Ռոբերտ Քոչարյան. Այն, ինչ այսօր տեղի է ունենում Հայաստանի դատարաններում, իրավական խուլիգանություն է

Արմինֆո.Ներկա դատական նիստը շարունակվելու դեպքում պաշտպանական կողմը դատավորի ինքնաբացարկի միջնորդություն կներկայացնի: Այդ մասին հոկտեմբերի 11-ին լրագրողներին հայտարարել է ՀՀ երկրորդ նախագահ Ռոբերտ Քոչարյանը, որի դեմ մեղադրող կողմը նոր հայց է ներկայացրել 2008 թվականի մարտի 1-ի դեպքերի համար նրան պատասխանատվության ենթարկելու վերաբերյալ։

Նախկին նախագահի խոսքով՝ այսօր Հայաստանում, գործնականում, բացակայում է արդարություն հասկացությունը։ Որպես օրինակ նա բերել է իր ավելի քան 1,5 տարվա ազատազրկման փաստը՝ Քրեական օրենսգրքում գոյություն չունեցող հոդվածի հիման վրա։ "Առ այսօ ոչ դատախազությունը, ոչ էլ որևէ այլ պետական մարմին այս դեպքի համար ներողություն չի խնդրել։ Ավելին, փաստերը շահարկելով,  փորձում են գործը վերադարձնել դատարան՝ ելնելով իրենց նպատակներից", - ասել է Ռոբերտ Քոչարյանը։

Նա հավելել է, որ այն, ինչ այսօր տեղի է ունենում, իրավական խուլիգանություն է, և խոսքը միայն տվյալ կոնկրետ գործի մասին չէ, այլ՝ ընդհանրապես: "Դուք բոլորդ ականատես եք քաղաքական հետապնդումների, ձերբակալությունների քանակի, այն ամենի, ինչ անում են իշխանությունները ՏԻՄ ընտրություններից հետո ՝ ցանկանալով ունենալ ցանկալի թեկնածուներ, ինչն, ուղղակի, ամոթի զգացում է առաջացնում", - հայտարարել է ՀՀ երկրորդ նախագահը:

Նա նշել է, որ վեց տարվա ընթացքում ոչ ոք իշխանության ներկայացուցիչների ձեռքը չի բռնել իրականացնել 2008 թվականի մարտի 1-ի հանգամանքների ամբողջական քննություն: Քոչարյանն ընդգծել է, որ երբեմն այնպիսի հայտարարություններ են հնչում այն իրադարձությունների վերաբերյալ, որոնք կարելի է դասել աբսուրդի ժանրին ։ "ՀՀ վճռաբեկ դատարանը վիճարկել է քրեական գործը կարճած առաջին ատյանի դատարանի որոշումը, սակայն նույն դատարանն իրավունք չունի անտեսել քրեական օրենսգրքի 300.1-րդ հոդվածը հակասահմանադրական ճանաչած Սահմանադրական դատարանի որոշումը: Այդ հոդվածը չկա, և, հետևաբար, այն մեղադրանքը, որն ինձ առաջադրվել էր 2018 թվականին, ի սկզբանե բացակայում էր", - ասել է նախկին նախագահը, հավելելով, որ հնարավոր չէ, նույնիսկ, փոխել այն, ինչը չկա։

Նշենք, որ ՀՀ գլխավոր դատախազությունը Ռոբերտ Քոչարյանին մեղադրում է 2008 թվականի մարտի 1-ի դեպքերին առնչություն ունենալու համար: Բացի նախկին նախագահ Ռոբերտ Քոչարյանից, որպես մեղադրյալ են անցնում պաշտպանության նախկին նախարար Սեյրան Օհանյանը, ՀԱՊԿ նախկին գլխավոր քարտուղար Յուրի Խաչատուրովը և նախկին փոխվարչապետ Արմեն Գևորգյանը: Ավելի վաղ Սահմանադրական դատարանը հակասահմանադրական էր ճանաչել Քրեական օրենսգրքի այն հոդվածի դրույթը, որով անցնում էին մեղադրյալները: Առաջին երկու դատական ատյանները դադարեցրել են ամբաստանյալների նկատմամբ քրեական հետապնդումը, իսկ Վճռաբեկ դատարանը գործն ուղարկել է Հակակոռուպցիոն դատարան ՝ կրկնակի քննության, հիմնավորելով, որ քրեական օրենսգրքի դրույթները սխալ են մեկնաբանվել, և մեծ թվով տուժողների լույսի ներքո մեղավորները պետք է պատժվեն:

2008 թվականի փետրվարի 19-ին Հայաստանում տեղի ունեցած նախագահական ընտրություններից հետո երկրում սկսվել էին զանգվածային բողոքի ցույցեր, որոնք գլխավորում էր ՀՀ առաջին նախագահ Լևոն Տեր-Պետրոսյանը: Նա և իր կողմնակիցները չէին ընդունում ընտրությունների արդյունքները, որոնց համաձայն, նախագահ էր ընտրվել Սերժ Սարգսյանը: Ցուցարարները վրաններ էին տեղադրել Երևանի Ազատության հրապարակում և երթեր ու ակցիաներ էին իրականացնում մայրաքաղաքի տարբեր հատվածներում: 2008 թվականի մարտի 1-ին տեղի ունեցան զանգվածային անկարգություններ և ցուցարարների ու ոստիկանության բախումներ, որոնց արդյունքում զոհվեց 10 մարդ: