"Խաղաղության խաչմերուկը" կարող է տասնյակ միլիարդավոր օգուտներ բերել Հայաստանին և պոտենցիալ կարող է Բաքվի համար ստեղծել երկու խնդիր. Փաշինյան

Արմինֆո. "Խաղաղության խաչմերուկ" նախագիծը մտահոգում է Ադրբեջանին, քանի որ այդ նախագիծը կարող է տասնյակ միլիարդավոր օգուտներ բերել Հայաստանին և պոտենցիալ կարող է երկու խնդիր ստեղծել Բաքվի համար: Այդ մասին հոկտեմբերի 12 – ին հայտարարել է ՀՀ վարչապետ Նիկոլ Փաշինյանը՝  Երեւանում կայացած "Խաղաղության խաչմերուկ. միավորելով անվտանգությունն ու ժողովրդավարությունը" համաժողովի ժամանակ։

"Նախ, եթե Ադրբեջանն անկեղծորեն մտածում է, որ Հայաստանը ռազմավարական հեռանկարում ագրեսիվ ծրագրեր ունի Ադրբեջանի նկատմամբ, դա կարող է ստեղծել տպավորություն, որ այդ տասնյակ միլիարդավոր դոլարները կարող են օգտագործվել Ադրբեջանի դեմ:

Բայց կա նաև հակառակը. եթե Ադրբեջանն ագրեսիվ մտադրություններ ունի Հայաստանի նկատմամբ, ապա կարող է մտահոգվել, որ այդ տասնյակ միլիարդավոր դոլարները կարող են օգտագործվել Հայաստանի պաշտպանունակության բարձրացման համար, և Ադրբեջանը կարող է խնդիրներ ունենալ մեր նկատմամբ իր ագրեսիվ ծրագրերն իրականացնելու հարցում", - ասել է Հայաստանի վարչապետը։

Այս առումով Փաշինյանը վերստին կրկնել է, որ Հայաստանը որևէ ագրեսիվ մտադրություն չունի Ադրբեջանի կամ, ընդհանրապես, տարածաշրջանի երկրների նկատմամբ ։

"Մենք ճանաչում ենք մեր բոլոր հարեւանների տարածքային ամբողջականությունը եւ պատրաստ ենք դե յուրե պարտավորություններ ստանձնել այդ հարցում։ Ասեմ ավելին. Հայաստանն արձանագրել է, որ մենք, նույնիսկ, մեր գրավյալ տարածքները ռազմական ճանապարհով վերադարձնելու խնդիր չենք դնում, քանի որ այն փաստաթուղթը, որը մենք ստորագրել ենք Ադրբեջանի հետ սահմանագծման գործընթացում, տալիս է բոլոր հնարավորությունները, որպեսզի սահմանագծման գործընթացը կայանա օրինական, իրավական հիմքի վրա։ Ըստ էության, մենք ստեղծում ենք բոլոր երաշխիքները, շարունակելու ենք գնալ այդ ճանապարհով, որպեսզի մեր հարեւաններից ոչ մեկը ոչ միայն կասկած չունենա, որ մենք ագրեսիվ մտադրություններ չունենք, այլեւ գոյություն ունենան դե յուրե պարտադիր երաշխիքներ մեր երկրի կողմից ագրեսիվ քաղաքականություն չիրականացնելու մասին", - ասել է Հայաստանի կառավարության ղեկավարը ։ Սակայն, նրա ասելով, ակնհայտ է, որ Ադրբեջանը ցանկանում է, որպեսզի Հայաստանի ճանապարհները պիտանի լինեն իր համար, բայց, միևնույն ժամանակ, Հայաստանը շարունակելու է գտնվել շրջափակման մեջ: "Սա ինքնին անտրամաբանական մոտեցում է, այն անընդունելի է Հայաստանի համար", - հայտարարել է Փաշինյանը, հավելելով, որ Երևանը պատրաստ է կապ ապահովել Ադրբեջանի արևմտյան շրջանների և Նախիջևանի Ինքնավար Հանրապետության միջև:

Այնուհետև Հայաստանի վարչապետն անդրադարձել է բուն "Խաղաղության խաչմերուկ" նախագծին, և ընդգծել, որ այն գտնվում է Հայաստանի Հանրապետության շահերի կիզակետում։

Ընդ որում, նա մերժել է որոշ քաղաքական գործիչների և փորձագետների պնդումները, որ նախագիծը ինչ-որ կերպ թելադրված է դրսից, արտաքին աշխարհից: "Դա, պարզապես, իրավիճակի ոչ համարժեք գնահատման հետևանք է, քանի որ Հայաստանն ավելի քան հետաքրքրված է այդ նախագծով", - ասել է նա:

Այս առումով նա ուշադրություն է հրավիրել այն հանգամանքի վրա, որ Հայաստանի սահմանների 70 եւ ավելի տոկոսն անշարժ է, չեն ծառայում ապրանքների հոսքի ապահովմանը՝ հարեւան Թուրքիայի եւ Ադրբեջանի հետ սահմանների փակման եւ գլոբալ ենթակառուցվածքային նախագծերին միանալու անհնարինության պատճառով: "Նախագծի իմաստն այն է, որ Հայաստանը տրամադրի իր տարածքները և իր ներդրումն ունենա մեր տարածաշրջանով անցնող հսկայական տնտեսական հոսքերի սպասարկման գործում։ Այս նախագիծը կարող է բարիք լինել մեր տարածաշրջանի համար՝ ստեղծելով տնտեսական նախադրյալներ անվտանգության և կայունության համար", - ասել է Փաշինյանը։