Երևանի քաղաքապետարանը հայտարարում է Միսաք Մանուշյանի արձանի նախագծի մրցույթ

Արմինֆո. Երևանի քաղաքապետարանը հայտարարում է Ֆրանսիական դիմադրության հերոս Միսաք Մանուշյանի արձանի նախագծի մրցույթ:

Ինչպես հաղորդել է քաղաքապետարանի մամուլի ծառայությունը, Միսաք Մանուշյանի ստեղծվելիք կիսանդրին իր պատվանդանով նախատեսվում է տեղադրել նրա անունը կրող այգում, որի հիմնարկեքի արարողությունը տեղի կունենա 2025 թվականին:

«Հայտատուներից պահանջվում է պատրաստել արձանի մանրակերտը, լուսանկարել մանրակերտը երեք դիրքից և, անհրաժեշտ հայտաձևն ուղարկելով համապատասխան էլ-հասցեին, փաթեթը ներկայացնել մրցույթին: Հայտերը անանուն կներկայացվեն մրցութային հանձաժողովին, որից հետո տեղի կունենա մանրակերտերի ցուցադրությունը և գնահատումը: Հաղթող ճանաչված հայտի հեղինակին կտրամադրվի դրամական պարգև, և մանրակերտի հիման վրա հուշարձանը կիրականացվի, իսկ երկրորդ և երրորդ տեղերը զբաղեցրած հայտատուներին կտրամադրվի խրախուսական մրցանակ (մրցույթը չչեղարկելու պարագայում): Յուրաքանչյուր հայտատու կարող է ներկայացնել 1 մանրակերտի տարբերակ:

Մրցութային պայմաններ.  մանրակերտը պետք է լավագույնս ներկայացնի Միսաք Մանուշյանին՝ ընդգծելով վերջինիս կերպարը,  մանրակերտն իր պատվանդանով պետք է ներդաշնակի տեղադրման վայրին (հավելված 5): Անհրաժեշտ տեսանելիությունն ապահովելու համար պետք է հաշվի առնել հուշարձանի և դիտողի միջև հեռավորությունը, արձանի դիմահայաց դիրքի ընտրությունը, պատվանդանի բարձրությունը, արձանի լայնությունն ու բարձրությունը,  կիսանդրին, պատվանդանն ու քանդակի նյութը պետք է համահունչ լինեն ընդհանուր միջավայրին և վերջինիս գեղագիտությանը:

Ներկայացված լավագույն մանրակերտի հայտատուն կպարգևատրվի մեկուկես միլիոն դրամով, իսկ երկրորդ և երրորդ տեղերը զբաղեցրած մասնակիցները՝ համապատասխանաբար՝ մեկ միլիոն և հինգ հարյուր հազար դրամով (մրցույթի չչեղարկման պարագայում)», - ասվում է քաղաքապետարանի հաղորդագրությունում:

Հիշեցնենք, որ Միսաք Մանուշյանը նացիստների դեմ Ֆրանսիական զինված դիմադրության առաջնորդն էր Երկրորդ համաշխարհային պատերազմի տարիներին: Նա գլխավորել է "Ազատ հրաձիգների և ֆրանսիացի պարտիզանների" խմբավորումը՝ Ֆրանսիական դիմադրության ստորաբաժանումներից մեկը, որը բաղկացած էր, հիմնականում, Հունգարիայից, Ռումինիայից և Լեհաստանից ներգաղթյալներից:

Մանուշյանը ծնվել է Ադիյամանում (Արևմտյան Հայաստանում)` 1906թ.: Նա վերապրել է Ցեղասպանությունը։ Միսաqի ծնողները զոհվել են կոտորածի ժամանակ, սակայն նա եղբոր հետ կարողացել է փախչել և հասնել Մարսել։

Մանուշյանը դարձել է Ֆրանսիայի կոմկուսի անդամ։ Միսաք Մանուշյանի նախաձեռնությամբ Փարիզում 1930 թվականին ծնվել է" ֆրանսահայ ժամանակակից գրողների ընկերակցությունը", որի ամբիոնն է դարձել "Զանգ" ամսագիրը: Նրա ժողովրդավարական ուղղվածությունը գրավել է երկրի շատ մեծ գրողների:

Երկրորդ համաշխարհային պատերազմի սկսվելուն պես Մանուշյանը հայտնվել է բանտում, բայց ազատ է արձակվել և միացել Դիմադրության շարժմանը ՝ մի խումբ հայրենակիցների առաջնորդելու համար: 1944թ. փետրվարին Մանուշյանը ձերբաակալվել է նացիստների կողմից և մահապատժի ենթարկվել։

Մանուշյանը հետմահու արժանացել է "Պատվո լեգեոնի" շքանշանի ։ Նրա անունով (ինչպես նաև "Մանուշյանի խմբի" անունով) անվանակոչվել են փողոցներ, հրապարակներ Փարիզում, Վալանսում, Մարսելում, Գարդանում, ինչպես նաեւ՝ Երևանում: Մանուշյանի մասին գրել են Պոլ Էլյուարը, Լուի Արագոնը, Լեո Ֆեռեն, ինչպես նաև Շառլ Ազնավուրը, ում ընտանիքն օգնել է նրան թաքնվել նացիստներից: