Նուբար Աֆեյանը Հայաստանի իշխանությունների հետ հանդիպմանը բարձրացրել է Ադրբեջանում պահվող հայերի հարցը

Արմինֆո.Երկրորդ տարին Բաքվի բանտում գտնվող բարերար Ռուբեն Վարդանյանի հասցեին ՀՀ վարչապետ Նիկոլ Փաշինյանի հնչեցրած կասկածներն անհիմն են: Այդ մասին հոկտեմբերի 2-ին "Ուժեղ Սփյուռք" ծրագրի հաղթողներին հայտարարելու արարողության ժամանակ հայտարարել է "Հայաստան 2041" բարեգործական հիմնադրամի համահիմնադիր Նուբար Աֆեյանը՝ ի պատասխան Վարդանյանի հասցեին Փաշինյանի հայտարարություններին գնահատական տալու խնդրանքի։

Աֆեյանը հիշեցրել է, որ Ռուբեն Վարդանյանին ճանաչում է արդեն 25 տարի և հստակ կարող է ասել, թե ինչի է նա ընդունակ, ինչի՝ ոչ: "Կցանկանայի նշել, որ ադրբեջանական իշխանությունները որոշ զիջումների են գնացել և Ռուբենին թույլ են տալիս կարճատև հեռախոսազանգեր կատարել ընտանիքի անդամների հետ։ Եվ այդ զրույցների ընթացքում նա կարողացել է սահմանափակ ճանապարհով, բայց հասկացնել, թե ինչի կարիք ունի, ինչ խնդիրների է բախվում", - ասել է Աֆեյանը։

Բարերարը հավելել է, որ իրենք աշխատում են միջազգային կազմակերպությունների և իրավաբանների հետ, որպեսզի հասնեն ինչպես Վարդանյանի, այնպես էլ Բաքվում պահվող մյուս հայերի ազատ արձակմանը:

Միևնույն ժամանակ, նա ուշադրություն է հրավիրել աշխարհում տիրող բարդ իրավիճակի վրա։ "Դուք ինքներդ եք տեսնում, թե ինչ է կատարվում միջազգային ասպարեզում։ Լիբանանի շուրջ վերջին զարգացումները: Մենք ականատես ենք լինում պառակտմանն աշխարհում և միջազգային դերակատարների կողմից ցինիզմի դրսևորմանը։ Ոմանք ասում են, որ արդարությունը կարևոր է խաղաղության հաստատման հարցում, ի մյուսներն էլ պնդում են, որ թող ցանկացած ճանապարհով խաղաղություն լինի, իսկ արդարությունն այդքան էլ կարևոր չէ։ Բայց սա իրատեսական մոտեցում չէ, քանի որ առանց արդարության հնարավոր չէ հասնել խաղաղության", - նշել է Աֆեյանը։ Ընդ որում, նա խոստովանել է, որ թե ԱՄՆ-ի, թե Եվրոպայի բարձրաստիճան պաշտոնյաների հետ հանդիպումների ժամանակ քաղաքական գործիչներն ընդունում են, որ խաղաղություն առանց արդարության հնարավոր չէ, սակայն նրանք այդ մասին հրապարակավ չեն խոսում:

"Հուսանք, որ խաղաղության պայմանագրի շնորհիվ մեզ կհաջողվի հասնել խաղաղության տարածաշրջանում։ Բայց իմ համոզմունքն այն է, որ առանց արդարության խաղաղություն չի կարող լինել ։ Ես նաև վստահ եմ, որ Հայաստանի կառավարությունն աշխատում է, որպեսզի մեր գերիներն ու ռազմագերիները ազատ արձակվեն Բաքվի բանտերից", - նշել է բարերարը։

Կրկին անդրադառնալով Վարդանյանի հասցեին հնչած կասկածներին՝ Աֆեյանը համոզմունք է հայտնել, որ դրանք չէին կարող վերաբերել Ռուբենի անձին, քանի որ նա բոլորովին այլ խառնվածքի մարդ է: "Ռուբենը, իմանալով իրեն սպառնացող վտանգի մասին, գիտակցաբար մեկնել է Արցախ՝ օգնելու դժվարին իրավիճակում հայտնված մարդկանց։ Ես չեմ կասկածում Ռուբենին։ Սակայն, եթե Վարդանյանի միջոցով Հայաստանի իշխանությունները ցանկանում էին որոշակի մեսիջներ ուղարկել այլ երկրների, արտաքին ուժերի հենց նույն Հյուսիսում, դա այլ հարց է, քաղաքական, բայց դա չի կարող ուղղակիորեն վերաբերել Ռուբենին", - նշեց Աֆեյանը։

Անդրադառնալով հայ ռազմագերիների և պատանդների ազատ արձակման նպատակով ՄԱԿ-ի կլիմայական գագաթաժողովին (COP29) ընդառաջ Ադրբեջանի նկատմամբ ճնշում գործադրելու հարցին ՝ բարերարը տեղեկացրել է, որ ՄԱԿ Գլխավոր ասամբլեայի շրջանակում բազմաթիվ հանդիպումներ են անցկացվել, որոնց առանցքային թեման եղել է հենց այդ հարցը: Նրա խոսքով՝ այդ ուղղությամբ մեծ ջանքեր են գործադրվում, հատկապես, սփյուռքահայերի կողմից։ Աֆեյանը հույս է հայտնել, որ լավ կլինի, եթե այդ ջանքերի արդյունքը լինի Վարդանյանի ազատ արձակումը։ Նա նաև անհեթեթ է համարել Ադրբեջանի կողմից հայտարարված COP29 կարգախոսը. միջոցառումը պետք է դառնա խաղաղության գագաթնաժողով:

Միաժամանակ, նա հավելել է, որ եթե միջազգային հանրությունը չի ցանկանում ճնշում գործադրել Ադրբեջանի նկատմամբ՝ հայ գերիների վերադարձի հարցում, մնում է հուսալ, որ Հայաստանի իշխանությունները հետևողական կլինեն այդ գործընթացում:

Ճշգրտող հարցին, թե արդյոք ինքը հանդիպել է Հայաստանի իշխանությունների հետ և բարձրացրել ռազմագերիների ու քաղաքացիական անձանց հարցը, Աֆեյանը դրական պատասխան է տվել. «Այո, ես հանդիպել եմ։ Մենք քննարկել ենք այդ հարցը", - ասել է բարերարը՝ չմանրամասնելով այդ քննարկումները։

Նշենք, որ օգոստոսի 31-ին Երևանում տեղի ունեցած մամուլի ասուլիսի ժամանակ ՀՀ վարչապետ Նիկոլ Փաշինյանը, անդրադառնալով ադրբեջանական գերության մեջ գտնվող Ռուբեն Վարդանյանի վերաբերյալ հարցին, հայտարարել էր, որ բարերարի առնչությամբ անորոշություններ կան: "Կարծում եմ, որ Ռուբեն Վարդանյանի հարցում կան անհստակություններ։ Ինչպե՞ս է ստացվել, որ Վարդանյանը հրաժարվել Է Ռուսաստանի Դաշնության քաղաքացիությունից, ո՞վ է նրան խորհուրդ տվել կամ հանձնարարել դա անել, ո՞վ է նրան ուղարկել Հայաստան և Լեռնային Ղարաբաղ, ի՞նչ նպատակներով, երաշխիքներով ու բարեմաղթանքներով է նա ապահովվել, և ինչու՞, ի վերջո, ինչ-որ մեկն ասել է, որ նրան այնքան էլ լավ չի ճանաչում, և՝ որ իր երկրի քաղաքացի չէ։ Մենք ուզում ենք ստանալ այդ հարցերի պատասխանները":