"Տերյան" մշակութային կենտրոնի "Լեռնային Ղարաբաղի հայ փախստականների կարողությունների հզորացում" ծրագիրն արժանացել է 2024թ. Եվրոպական ժառանգության մրցանակի

Արմինֆո. Հոկտեմբերի 6-ից 8-ը Բուխարեստում կայացել է "Europa Nostra" համաեվրոպական ՀԿ և ԵՄ հանձնաժողովի "Ստեղծագործ Եվրոպա" ծրագրի կողմից հիմնված ամենամյա Եվրոպական մշակութային ժառանգության գագաթաժողովը, որի այս տարվա մրցանակակիրների թվում էր Հայաստանը ներկայացնող "Տերյան" մշակութային կենտրոնը՝ "Լեռնային Ղարաբաղի հայ փախստականների կարողությունների հզորացում" ծրագրի համար։

Ռումինիայում ՀՀ դեսպանության հաղորդագրության համաձայն, հոկտեմբերի 7-ին Բուխարեստի կենտրոնական "Աթենեում" համերգասրահում տեղի է ունեցել մրցանակաբաշխության հանդիսավոր արարողությունը, որի ընթացքում 2024թ. Եվրոպական ժառանգության մրցանակները շնորհվել են եվրոպական մի շարք երկրներում նյութական և ոչ նյութական մշակութային ժառանգության պահպանման գործում ներդրում ունեցած լավագույն 26 ծրագրերն իրականացնող կազմակերպություններին և անձանց, այդ թվում "Տերյան" մշակութային կենտրոնին (ղեկավար` Լիլիթ Մելիքյան)։

Ռումինիայի նախագահի բարձր հովանու ներքո անցկացված միջոցառմանը ներկա են գտնվել նախագահի խորհրդական Սերջիու Նիստորը, մշակույթի նախարար Ռալուկա Տուռկանը, Նորարարության, հետազոտությունների, մշակույթի, կրթության և երիտասարդության հարցերով ԵՄ հանձնակատար Իլիանա Իվանովան, Բուխարեստի քաղաքապետ Նիկուշոր Դանը, Ռումինիայում Հայաստանի դեսպան Տիգրան Գալստյանը, մրցանակակիրներ ունեցող մի շարք այլ երկրների դեսպանների հետ միասին։

Եվրոպական մշակութային ժառանգության գագաթաժողովի ծրագրի շրջանակներում հոկտեմբերի 8-ին գագաթաժողովի մի շարք մասնակիցներ և հյուրեր ճանաչողական շրջայց են կատարել Բուխարեստի հայկական թաղամասում՝ բացահայտելով քաղաքի հայկական ժառանգությունը։

Հոկտեմբերի 9-ին դեսպան Գալստյանը հյուրընկալել է "Տերյան" մշակութային կենտրոնի ներկայացուցիչներին ՀՀ դեսպանությունում՝ շնորհավորելով 2024թ. Եվրոպական ժառանգության մրցանակի առթիվ և մաղթելով նորանոր հաջողություններ հայ մշակույթի հանրահռչակման գործում։