ՆԳՆ. Իսակովի պողոտայում "Դոմուս" հիպերմարկետում բռնկված հրդեհի ժամանակ պայթյուն չի եղել

Արմինֆո. Երևանի Իսակովի պողոտայում գտնվող "Դոմուս" հիպերմարկետում բռնկված հրդեհի ժամանակ պայթյուն չի եղել: Այդ մասին հոկտեմբերի 7-ին լրագրողներին հաղորդել է ՀՀ ներքին գործերի նախարարի տեղակալ, ՀՀ փրկարար ծառայության տնօրեն Կամո Ցուցուլյանը։ Նրա խոսքով, ըստ նախնական տվյալների, բռնկումը տեղի է ունեցել կարճ միացումից ։

Սկզբում հիպերմարկետի աշխատակիցները փորձել են սեփական ուժերով մարել կրակը, եւ միայն այն բանից հետո, երբ համոզվել են, որ չեն կարող դա անել, զանգահարել են հրշեջ ծառայություն: Հրդեհի հետևանքով տուժածներ չկան: Պահեստային տարածքում հոսանքազրկում է տեղի ունեցել, որը էլեկտրամատակարարման վերականգնումից հետո հանգեցրել է հրդեհի:

Փոխնախարարն ընդգծել է, որ հրդեհի պատճառները հայտնի կդառնան Քաղաքաշինական, տեխնիկական և հրդեհային անվտանգության տեսչական մարմնի ուսումնասիրություններից հետո, որոնց արդյունքները կներկայացվեն հանրությանը: Ցուցուլյանը նշել է, որ հրդեհը մեկուսացվել է ։ Նա տեղեկացրել է նաև, որ շենքի վերին հարկերում արևային վահանակներ են եղել, ինչը դժվարացրել է հրշեջ ծառայությունների աշխատանքը:

ՆԳՆ հաղորդագրության համաձայն, հոկտեմբերի 7-ին, ժամը 12.57-ին, Ճգնաժամային կառավարման ազգային կենտրոն ահազանգ է ստացվել, որ հրդեհ է բռնկվել Երևան քաղաքի Իսակովի պողոտայում գտնվող «Դոմուս» խանութ-սրահի պահեստային տարածքում: Հրդեհի «ԲԻՍ 1» բարդության աստիճանով դեպքի վայր են մեկնել Երևան քաղաքի փրկարարական վարչությունից 4 մարտական հաշվարկ։ Ժամը 13.06-ին հայտարարվել է հրդեհի բարդության «Թիվ 2» կանչ։ Դեպքի վայր են մեկնել ևս 2 մարտական հաշվարկ, 2 ավտոսանդուղք, ՃԿԱԿ օպերատիվ խումբը, ԵՓՎ հրդեհաշիջման և փրկարարական աշխատանքների կազմակերպման խումբը, ԲԱՎ հերթապահ խումբը, ՓՈՒՎ հրդեհաշիջման և փրկարարական աշխատանքների կազմակերպման խումբը և հերթապահ հոգեբանը։ Ժամը 13.20-ին հայտարարվել է հրդեհի բարդության «Թիվ 3» կանչ․ դեպքի վայր են մեկնել ևս 4 մարտական հաշվարկ և 1 ԲԱՎ խումբ։

Հրդեհը մեկուսացվել է ժամը 15.23-ին, մարվել՝ ժամը 16.11-ին։ Նախնական տվյալներով՝ մոտ 3000 քառ.մ տարածքում այրվել է երկհարկանի շինությունն ամբողջությամբ՝ ներսում գույք, տեխնիկա, սարքավորումներ, կահույք և այլն։

Հրդեհաշիջման աշխատանքներին ներգրավվել են 17 մարտական հաշվարկ, 6 օպերատիվ խումբ, 2 ավտոսանդուղք, Երևանի քաղաքապետարանի 9 ջրատար։

Դեպքի վայրում աշխատանքները ղեկավարել է ՆԳՆ ՓԾ տնօրեն-ՆԳ նախարարի տեղակալ, փ/ծ գեներալ-մայոր Կամո Ցուցուլյանը։