Երևանում կանցկացվի Շեքսպիրին նվիրված 5-րդ միջազգային գիտաժողովը

Արմինֆո. Երեւանում տեղի կունենա "Շեքսպիրը եւ բռնապետության ու իշխանության չարաշահման խնդիրները. երեկ, այսօր եւ վաղը" թեմային նվիրված 5-րդ միջազգային գիտաժողովը: Կազմակերպիչն է Հայ շեքսպիրյան ընկերությունը։

Գիտաժողովին զեկույցներով հանդես կգան ավելի քան 30 շեքսպիրագետներ, դասախոսներ, շեքսպիրյան փառատոնների ղեկավարներ և ասպիրանտներ՝ 15 երկրներից:

Որպես պատվավոր հյուրեր Երևան են հրավիրվել անվանի գիտնական-պրոֆեսորներ Գարի Քեշիյանը (ԱՄՆ) և Շեյլա Կավանախը (ԱՄՆ): Մասնակիցների թվում են Շեքսպիրյան փառատոնի հիմնադիր անդամները (Քենթերբերի, Մեծ Բրիտանիա), ինչպես նաև մասնագետներ Իտալիայից, ԱՄՆ-ից, Կանադայից, Սերբիայից, Չեխիայից, Հունգարիայից, Ռումինիայից, Ռուսաստանից, Լեհաստանից, Ուկրաինայից, Հայաստանից:

Հայ շեքսպիրյան ընկերության մշտական գործընկերը Հայաստանի ամերիկյան համալսարանն է, որտեղ և տեղի են ունեցել նախորդ 3 գիտաժողովները (2016թ., 2018թ. և 2022թ.), 2019թ. միջոցառումը տեղի է ունեցել Մուրադ-Ռաֆայելյան քոլեջում (Վենետիկ):

Ընկերության մամուլի ծառայության հաղորդագրության համաձայն, գիտաժողովի շրջանակում քննարկումները կմեկնարկեն հոկտեմբերի 3-ին, ժամը 10: 00-14: 00-ը, Հայաստանի ամերիկյան համալսարանի Ակյան սրահում (Բաղրամյան 40), հոկտեմբերի 4-ին ՝ ժամը 10: 00- 14:00 Երևանի պետական համալսարանի Չարենցի անվան դահլիճում (Ա. Մանուկյան 1), հոկտեմբերի 5-ին՝ 10:00 – 14:00 Հայաստանի Ամերիկյան համալսարանի Ալեք և Մարի Մարուքյան սրահում:

Իսկ հոկտեմբերի 3 – ին, ժամը 19:00-ին Երևանի Կամերային թատրոնում (Մաշտոցի պողոտա 58) կներկայացնեն "Ռոմեո և Ջուլիետ" ներկայացումը, և հոկտեմբերի 5-ին, ժամը 19:00-ին՝ "Համլետ" ներկայացումը՝ Երևանի Հ. Ղափլանյանի անվան դրամատիկական թատրոնում (Իսահակյան 28), որին կհաջորդեն քննարկումներ: