ցանկանում է ինքնադրսևորվել հենց հնչյունների միջոցով: Այնուհետև ուսումը շարունակել է Երևանի Կոմիտասի անվան պետական կոնսերվատորիայում՝ պրոֆեսոր Վիլլի Սարգսյանի դասարանում: Էքստեռն կարգով հանձնել է քննությունները և ընդունվել Բրյուսելի կոնսերվատորիա՝ պրոֆեսոր Եվգենի Մոգիլևսկու դասարան, իսկ որոշ ժամանակ անց ավարտել է ասպիրանտուրան՝ Լոնդոնի Թագավորական երաժշտական ակադեմիայում՝ պրոֆեսոր Պասկալ Նեմիրովսկու դասարանում։ Հետագայում վարպետությունը կատարելագործել է Փոլ Բադուր-Սկոդայի, Միշել Կամպանելլայի, Լազար Բերմանի, Լև Նաումովի և Սթիվեն Հաֆի մոտ։

Այսօր Անահիտ Չաուշյանը դասավանդում է անգլիական հեղինակավոր դպրոցներում, ինչպիսին է Յեհուդի Մենուխինի դպրոցը, ինչպես նաև <Ֆուգատա> կվինտետի հիմնադիրն ու ղեկավարն է: Սիենայի Կիջիանի ակադեմիայի պատվավոր դիպլոմի դափնեկիր է: Էմանուել Դյուրլեի անվան միջազգային մրցույթի դափնեկիր (Բելգիա): Կամերային անսամբլների կազմում մենահամերգներով հանդես է եկել հեղինակավոր Wigmore Hall, Royal Festival Hall, St.Martin-in-the-Fields, Santori Hall in Tokyo, Grande Salle du Conservatoire Royal in Brussels, Gavot Hall in Paris համերգասրահներում:.

 Անուշ Նիկողոսյանը ծնվել է Երևանում և հինգ տարեկանում սկսել է ջութակի դասեր ստանալ Պետրոս Հայկազյանից: Սովորել է Երևանի Կոմիտասի անվան պետական կոնսերվատորիայում: Մի քանի տարի պարապել է Հայաստանի ազգային ֆիլհարմոնիկ նվագախմբի գլխավոր դիրիժոր Էդուարդ Թոփչյանի ղեկավարությամբ ։ Ներկայումս Մյունխենի երաժշտության և թատրոնի բարձրագույն դպրոցի ուսանողուհի է (Քրիստոֆ Պոպենի դասարան): 2013 թվականից կատարելագործվում է նաև Յուլիա Ֆիշերի ղեկավարությամբ։ Անուշը բազմաթիվ միջազգային մրցույթների դափնեկիր է: Կամերային երաժշտություն է կատարել Յուլիա Ֆիշերի, Կիմ Քաշքաշյանի, Լեյֆ Ուվե Անդսնեսի, Նիլս Մենկեմեյերի, Սերգեյ Կռիլովի, Պավել Վերնիկովի, Ալեքսանդր Չաուշյանի, Մարիո Բրունելոյի և Ֆրանսուա-Ֆրեդերիկ Գիի հետ ։ Հյուրախաղերով հանդես է եկել Հայաստանի, Լիտվայի, Ռուսաստանի, Միացյալ Թագավորության, Ֆրանսիայի, Չեխիայի, Գերմանիայի, ԱՄՆ-ի, Լեհաստանի, Սլովակիայի և Ավստրիայի քաղաքներում: 2013 թվականից նվագում է Ջովանի Բատիստա Գվադանինիի (1753) ջութակ։ Հիշեցնենք, որ կոմպոզիտոր Լևոն Չաուշյանը մահացել է 2022 թվականի փետրվարին՝ 76 տարեկան հասակում ։