ԵՄ երկրների դեսպանները ծանոթացել են հայ-թուրքական սահմանի "Մարգարա" անցակետում կատարված աշխատանքին

Արմինֆո.ԵՄ երկրների դեսպանները շրջայց են կատարել Մարգարայի անցակետում:

Ինչպես հաղորդում է Պետական եկամուտների կոմիտեի մամուլի ծառայությունը, ՊԵԿ նախագահ Ռուստամ Բադասյանը Մարգարայի անցակետում հյուընկալել է ԵՄ երկրների դեսպաններին։ Կոմիտեի նախագահը և ԵՄ երկրների դեսպանները շրջայց են կատարել Մարգարայի անցակետի տարածքում:

Շրջայցի ընթացքում ներկայացվել են անցակետի ենթակառուցվածքների արդիականացումը, ինչպես նաև սահմանային հսկողություն իրականացնելու առանձնահատկությունները։ Հյուրերը շրջել են Մարգարայի անցակետի սպասարկման սրահում, ծանոթացել են կառուցված խորը զննման անգարին, բեռների ձևակերպման համար նախատեսված տաղավարներին, պահեստին, ավտոկայանատեղիներին և բարեկարգված հրապարակին, ինչպես նաև այլ ենթակառուցվածքներին, որոնք հագեցած են ժամանակակից տեխնիկական սարքավորումներով և կառուցված միջազգային չափանիշներին համահունչ:

«Մարգարայի մաքսակետում, ինչպես Հայաստանի մյուս անցակետերում, պետական սահմանային հսկողությունը նախատեսվում է իրականացնել սահմանային համալիր կառավարման սկզբունքի հիման վրա՝ «մեկ պատուհան» համակարգով։

Միաժամանակ, այցի ընթացքում ներկայացվել են մաքսային բարեփոխումների հիմնական ուղղությունները, այդ թվում՝ առևտրի դյուրինացումը, թվայնացումը և ենթակառուցվածքների արդիականացումը, ինչպես նաև միջազգային համագործակցության շրջանակում իրականացվող ծրագրերն ու արձանագրված ձեռքբերումները: ԵՄ դեսպանները, կարևորելով ԵՄ-ՊԵԿ համագործակցությունը և ներդրված համատեղ ջանքերը, գոհունակություն են հայտնել անցակետում կատարված աշխատանքներից», - ասվում է հաղորդագրությունում։

Ավելի վաղ հաղորդվել է, որ հայ-թուրքական սահմանի անցակետը պատրաստ է շահագործման 2023 թվականի դեկտեմբերից: Հայկական կողմը դրական ազդակներ է ակնկալում Թուրքիայից՝ երրորդ երկրների քաղաքացիների, ինչպես նաև դիվանագիտական անձնագրեր ունեցող անձանց համար սահմանը բացելու համար: Թուրքիայի արտգործնախարար Հաքան Ֆիդանն օգոստոսի 1-ին հայտարարել է, որ հայ-ադրբեջանական հարաբերությունների կարգավորման դեպքում Թուրքիան կարող է բացել Հայաստանի հետ սահմանը:

Հայ-թուրքական հարաբերությունների կարգավորման հարցերով Հայաստանի եւ Թուրքիայի հատուկ ներկայացուցիչներ Ռուբեն Ռուբինյանը եւ Սերդար Քըլըչը  հուլիսի 30 - ին Մարգարա-Ալիջան սահմանակետում հանդիպման ժամանակ պայմանավորվել են "տարածաշրջանային փոփոխություններին համապատասխան" իրականացնել տեխնիկական կարիքների գնահատում, որոնք թույլ կտան բացել Ախուրիկ-Աքյաքա երկաթուղու մոտ գտնվող սահմանային անցակետը:

Ավելի վաղ Ռուբինյանն ու Քըլըչը չորս հանդիպում են ունեցել.  մեկը՝ Մոսկվայում, երեքը ՝ Վիեննայում: Վերջին հանդիպմանը, որը տեղի է ունեցել 2022 թվականի հուլիսի 1 - ին Վիեննայում, կողմերը պայմանավորվել են սեղմ ժամկետներում ապահովել երրորդ երկրների քաղաքացիների և դիվանագիտական անձնագրեր ունեցող անձանց կողմից հայ-թուրքական ցամաքային սահմանը հատելու հնարավորությունը, ինչպես նաև՝ սկսել բեռների ուղիղ ավիափոխադրումներ Հայաստանի և Թուրքիայի միջև։