Երեւանի քաղաքապետը դժգոհ է առանց քաղաքապետարանի գիտության կազմակերպված հրավառությունից

Արմինֆո. Անհրաժեշտ է պարզել Տեղեկատվական տեխնոլոգիաների համաշխարհային կոնգրեսի ավարտին նվիրված համերգից  հետո տեղի ունեցած հրավառությանն առնչվող իրավիճակը։ Այդ մասին հոկտեմբերի 7-ին հայտարարել է Երեւանի քաղաքապետ Տիգրան Ավինյանը՝ Երեւանի քաղաքապետարանում կայացած աշխատանքային խորհրդակցության ժամանակ։

Նա նշել է, որ քաղաքում հրավառության անցկացումն օրենքով արգելված է, բացառությամբ Երևանի քաղաքապետարանի կողմից թույլատրված դեպքերի: Ավինյանի ասելով՝ միանշանակ է, որ դիմում ստանալու դեպքում նման թույլտվություն կտրվեր, բայց նման դիմում չի եղել։ "Խնդրում եմ ոստիկանության հետ համատեղ արձանագրություն կազմել խախտման մասին", - նշել է քաղաքապետը։

Հիշեցնենք, որ հոկտեմբերի 5-ին Հանրապետության հրապարակում հրավառություն էր սկսվել ժամը 23:00-ին՝ Պետական սիմֆոնիկ նվագախմբի ելույթից հետո։