Ռուսաստանի սենատոր., "3+3" ձևաչափով նախարարական հանդիպումը պահանջված է աշխարհաքաղաքական բարդ ժամանակաշրջանում

Արմինֆո. "3+3" տարածաշրջանային հարթակի (Ադրբեջան, Հայաստան, Վրաստան գումարած Իրան, Ռուսաստան, Թուրքիա) ձևաչափով նախարարական հանդիպումը աշխարհաքաղաքական բարդ ժամանակաշրջանում պահանջված է կայունության և փոխվստահության համար:

ՌԴ Դաշնային խորհրդի միջազգային հարցերով հանձնաժողովի նախագահ Գրիգորի Կարասինն այդպես է մեկնաբանել այսօր Ստամբուլում  անցկացվող "3+3" տարածաշրջանային հարթակի հանդիպումը:

"Դա վերաբերում է ոչ միայն ռազմաքաղաքական, այլև տրանսպորտային-լոգիստիկ, տնտեսական և հումանիտար ոլորտներին ։ Հուսով եմ, որ հանդիպման արդյունքները կօգնեն կանխատեսելիությանը այս զգայուն տարածաշրջանում: Դրան հասնելը հեշտ չի լինի։ Հուսանք", - գրել է ռուս սենատորը։

Նշենք, որ Ռուսաստանի արտգործնախարար Սերգեյ Լավրովը հոկտեմբերի 17-ի երեկոյան արդեն մեկնել է Թուրքիա՝ հարթակի նիստին մասնակցելու համար:

Հավելենք, որ Թուրքիայի արտգործնախարար Հաքան Ֆիդանը հոկտեմբերի 15-ին հաղորդել էր, որ առաջիկա նիստին մասնակցելու են Հայաստանի, Ադրբեջանի, Իրանի և Ռուսաստանի արտգործնախարարները: Ավելի ուշ Վրաստանի ԱԳՆ-ն հանդես էր եկել հայտարարությամբ, նշելով, որ հանդիպմանը մասնակցելու վերաբերյալ Թբիլիսիի դիրքորոշումը չի փոխվել:

ՀՀ ԱԳՆ մամուլի խոսնակ Անի Բադալյանը ԱրմԻնֆո-ի հետ զրույցում հաղորդել է, որ հանդիպմանը մասնակցելու է նախարար Արարատ Միրզոյանը: Նա նաև տեղեկացրել է, որ Հայաստանի արտգործնախարարը հարթակի շրջանակներում մի շարք երկկողմ հանդիպումներ կունենա։

Թուրքական լրատվամիջոցները երեկ գրել էին, որ նախատեսվում են Միրզոյանի առանձին հանդիպումները իր թուրք պաշտոնակցի և Թուրքիայի նախագահ Ռեջեփ Թայիփ Էրդողանի հետ ։

Նշենք, որ 2023 թվականի հոկտեմբերի 23-ին Թեհրանում կայացել է "3+3"տարածաշրջանային հարթակի երկրորդ հանդիպումը ։ Այն անցել է 5 երկրների ՝ Հայաստանի, Ադրբեջանի, Ռուսաստանի, Իրանի և Թուրքիայի արտգործնախարարների մակարդակով ։ Վրաստանը կրկին չի մասնակցել հարթակի աշխատանքներին։ Կողմերը պայմանավորվել են այս հարթակի շրջանակներում հաջորդ հանդիպումն անցկացնել 2024 թվականի առաջին կիսամյակում Թուրքիայում, սակայն, հավանաբար, ինչ-ինչ պատճառներով ժամանակացույցը տեղաշարժվել է ։

Առաջին հանդիպումը տեղի է ունեցել 2021 թվականի դեկտեմբերի 10-ին Մոսկվայում ՝ ՌԴ, Ադրբեջանի, Հայաստանի, Թուրքիայի ԱԳ փոխնախարարների և Իրանի ԱԳՆ գլխավոր տնօրենի համանախագահությամբ ։ ՌԴ ԱԳՆ-ում այն ժամանակ նշել էին, որ Վրաստանի ներկայացուցիչները, որոնք նույնպես հրավիրված էին, ձեռնպահ են մնացել հանդիպմանը մասնակցելուց, սակայն նրանց համար դռները միշտ բաց են: